„დღეს, ტელევიზიით, კიდევ ერთხელ ვიხილეთ აბსოლუტურად აღმაშფოთებელი და ამაზრზენი კადრები, რამაც კიდევ ერთხელ დაგვანახა “ნაციონალური მოძრაობის“ რეალური სახე", _ ასე გამოეხმაურა "დემოკრატიული მოძრაობა _ ერთიანი საქართველოს" ლიდერი ნინო ბურჯანაძე პროკურატურის მიერ გავრცელებულ, 2011 წლის 26 მაისის სპეცოპერაციის ამსახველ კადრებს.
“დღეს, ვიხილეთ “ნაციონალური მოძრაობის“ რეალური სახე _ იმ “ნაციონალური მოძრაობის“, რომელიც დღეს ბედავს, თითს გვიქნევს და ამბობს, რომ ის ხელისუფლებაში მოვა იმისთვის, რომ ქვეყანა სწორ გაზაზე დადგეს. კარგად დავინახეთ, თუ როგორი შემართებით და გაფაციცებით იყვნენ, რომ თავიანთი მოსახლეობა დაესაჯათ. ასეთი მარჯვე რომ ყოფილიყვნენ ახალაია და ის სპეცრაზმელები თავის დროზე 2008 წლის აგვისტოს ომში და დახმარებოდნენ ცხინვალში მებრძოლ ბიჭებს, შეიძლება, ის სამდღიანი ომი, ისე არ დამთავრებულიყო, როგორც დამთავრდა. “ნაციონალური მოძრაობა“ მარჯვე და ძლიერი მხოლოდ უიარაღო, საკუთარი მოსახლეობის წინაშე იყო. დიახ, ჩვენ უნდა მოვსულიყავით ხელისუფლებაში და “ნაციონალური მოძრაობის“ ეს და სხვა წარმომადგენლები, ვინც დამნაშავეა, უკვე დიდი ხანია ციხეში ისხდებოდნენ და არასოდეს აღარ იქნებოდა იმის საშიშროება, რომ ქვეყანაში, ოდესმე, მსგავსი რამ განმეორდება. ჩვენ მოვალთ აუცილებლად ხელისუფლებაში. აუცილებლად ბოლომდე გამოვიძიებთ 26 მაისსა და სხვა დანაშაულებებს და აუცილებლად დავსჯით იმ ადამიანებს, ვინც “ნაციონალურ” რეჟიმს წარმართავდა და დანაშაულებრივ ბრძანებებს ასრულებდა“, _ განაცხადა ნინო ბურჯანაძემ.
ბურჯანაძის თქმით, 26 მაისის აქციის დარბევის მწვანე შუქის მიმცემი აშშ-ს ელჩთან ერთად, დღეს “ქართული ოცნების“ სიის მთავარი სახეა.
”ძალიან სამწუხაროა, რომ ”ქართული ოცნების“ სიაში და ერთ-ერთ მთავარ სახედ არის ის ადამიანი, რომელიც ამერიკის ელჩთან ერთად იყო მწვანე შუქის მიმცემი 26 მაისის აქციის დარბევისა და როდესაც ჯერ ქალბატონმა ჩუგოშვილმა და მერე ამერიკის მაშინდელმა ელჩმა, აქციის დარბევამდე რამდენიმე წუთით ადრე განაცხადეს, რომ ხელისუფლებას აქვს აქციის დარბევის უფლება, ვინაიდან თითქოს აქცია უკანონო იყო. ძალიან სამწუხაროა, რომ ”ქართულმა ოცნებამ“ ბოლომდე არ გამოიძია 26 მაისი და აღმაშფოთებელიც კი არის ის, რომ არჩევნებამდე მხოლოდ სამი კვირით ადრე გამოამჟღავნეს ის ფაქტები, რაც ჩვენ დიდი ხანია, ვიცოდით, _ განაცხადა ბურჯანაძემ.
