„თუ იმ მოდელს და იმ დამოკიდებულებებს გადმოვიტანთ, რაც არსებობდა „ნაციონალური მოძრაობის“ დროს, ვერც ხელფასები გაიცემოდა, ვერც პენსია დარიგდებოდა", _ ამის შესახებ ყოფილმა პრემიერ-მინისტრმა ბიძინა ივანიშვილმა რეგიონულ მედიასთან შეხვედრისას განაცხადა.
ბიძინა ივანიშვილმა ბიზნესმენებთან გამართულ შეხვედრაზე ისაუბრა და აღნიშნა, რომ დღევანდელ მთავრობას წინა ხელისუფლების მმართველობის მოდელი რომ გამოეყენებინა, ვერც ხელფასები და პენსიები დარიგდებოდა და დღეს მოქმედი ბიზნესმენებიდან არცერთი აღარ იქნებოდა ბიზნესში.
„თუ იმ მოდელს და იმ დამოკიდებულებებს გადმოვიტანთ, რაც არსებობდა „ნაციონალური მოძრაობის“ დროს, ვერც ხელფასები გაიცემოდა, ვერც პენსია დარიგდებოდა და რა თქმა უნდა, ამ ბიზნესმენებიდან, თქვენ დღეს არცერთი ბიზნესში აღარ იქნებოდით, პირდაპირ ვუთხარი იმ ბიზნესმენებს ვინც ესწრებოდა იქ და ვერცერთმა ხმა ვერ ამოიღო. მხოლოდ მერაბიშვილი, ადეიშვილი და შიდა ჯგუფები იკამათებდნენ თქვენი ქონების განაწილებაზე, მაგრამ თქვენგან არცერთი რომ ბიზნესმენი აღარ იქნებოდა, ეს თუ წარმოგიდგენიათ?ამას სათავე ჰქონდა აღებული, უკვე ერთმანეთში, ბიზნესში პაექრობა ჰქონდათ და დღეს იქნებოდა მხოლოდ ამ გუნდის წევრებს შორის პაექრობა და არა იმ ბიზნესმენებს შორის, ვინც საფუძველი ჩაუყარა და განავითარა ბიზნესი“,_ აღნიშნა ივანიშვილმა.
როგორც ივანიშვილმა აღნიშნა, შეხვედრაზე ერთ-ერთმა ბიზნესმენმა შევარდნაძისა და სააკაშვილის მართვის პერიოდი შეადარა და განაცხადა, რომ მიუხედავად არსებული კორუფციისა, ეკონომიკის განვითარებისთვის, შევარდნაძის პერიოდი იყო გაცილებით საინტერესო იყო.
"ისიც ცუდი იყო. მაგრამ არის ცუდი და უარესი. ხშირად არჩევანს აკეთებენ ცუდსა და უარესს შორის, კარგსა და უკეთეს შორის არჩევანი ყოველთვის უფრო კარგია, მაგრამ ხშირად ხდება, არჩევანის და ანალიზის გაკეთება ცუდსა და უარეს შორის. მაშინ უფრო თავისუფალი იყო გარემო, ბევრ ხალხზე ნაწილდებოდა ის ფული. ის კორუფციული ფული, რაც ვერ გროვდებოდა და ძალიან ცუდი იყო, სახელმწიფოს ერთ-ერთი ფუნქცია დარღვეული იყო, ბიუჯეტი ვერ ივსებოდა და ის საბაჟოსა და საგადასახადოში ნაწილდებოდა ძირითადად, ეს ცუდი იყო, რა თქმა უნდა, ამის შექება როგორ შეიძლება, სახელმწიფოს ერთ-ერთი ძირითადი ფუნქცია ირღვეოდა. შევარდნაძის პერიოდში ბიზნესიც კი ისე არ კონტროლდებოდა, მაგრამ "ნაცებმა" რომ ისწავლეს მოგროვება და ყველა ჯიბეში ჩაძვრნენ და თვითონ ისწავლეს ამის გადანაწილება, ეს უარესი იყოს მასზე",_ აღნიშნა ივანიშვილმა.
