საკრებულოს სხდომაზე

ავთანდილ მექვაბიშვილმა დღის წესრიგით გათვალისწინებული რვა საკითხი დამსწრე 25 დეპუტატს გააცნო და დასძინა, საკრებულოს თავმჯდომარე, შესაძლოა, შემოგვიერთდეს და თუ ვერ მოვა, სხდომას ჩვეულებრივი რეჟიმით წარვმართავთო.

დღის წესრიგით გათვალისწინებულ პირველ საკითხზე _ “ოზურგეთის მუნიციპალიტეტის 2012 წლის დამტკიცებულ ბიუჯეტში ცვლილებების და დამატებების შეტანის შესახებ”, კობა ხაბალაშვილმა ისაუბრა. მან თქვა, რომ საქართველოს მთავრობის განკარგულებით, “საქართველოს რეგიონებში ზოგიერთ ღონისძიებათა განხორციელების თაობაზე”, ოზურგეთის მუნიციპალიტეტს გამოეყო 1 500 000 ლარი შემდეგი პროექტების დასაფინანსებლად:

სოფელ დვაბზუ-ცხემლისხიდი-ფამფალეთი-ვაკიჯვრის გზის ასფალტო-ბეტონით კაპიტალური შეკეთება _ 830 000 ლარი;

დვაბზუ-მელექედური-სოფ. ოზურგეთის შემაერთებელი გზის მოხრეშვა-დაგრეიდერების სამუშაოების შესასრულებლად _ 150 000 ლარი;

ოზურგეთის სპორტული სკოლის შენობის რეაბილიტაცია _ 220 000 ლარი;

ოზურგეთში ფეხით მოსიარულეთა სავალი ნაწილის რეაბილიტაცია _ 67 000 ლარი;

ოზურგეთის მუნიციპალიტეტის ტერიტორიაზე (ურეკი, მაკვანეთი, ბოხვაური, მშვიდობაური, ჭანიეთი, ნარუჯა, სილაური) გზების სავალი ნაწილის ასფალტ-ბეტონით ორმული შეკეთება _ 195 500 ლარი;

საპროექტო-სახარჯთაღრიცხვო და ექსპერტიზის თანხა განისაზღვრა 37 500 ლარით.

კობა ხაბალაშვილმა ისაუბრა მეორე საკითხზეც: “ადგილობრივი გადასახადის შემოღების და მისი განაკვეთების შესახებ, ოზურგეთის მუნიციპალიტეტის საკრებულოს 2011 წლის 31 მარტის დადგენილებაში ცვლილების შეტანის შესახებ”, ოზურგეთის მუნიციპალიტეტის საკრებულოს დადგენილების დამტკიცების თაობაზე. ამ ცვლილებით, საწარმოსთვის, ორგანიზაციისთვის, ქონების გადასახადის წლიური განაკვეთია დასაბეგრი ქონების ღირებულების 1%. ქონების გადასახადისგან გათავისუფლდა საცხოვრებელ სახლებზე მიმაგრებული მიწის ნაკვეთი, რომლის ფართობი არ აღემატება 600 კვადრატულ მეტრს. ავტოფარეხებზე მიმაგრებული მიწის ნაკვეთები, რომლის ფართობი არ აღემატება 24 კვადრატულ მეტრს.

დანარჩენი საკითხები, რომლებიც შეეხებოდა სათამაშო ბიზნესის მოსაკრებლის შემოღების თუ 2012 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ საკითხებს, კობა ხაბალაშვილმა და ამირან გირკელიძემ ისაუბრეს. მშვიდობიანად ჩაიარა დანარჩენი საკითხების რამდენიმეწუთიანმა განხილვა-დამტკიცებამაც, რასაც დეპუტატებმა წყნარად უყარეს კენჭი. ბოლო საკითხის _ “ოზურგეთის მუნიციპალიტეტის საპრივატიზებო ობიექტების ნუსხის დამტკიცება” _ მოსმენის და დამტკიცების შემდეგ, ოპოზიციონერმა დეპუტატმა, ლელა ნაცვალაძემ განცხადების გაკეთება ითხოვა. ავთანდილ მექვაბიშვილმა შეახსენა, რომ სხდომა დამთავრებულია, თუმცა, უთხრა, რომ მოუსმენდნენ.

ლელა ნაცვალაძემ განაცხადა, რომ ვიდრე ოზურგეთში კოალიცია “ქართული ოცნების აქცია გაიმართებოდა, ორი დღით ადრე, საგადასახადო სამსახურის წარმომადგენლები ბაზარში მოვაჭრეებთან, გარემოვაჭრეებსა თუ ინდმეწარმეებთან დადიოდნენ და მათზე ზეწოლას ახდენდნენ _ ეუბნებოდნენ, რომ თუ 17 ივნისს “ქართული ოცნების” აქციაზე წავიდოდნენ, დააჯარიმებდნენ.

_ მოგეხსენებათ, საგადასახადო სამსახურის ფუნქცია რაც არის და როცა ისინი ადამიანებს ასე აშანტაჟებენ, მაშინ მე მოვითხოვ თქვენგან, როგორც საკრებულოს დეპუტატი, რომ ამ ადამიანთა უფლებები დაიცვათ. მე მაქვს ჩანაწერები, ჰაერზე არ ვლაპარაკობ, _ თქვა გაბრაზებულმა დეპუტატმა.

ავთანდილ მექვაბიშვილმა ეს სასაცილოდ მიიჩნია და გამოეპასუხა:

_ მეტი დარდი არ აქვს საგადასახადოს, ასეთი რაღაცებისთვის ირბინოს ქუჩაში. ჩვენს ქვეყანაში დემოკრატიაა და ვისაც სურს, წავა მიტინგზე, ვინ დაუშალათ, რა პრობლემაა?

ამ სიტყვებზე ზოგს ირონიულად გაეღიმა. კამათში ლაითურის მაჟორიტარი დეპუტატი, კობა ხაბალაშვილი ჩაერთო, ეს ჭორებია და ნუ იმეორებთო. ნაცვალაძის პასუხზე კი _ დროა, ვარდისფერი სათვალეები მოიხსნათო, ხაბალაშვილმა ნიშნის მოგებით უპასუხა, ვარდისფერი სათვალეები ხომ შენც გეკეთაო.

_ მე შევატყვე, რომ არ ვარგოდა და მოვიხსენიო, _ უპასუხა ნაცვალაძემ.

_ კი არ მოიხსენი, მოგხსნესო, _ ვალში არ დარჩა ხაბალაშვილი და განაგრძო:

_ მეც დამაბრალეს, თითქოს ხალხს არ ვუშვებდი მიტინგზე, მაგრამ მერე “მეცხრე არხმა” ბოდიში მომიხადა, _ თავიც კი მოიწონა ხაბალაშვილმა. ჯუმათის მაჟორიტარმა დეპუტატმა კი ზურგს უკან მიაძახა: “ეს პროვოკაციაა, ქალბატონო ლელაო” და დარბაზი დატოვა.

ამის შემდეგ ლელა ნაცვალაძეს ძიმითის მაჟორიტარი დეპუტატი, შალვა თავდიშვილი გაეპასუხა:

_ ეს არის ტყუილები, თქვენ და ოპოზიციას თუ ოპოზიციურ ძალებს გგონიათ, რომ ამ მიტინგებით რაღაც იმნაირი ხდება. არაფერიც არ ხდება, დღეს რომ მოინდომოს ოზურგეთის ხელისუფლებამ, შეუძლია, საღამომდე ოზურგეთში, აქ შეკრიბოს 30 ათასი კაცი, თორემ სამტრედიაში და იქით, ლანჩხუთში კი არა.

ამ რეპლიკას ქალბატონი ლელას კიდევ უფრო განრისხება მოჰყვა:

_ ეს თქვენ ამბობთ ამას? ვინ იყო, ნეტა, ათკაციან სიებს რომ აგროვებდა, ან პრეზიდენტი არ იყო, აჭარიდან რომ ოზურგეთში სტუდენტები ჩამოიყვანა და დააჯილდოვა? ეს ვინ, ნაციონალური მოძრაობა მელაპარაკება ხალხის გადაყვანა-გადმოყვანაზე, ძალით რომ ძლივს აგროვებენ ადამიანებს მის დასახვედრად?

გამწვავებული კამათის განეიტრალება კვლავ ავთანდილ მექვაბიშვილმა სცადა აწ უკვე ნათქვამი ფრაზით:

_ კაი, რა, დემოკრატიაა, ვის აინტერესებს ახლა, მიტინგზე ვინ დადის ან ვის უშლიან წასვლას?

ლელა ნაცვალაძემ კიდევ ერთხელ დაიმუქრა, არსებობს ჩანაწერი, რომ რასაც გეუბნებით, სიმართლეა და ყველაფერს პირად კონტროლზე ავიყვან, ადამიანთა უფლებებს არ შეგალახვინებთო.

ქრისტიან-დემოკრატმა კახა ღლონტმა გააკეთა განცხადება: _ სოფელ კონჭკათში, კატისციხის მისადგომებთან, გზა ჩამოიქცა და სასწრაფოდ გასაწმენდია, რადგან სოფელში გარდაცვლილია მცირეწლოვანი ბავშვი და ჭირისუფალს ხელი ეშლებაო.

ავთანდილ მექვაბიშვილმა ამაზე თქვა, ჩვენი საშუალებით რაც შეიძლება, გაკეთდეს, ყველაფერს ვიღონებთო.

და ამით სხდომა დასრულდა.