22 ივნისს, ოზურგეთის ქუჩებში, კერძოდ, “ჭადრების ბაღში”, ავტომობილი გამოჩნდა, რომელმაც, იმავე ბაღში მყოფთა განმარტებით, რამდენადმე წამის განმავლობაში, უფრო მოქალაქეები “დააბოლა” სპეციალური ორთქლით, ვიდრე თეთრი პეპელა დააფრთხო.
როცა ფოტოაპარატით ხელში შეგვნიშნეს, მანქანა შეჩერდა, შიგ მსხდომთაგან ერთ-ერთი გადმოვიდა და გვკითხა, რაშია საქმე, რა ხდებაო?
_ ჩვენ უნდა გკითხოთ, რა ხდება და თქვენ გვეკითხებით? ვის ვესაუბრები?
_ არაა საჭირო.
_ პასუხისმგებელი პირი ვინ არის დღეს და თქვენ ვინ ბრძანდებით, ეს საიდუმლოა?
_ არაა საჭირო.
_ შეგიძლიათ, გვითხრათ, რა მოცულობის ტერიტორია უნდა შეწამლოთ ოზურგეთში?
_ ეს ამინდზეა დამოკიდებული.
_ დღეს მშვენიერი, მზიანი ამინდია, რა გიშლით ხელს?
_ ძალიან სიცხეშიც არ შეიძლება შეწამვლა.
_ რატომ, პეპელას აწყენს?
_ კი.
_ დღეს სოფელ ჭანიეთში იმყოფებოდა ასეთი მანქანა და უკვე დამირეკეს გაბრაზებულმა ადამიანებმა _ ცენტრალური გზის შემდეგ, მხოლოდ ერთ “შუკაში” შევიდა და ცალკეული უბნებისკენ საერთოდ არ წასულა ორთქლი, ეს რა შეწამვლა იყოო.
_ ვიცით ეგ, იქ ქარმა სხვა მხარეს გადაიტანა, უბერავდა და თავიდან შევწამლავთ.
_ მოსახლეობა ამბობს, რომ წამალი აღარ ეყოთ და მალე წავიდნენო.
_ ასე არ არის.
მიუხედავად ხელმეორედ თხოვნისა, მანქანის მძღოლმა და მანქანაში მყოფმა პირებმა, არც ვინაობა გვითხრეს და არც ის დაგვიკონკრეტეს, სად და რა მოცულობის ტერიტორია უნდა შეეწამლათ, მხოლოდ ეს დაგვიბარეს, დღეს რედაქციაში მოვალთო და სასწრაფოდ გაეცალნენ იქაურობას.
“ჭადრების ბაღში” მყოფმა ადამიანებმა ერთმანეთს გადაულაპარაკეს: _ ამათ უყურებ? კი არ წამლავენ, კუკუდამალობანას ეთამაშებიან პეპლებს. მოდიან, ასხურებენ და მერე ყვირიან, გადადითო. არ შეიძლება, გააფრთხილონ ხალხი, როცა ასეთ ღონისძიებას აპირებენ?
“გურია ნიუსი” სოფელ ჭანიეთის რწმუნებულს დაუკავშირდა და ჰკითხა, რა მასშტაბით მოხდა იქ მწვანე საფარის შეწამვლა.
დათო მჟავანაძემ განმარტა, რომ 22 ივნისს მართლაც მოხდა სპეციალური მანქანით შეწამვლა: _ შემდეგ, როცა წამალი გაუთავდათ, ოზურგეთში დაბრუნდნენ. “სოლო” აპარატებით კი სოფელში კვლავ გრძელდება შეწამვლა, სპეციალური ჯგუფი მხოლოდ შაბათს შეისვენებს და კვირას კვლავ გააგრძელებენ მუშაობას, _ გვითხრა მჟავანაძემ.
როგორც დღის ბოლოს დავადგინეთ, ჭანიეთში მანქანა აღარ მიბრუნებულა, არც რედაქციაში გამოჩენილა აღნიშნული პიროვნება. ბოლოს სურსათის უვნებლობის, ვეტერინარიისა და მცენარეთა დაცვის სამსახურის უფროსს, კახა თავბერიძეს მივმართეთ:
_ ბატონო კახა, დღეს ქალაქის რომელ ქუჩებში ხდება მწვანე საფარის შეწამვლა?
_ მიმართეთ პრესსამსახურს.
_ დღეს ერთ სოფელში წამალი გაუთავდათ და იქ აღარ მიბრუნებულან.
_ მიმართეთ პრესსამსახურს.
_ აქვე ხართ, ოზურგეთში და წამალი რომ შემოგელიათ, ამის თაობაზე თბილისში პრესსამსახურს მივმართო?
_ მიმართეთ პრესსამსახურს, _ უკვე მესამედ გაიმეორა პეპლებთან მეომარმა თავბერიძემ და ამჯერად ტელეფონი გაგვითიშა.
როგორც ჩვენთვის არა ერთხელ უთქვამთ პეპლებით თავმობეზრებულ ადამიანებს, პროფესიით მეტყევე თავბერიძე გუბერნატორის მოადგილის, ლელა თავართქილაძის სიძეა და სურსათის უვნებლობის, ვეტერინარიისა და მცენარეთა დაცვის სამსახურის უფროსის ადგილი, არც ისე დიდი ხანია, რაც კლანური “ობშიაკით” ხვდა წილად. ალბათ, ამიტომაცაა ასე გაგულდიდებული.
ოზურგეთში ყველას კარგად ახსოვს, რა დღეში აგდებდა პეპლებით თავმობეზრებული ლელა თავართქილაძე მცენარეთა დაცვის სამსახურის ადრინდელ უფროსს, ლალი გოგუაძეს, აქაოდა, შემჭამა მავნებელმა, ჩქარა მანქანა მომაშველეთო!
