“ადრე ბოდიშის მოხდა არ გიჭირდათ ხოლმე, სამწუხაროა” _ ხიდაშელი ივანიშვილს

კახეთში რეგიონულ მედიასთან შეხვედრაზე ბიძინა ივანიშვილის განცხადებას, რომ "რესპუბლიკელებზე" საკუთარი აზრი უკვე გამოხატა და მათთან პინგ-პონგის თამაშს არ აპირებს, სოციალური ქსელით ეხმაურება „რესპუბლიკელების“ ერთ-ერთი ლიდერი თინა ხიდაშელი.

"1. ჩვენ არ დაგვიწყია;

2. შეურაცხყოფა არ მოგვიყენებია;

3. ანუ "შეფასებები უკვე გავაკეთე" არის პოზიცია _ ადრე ბოდიშის მოხდა არ გიჭირდათ ხოლმე, სამწუხაროა. მე კი პირობას გაძლევთ აუცილებლად მოიხდით ბოდიშს პატარა კაცისთვის, უღირსის და მსგავსი საძაგლობებისთვის, რომელიც იკადრეთ;

4. კითხვები არსებობსო _ დასვით, ბატონო ბიძინა, ოღონდ ვინმე უფრო გონიერს ჰკითხეთ რჩევა, ვიდრე იმას, ვინც საკონსტიტუციო კომისიაზე გირჩიათ, თორემ ისევ უკან დახევა მოგიწევთ;

5. პინგ-პონგი არა ამას უღირს უზრდელობებზე პასუხი ჰქვია. 6. ახლა არსობრივად _ ბევრი დავიჭირეთო, ნიუნბერგი არ იქნებაო, ხალხს ნაცმოძრაობა რომ არსებობს ეს აღიზიანებსო. ამას სისტემური დანაშაული ჰქვია, იმ ენაზე თქვენ რომ მიშასავით მასხარად აიგდეთ _ პროცედურების და კანონის ენაზე. 1, 5 ან 41 ინდივიდუალურად გასამართლებული არ ადასტურებს სისტემურობას თუ შესაბამისად არ გამოიძიეს და მოიკვლიეს. ამისათვის კი, რაც საჭიროა, იყო ჩემს 2012-2013 წლის იმაილებში ბევრი წერია და შეგიძლიათ, მოიძიოთ", _ წერს თინა ხიდაშელი.

„ჩემი აზრით, მე „რესპუბლიკური პარტიის“ ამომწურავი შეფასება გავაკეთე და ახლა პინგ პონგის თამაშის დრო არა მაქვს, რომ მაგათ ყველა განცხადებაზე პასუხი გავცე. მე ამომწურავად შევაფასე „რესპუბლიკური პარტია“ და საკმარისია. მათთან უამრავი, უფრო სერიოზული კითხვებია. პინგ-პონგის თამაში უნდათ და მე მაგისთვის არ მცალია. მაგათ მეტი საქმე არ აქვთ, როგორც ჩანს“, _ განაცხადა ბიძინა ივანიშვილმა რეგიონულ მედიასთან შეხვედრაზე.