კორუფციული გარიგებები, არალეგიტიმური მმართველობა, მაღალი თანამდებობის პირებისა და სუს-ის გავლენები, – გორის სახელმწიფო უნივერსიტეტის პროფესორი, რომელიც 2 წლის წინ თანამდებობიდან გაათავისუფლეს, სავარაუდო დანაშაულებრივ ქმედებებზე საუბრობს.
"გურია ნიუსთან" ინტერვიუში პროფესორი აკაკი ტოლიაშვილი აღნიშნავს, რომ დანაშაულებრივი ქმედებების შესახებ არაერთხელ აცნობა განათლების და მეცნიერების სამინისტროს, საჩივრები აქვს დაწერილი პროკურატურაშიც, რაზეც სისხლის სამართლის საქმეა აღძრული, თუმცა, პრობლემის მოგვარება დღემდე ვერ მოხერხდა.
რაში ადანაშაულებს ტოლიაშვილი განათლების და მეცნიერების მინისტრის ყოფილ მოადგილეს, რომელიც თსუ-ს რექტორობის კანდიდატია, ვინ მართავს მისი აზრით გორის უნივერსიტეტს, რა საქმიანობას ეწევა უმაღლეს სასწავლებელში ყოფილი პრემიერ-მინისტრის ირაკლი ღარიბაშვილის ბიძა და რატომ ემუქრებიან, თუ არ გაჩუმდება, _ ამ საკითხებზე "გურია ნიუსს" გორის უნივერსიტეტის პროფესორი აკაკი ტოლიაშვილი ესაუბრა.
_ბატონო აკაკი, რა პრობლემები გაქვთ დღეს გორის უნივერსიტეტის ხელმძღვანელობასთან და როდის დაიწყო ეს დაპირისპირება?
_2006 წლამდე ცხინვალის უნივერსიტეტის პროფესორი ვიყავი. თუმცა, 2006 წელს ცხინვალის უნივერსიტეტი მაშინდელი პრეზიდენტის მიხეილ სააკაშვილის ინტერესებიდან გამომდინარე დაიხურა და გორის უნივერსიტეტს შეუერთდა. მანამდე მე ვიცავდი ცხინვალის უნივერსიტეტის ღირსებას შვილებთან ერთად, რომლებიც აკადემიური პროფესორები იყვნენ. ვეწინააღმდეგებოდი უნივერსიტეტების შეერთებას, მაგრამ სააკაშვილის იმ ხელისუფლებამ გადაწყვეტილება მაინც სისრულეში მოიყვანა. ახლაც, რამდენჯერმე დაპირებაც მივიღე მაღალი თანამდებობის პირებისგან, მათ შორის ბიძინა ივანიშვილისგანაც, რომ აღადგენდნენ ცხინვალის უნივერსიტეტს, თუმცა, უშედეგოდ. ამ საკითხთან დაკავშირებით, არაერთი წერილი მაქვს მიწერილი განათლების სამინისტროსთვის და პრესაშიც არაერთხელ გამოქვეყნებულა.
დაპირისპირებები სწორედ 2006 წლიდან დაიწყო. უნივერსიტეტების შეერთების წინ, მე და ჩემი ოჯახი რეპრესიებში მოვექეცით. რადგან უნივერსიტეტების შეერთებას ვეწინააღმდეგებოდით, ეს იმდროინდელმა კუდ-მა არ გვაპატია და უმუშევარი დავრჩი. 4 წლის სამართლებრივი ბრძოლის შემდეგ მე აღმადგინეს ახლა უკვე გორის უნივერსიტეტში, როგორც ცხინვალის უნივერსიტეტის სამართლებრივი მემკვიდრე, პროფესორად, მაგრამ 2 წლის შემდეგ კვლავ კუდ-ის აგენტების ჩარევით 2012 წელს უნივერსიტეტიდან გამომიშვეს. ამაში კი ჩემივე სტუდენტები გამოიყენეს, რომლებიც იმჟამად აკადემიური საბჭოს წევრები იყვნენ. 5 კაციდან 3-მა ხმა არ მომცა და აირჩიეს ჩემივე კათედრის წევრი. ამის შემდეგ განათლების სამინისტროსთან მუდმივი ბრძოლა მაქვს რომ ჩემი სიმართლე დავამტკიცო. გაყალბებული იყო აკადემიური პროფესორების არჩევნები, რადგან აკადემიური საბჭოს წევრები, ის 5 კაცი არალეგიტიმური წევრები იყვნენ, მათ საბჭოს წევრობის ვადა ჰქონდათ ამოწურული. ამ საკითხთან დაკავშირებით პროკურატურასაც საქმე აქვს აღძრული, თუმცა თაროზეა შემოდებული. მიუხედავად ამისა, მაინც არ გავჩერებულვარ, მუდმივად ვითხოვდი განათლების სამინისტროში მინისტრთან ან მის მოადგილეებთან შეხვედრას, თუმცა, არც მარგველაშვილმა მიმიღო, არც სანიკიძემ და ბოლოს ყველა ჩემი წერილი გიორგი შარვაშიძესთან იკრიბებოდა. წელიწადია შერვაშიძეს ვეხვეწები განიხილოს ეს საკითხები, არა სამართლებრივად, არამედ იმ ნაწილში, რაც სამინისტროს ეხება, თუმცა, ამით არ დაინტერესებულა. ორჯერ გამომიგზავნა უაზრო პასუხი, რომელიც ჩემ წერილებს საერთოდ არ შეეხებოდა. რადგან ახლა შარვაშიძე თსუ-ს რექტორობის კანდიდატია, კიდევ ერთხელ ხმამაღლა მინდა განვაცხადო, რომ ასეთი პიროვნება, უნივერსიტეტს ვერანაირად ვერ მართავს. გარდა ამისა, სამინისტრო არ ინტერესდებოდა გორის უნივერსიტეტში მიმდინარე კორუფციული სქემებით და გარიგებებით. ამაზეც არაერთხელ მიმიმართავს მათთვის.
_რა კორუფციაზეა საუბარი?
_ კორუფცია კი არა, ეს უკვე სისტემური დანაშაულია. სისტემური დანაშაულია, როცა აკადემიური საბჭო ლეგიტიმური არ არის და ის უნივერსიტეტის მაინც საკითხებს წყვეტს; როცა ადმინისტრაცია არ იჩენს ინტერესს, როგორ იხარჯება სტუდენტებიდან შესული თანხები უნივერსიტეტში.
_უფრო კონკრეტულად გვითხარით, რა დანაშაულზეა საუბარი? სად მიდის თქვენი ინფორმაციით სტუდენტების მიერ გადახდილი თანხები?
_ასეთ დანაშაულებზე 2012 წელს აღვძარი სისხლის სამართლის საქმე უნივერსიტეტის ხელმძღვანელი მუშაკების წინააღმდეგ, რომელსაც პროკურატურა 4 წელია სწავლობს, ამაში კანცლერიც მონაწილეობდა. ერთ-ერთ დანაშაულს გეტყვით, როგორ ერიცხებოდა უნივერსიტეტიდან თანხა საჯარო სკოლას გასარემონტებლად, მაშინ, როდესაც სარემონტო თანხებს მას განათლების სამინისტროც აძლევდა. როგორ შეიძლება სტუდენტების ფულით სკოლები გარემონტდეს?!
_რომელ სკოლას გადაერიცხა თანხა?
_მხოლოდ იმის თქმა შემიძლია, რომ გორის რაიონის სკოლაა. სად გაქრა ეს თანხები? რატომ არ დაინტერესდა შარვაშიძე ამ საკითხებით? ამაში საეჭვოს ვერაფერს ხედავთ?! ამით, ალბათ, ხელს აფარებს უნივერსიტეტში მიმდინარე დანაშაულებრივ ქმედებებს.
_თქვენ ახლა ვარაუდის დონეზე საბრობთ... ახალ მინისტრს მიმართეთ ამ საკითხებთან დაკავშირებით?
_ორი წერილი მაქვს ივლისში და აგვისტოში გაგზავნილი. ისიც არ მიღებს.
_პროკურატურიდან გაქვთ პასუხები? რა ეტაპზეა გამოძიება?
_4 წლის განმავლობაში მწერენ მხოლოდ იმას, რომ გამოძიება მიმდინარეობს. ამ ხნის განმავლობაში მე საუნივერსიტეტო საქმიანობა აკრძალული მაქვს და მეუღლის პენსიას შევყურებ. იმისთვის, რომ სიმართლე ვთქვი და კონკრეტული პირების დანაშაულებრივი ქმედებები ვამხილე. სააკაშვილის დროს კუდ-ი განაგებდა განათლების სისტემას უნივერსიტეტებში, კუდ-ის იმჟამინდელმა ხელმძღვანელმა ლევან დუჩიძემ მოიყვანა უნივერსიტეტის რექტორად გიორგი სოსიაშვილი, რომელიც დღესაც განაგებს უნივერსიტეტს. დუჩიძე ემუქრებოდა ჩემს შვილებს, მამათქვენი დაგღუპავთ, გააჩუმეთო.
_ბოლო რამდენიმე თვის განმავლობაში აქტიურად განიხილება უნივერსიტეტებში ე.წ. ოდეერის არსებობის შესახებ ინფორმაციები. გორის უნივერსიტეტში რა სიტუაციაა ამ კუთხით?
_2013 წელსაც ვამბობდი ამასთან დაკავშირებით და დღესაც ვამბობ, რომ გორის უნივერსიტეტის ადმინისტრაციული თანამშრომლების უმრავლესობა კუდ-ის აგენტები არიან. ამის თქმისთვის დამიბარეს სუს-ის განყოფილებაში და მითხრეს, გავჩუმებულიყავი, საუბარი არ დამეწყო.
_რაც შეეხება სასამართლო პროცესებს, რასთან დაკავშირებით მიმდინარეობდა და რა დაგაწყვეტილებებია გამოსული?
_2015 წლის იანვარში მინდოდა მონაწილეობა მიმეღო გორის უნივერსიტეტის რექტორის არჩევნებში. თუმცა, არჩევნები ისე ჩაატარეს, რომ ეს ინფორმაცია არსად გამოცხადებულა, არც უნივერსიტეტის ვებ-გვერდზე, არც გაზეთში და არც რაიმე სხვა საინფორმაციო საშუალებით, რაც მოგვიანებით უნივერსიტეტის შიდა აუდიტმა დაადასტურა. არჩევნების შესახებ ორი დღით ადრე გავიგე, შემთხვევით, მაგრამ საბუთების შეგროვება ვეღარ მოვასწარი. რამდენიმე დოკუმენტის მიღებას 10-დღემდე ვადა სჭირდებოდა. ასე რომ, ერთადერთი კანდიდატი ამ არჩევნებში იყო ახლანდელი რექტორი გიორგი სოსიაშვილი. რადგან არჩევნებში მონაწილეობის უფლება არ მომეცა სასამართლოს მივმართე. მაგრამ სასამართლომ გადაწყვიტა, რომ მე 2 დღეც მეყოფოდა დოკუმენტაციის შესაგროვებლად. მეორე ინსტანციამაც იგივე გადაწყვეტილება დატოვა ძალაში. ახლა უზენაესი სასამართლოს გადაწყვეტილებას ველოდები. ამ სასამართლო პროცესებზე გარდა იმისა, რომ რექტორის არჩევნებში მონაწილეობის უფლების შეზღუდვას ვაპროტესტებდი, ასევე ვითხოვდი, რომ გორის უნივერსიტეტის აკადემიური საბჭოს არაუფლებამოსილ წევრებს უფლებამოილება შეწყვეტოდათ. 5-დან 3 წევრი არალეგიტიმური იყო. რექტორმა კი თავისი თავი ამ 5 კაციდან აირჩია. ეს არის კანონიერი? შარვაშიძე ამასაც მალავს. სასამართლოს პარალელურად, განათლების სამინისტროც ჩაყენებული მყავდა საქმის კურსში. ამ ინფორმაციის დამალვისთვის ისიც სისხლის სამართლის დამნაშავეა.
_ ვინ არის ის სამი კანდიდატი, ვისზეც ამბობთ რომ არალეგიტიმურები იყვნენ?
_ გოგოლაძეს, ქირიას უფლებამოსილების ვადა ჰქონდა ამოწურული. სიგუამ კი თვითონ დაადასტურა, რომ ის არაკანონიერად იყო საბჭოში შესული. აკადემიურ პოფესორად უნდა ავერჩიე და როცა ეს საკითხები დავაყენე, გამომაგდეს უნივერსიტეტიდან. ამაზე განათლების სამინისტროს შიდა აუდიტს დასკვნა არ უნდა გაეკეთებინა?! განათლების სამინისტროს აუდიტის დასკვნა კი არა, საერთოდ გააჩერეს გამოძიება. როცა სისხლის სამართლის საქმე აღიძრა 2012 წელს, გორის უნივერსიტეტის ხელმძღვანელი მუშაკების მიმართ, იმ პერიოდში გორის უნივერსიტეტში მუშაობა დაიწყო ყოფილი პრემიერ-მინისტრის, ირაკლი ღარიბაშვილის ბიძამ, დედის ძმამ, რამაზ ყორანაშვილმა და მისმა შვილმა. დღემდე მუშაობენ, მაგრამ არ ვიცი რა თანამდებობაზე. ამის შემდეგ, ყველა საქმე, რომელიც გორის უნივერსიტეტის წინააღმდეგ აღიძრა, შეჩერებულია.
_შეიძლება ეს ე.წ. ოდეერი იყოს?
_რამდენჯერმე მოვითხოვე ამის შესახებ ინფორმაცია, მაგრამ პასუხი არ გაუციათ. სოლიდურ ხელფასს იღებს და უნივერსიტეტში იშვიათად მიდის, ეს ზუსტად ვიცი. ამის ჩაძიების უკვე მეშინია არაფერი მიქნან. მანამდეც ვხედავდი ამ საფრთხეს და ახლაც, როცა ასეთი დანაშაულების წინააღმდეგ ბრძოლა მიწევს.
შენიშვნა: "გურია ნიუსი" რამდენჯერმე ეცადა დაკავშირებოდა თსუ-ს რექტორობის კანდიდატს გიორგი შარვაშიძეს, თუმცა მან ჩვენს ზარებსა და სმს შეტყობინებებს არ უპასუხა. მიუხედავად ამისა, მზად ვართ, სურვილის შემთხვევაში მისი პოზიცია მკითხველს მივაწოდოთ.
ასევე, "გურია ნიუსი" სწავლობს გორის უნივერსიტეტში მიმდინარე პროცესებს და ვრცელ მასალას მოგვიანებით შემოთავაზებთ.
