პარალელურად, ხალხმრავლობა იყო პოლიციის ადგილობრივ სამმართველოში. დღის მანძილზე ვრცელდებოდა არაერთი ინფორმაცია სტუმრების ვინაობის შესახებ. როგორც ამბობდნენ, პოლიციის ოფისს თვით ვანო მერაბიშვილი სტუმრობდა. ჩვენი წყაროს ინფორმაციით, შს მინისტრი ლანჩხუთს გასაიდუმლოებულ ვითარებაში ეწვია _ ასევე დაუდასტურებელი ინფორმაციით, მას სიები მოუთხოვია, თუ ვინ იმყოფებოდა ოზურგეთში გამართულ აქციაზე და ადგილობრივი ჩინოსნებისთვის პასუხი მოუთხოვია აქციაში მონაწილეთა დიდი რაოდენობის გამო. ამას მოჰყვა ინფორმაცია, რომელიც არა მარტო ქალაქს, სოფლებსაც მოედო _ ამ ხმების მიხედვით, თანამდებობიდან გაათავისუფლეს ლანჩხუთის გამგებელი გიორგი გოგუაძე. ეს ინფორმაცია მეტად დამაინტრიგებელი და უნდა ითქვას, საეჭვო გახლდათ _ ძნელია, ხელისუფლება ასე იოლად შეელიოს იმ გამგებელს, რომელიც საარჩევნოდ განსაკუთრებით სჭირდება. გია გოგუაძე სწორედ “მაგარი ხელისა” და არჩევნების “ნაციონალურად” მოგების დიდ მცოდნედ მიიჩნევა.
ჩვენ პარალელურ რეჟიმში ოფიციალურ სტრუქტურებში ვცდილობდით ინფორმაციის გადამოწმებას, მაგრამ იგი არავინ დაგვიდასტურა, მეტიც, სახელისუფლო კულუარებში ყოველივე “ქართული ოცნების” აუხდენელ ოცნებად მიიჩნიეს და ჭორების გავრცელებაც კოალიციის ადგილობრივ ოფისს დაბრალდა.
ლანჩხუთის პარალელურად, ანალოგიური ხმები ოზურგეთზეც გავრცელდა _ იქ თანამდებობიდან ასევე გამგებელი ილია ვაშაყმაძე “გაათავისუფლეს”. თითქოს, მას უკვე ადგილზე, ოზურგეთში შეკრებილი ადგილობრივების გამო მოსთხოვეს პასუხი. ერთი საინტერესო დეტალიც _ როცა ლანჩხუთის გამგებლის გათავისუფლების შესახებ ხმები ვრცელდებოდა, გურიის გუბერნატორი მოადგილესთან ერთად ამავე ქალაქში მოსახლეობას ხვდებოდა.
“ეს არის ჭორი, არც ერთი გამგებელი არავის მოუხსნია და არც იგეგმება. ხელისუფლება არ თვლის, რომ ოზურგეთის შეხვედრაზე ბევრი ადამიანი მივიდა და რაიმე საფუძველი არსებობდეს, რომ რეგიონში მმართველი პარტია გავლენებს კარგავს. ან რატომ გადატეხდნენ ჯოხს მხოლოდ გამგებლებზე, თუ რაიმე საერთოდ იგეგმება? მაშინ პასუხს საკრებულოს თავმჯდომარეებსა და სამხარეო ადამინისტრაციასაც მოთხოვენ. ჩვენ კი ვიცით, რომ ხელისუფლებამ ადგილობრივებს მადლობა გადაუხადა, ამაზე მეტი “მეოცნებე” რომ არ აღმოჩნდა გურიაში გამართულ აქციაზე და მუშაობის ასევე გაგრძელება მოთხოვეს,” _ ამბობენ ჩვენი სახელისუფლო წყაროები.
ასეთი უარყოფის მიუხედავად, მთელი დღის მანძილზე, თვით ხელისუფლებაში მყოფი ადამიანებიც კითხულობდნენ, მართლა მოხსნეს თუ არა გამგებლები.
თუმცა, დღე ისე დასრულდა, რომ არც მიხეილ სააკაშვილი ჩამოსულა, არც ვანო მერაბიშვილის ვიზიტი დაადასტურეს ოფიციალურად და გამგებლებმაც თანამდებობები შეინარჩუნეს.
ჩვენ კომენტარისთვის გურიაში “ქართული ოცნების” ერთ-ერთ ლიდერს, სოსო ბოლქვაძეს დავუკავშირდით:
_ ბატონო სოსო, რას იტყვით გავრცელებულ ინფორმაციაზე, რომლის თანახმად თქვენი მხარდამჭერების რაოდენობის გამო ხელისუფლებაში შიგა გარჩევები მოხდა?
_ ვერაფერს გეტყვით. ის კი ფაქტია, რომ პრეზიდენტს შუხუთში ელოდნენ და არ ჩამოსულა. მე არავისი ცუდი და მოხსნა არ მინდა და ნაწყენიც დავრჩი, თუ ამის გამო ვინმეს სამსახურიდან უშვებდნენ. ათასნაირი ჭორი გავრცელდა _ თითქოს პოლიციაში შს მინისტრმა დაიბარა, პასუხი მოითხოვა… ეს კი არა, ისიც ითქვა _ სტადიონთან ჩაიყვანეს, ცხვირ-პირშიც მოხვდათო და ასეთები. ვერ ვხვდები, ვის და რაში დასჭირდა ამ ინფორმაციების გავრცელება.
_ სახელისუფლო კულუარებში ფიქრობენ, რომ ჭორები თქვენმა კოალიციამ გაავრცელა…
_ არა, გამორიცხულია! ჩვენც გარედან გავიგეთ. სიმართლე გითხრათ, ეს ინფორმაცია პოლიციიდან გამოვიდა, მიიტანეს ხმები ქალაქის მერიაში და იქიდან გავრცელდა. ჩვენ რა შუაში ვართ?
სულ ბოლოს ის ინფორმაციაც გავრცელდა, რომ მიხეილ სააკაშვილის ლანჩხუთში ჩამოუსვლელობის მიზეზი მისი შეუძლოდ გახდომა გახდა, რის შემდეგაც მას ჰოსპიტალიზაცია დასჭირდა. თუმცა, პრეზიდენტის ადმინისტრაციამ ეს ინფორმაცია კატეგორიულად უარყო. არადა, რაღაც მიზეზი უნდა ყოფილიყო, თორემ ვიზიტის ჩაშლას ნამდვილად ვერ “გაამაგრებს” და სასაცილოა ვერსია, თითქოს პრეზიდენტს სიმართლეს უმალავდნენ და გურული “მეოცნებეების” ზუსტი რაოდენობა რომ გაიგო, ვიზიტი გადაიფიქრა. ჩვენი კარგად ინფორმირებული წყაროს თქმით, სწორედ პრეზიდენტის ვიზიტის მოულოდნელი ჩაშლის გადასაფარად გავრცელდა ხმები გამგებლების გათავისუფლების შესახებ.
