"საერთაშორისო გამჭვირვალობა – საქართველო"-ს ხელმძღვანელი ეკა გიგაური ყოფილი პრემიერ-მინისტრის, ბიძინა ივანიშვილის ბრალდებებს პასუხობს და აცხადებს, რომ მის მიმართ გამოთქმული განცხადებები "არაეთიკურია"
"რადგან ბატონი ბიძინას კომენტარის შემდეგ ძალიან ბევრი მედია საშუალება დაგვიკავშირდა ორგანიზაციაში და ჩემს კომენტარს ითხოვენ, მოვახერხე და ზოგ მედია საშუალებას მივეცი კომენტარი. ზოგისთვის ვერ ვახერხებ რისთვისაც ბოდიშს გიხდით. გადავწყვიტე ფბ პოსტით დავაფიქსირო ჩემი პოზიცია. "საერთაშორისო გამჭვირვალობა – საქართველო" მზად არის კონსტრუქციული დებატებისთვის და დისკუსიისთვის, იქნება ეს სასამართლო რეფორმა, თუ მედია გარემო, თუ ანტიკორუფციულ სისტემები და კიდევ ბევრ სხვა თემა, რაზეც ჩვენი ორგანიზაცია მუშაობს. მაგრამ ძალიან არ მინდა ჩემი მისამართით ნათქვამ არაეთიკურ გამონათქვამებს პასუხი გავცე და ამაზე დიდი დრო დავხარჯო. პირველ რიგში, ამას ყველაფერს არასერიოზულად ვთვლი და მეორეს მხრივ, ჩვენს ორგანიზაციაში წინა საარჩევნო ციებ-ცხელებაა. ამიტომ დროის გამოძებნაც მიჭირს, ყველას ცალ-ცალკე გიპასუხოთ. მინდა, მალე დადგეს საქართველოში დრო, როცა ოპონენტები პიროვნულ შეურაცხყოფას შეეშვებიან და "დაპირისპირება" მხოლოდ საქმიანი იქნება. ასევე, ქვეყნის სამსახური და სამხედრო ან პოლიციის წოდება საქილიკო და სამარცხვინო არ იქნება", _ წერს გიგაური საკუთარი "ფეისბუკის" გვერდზე და იქვე დასძენს, რომ პოლიციის პოლკოვნიკი არასოდეს ყოფილა.
"ვწუხვარ მაგრამ არასოდეს ვყოფილვარ პოლკოვნიკი. უმცროსი მესაზღვრის ჩინი მქონდა ისევე როგორც ყველას ვინც მსახურობდა სასაზღვროში. მე იქ 2004 წლიდან 2008 წლამდე ვიმსახურე… და სასერთაშორისო ურთიერთობებს და რეფორმებს ვხელმძღვანელობდი", _ წერს გიგაური.
ცნობისთვის, საქართველოს ყოფილმა პრემიერ-მინისტრმა ბიძინა ივანიშვილმა დღეს რეგიონულ მედიასთან შეხვედრისას განაცხადა: "ფულზე რომ იყო საუბარი იქ გიგაურმაც მიიღო რაღაც პაგონები".
"ის მესამე სექტორიც ხომ დასვრილი და დაბინძურებულია, სამოქალაქო საზოგადოებაც ხომ მათ გარყვნეს, ისეთი ხალხი შედის და ისეთ ნიშას იბრალებს.
ფულზე რომ იყო საუბარი იქ გიგაურმაც მიიღო რაღაც პაგონები და ესენი გამოდიან. მესამე სექტორს კი არ ვაკრიტიკებ, მესამე სექტორში თავშეფარებულ ხალხს ვაკრიტიკებ, ამ სექტორს ნუ აბინძურებენ, _ აღნიშნა ივანიშვილმა რეგიონულ მედიასთნ შეხვედრისას.
