"გურია ნიუსისა" და არასამთავრობო ორგანიზაცია "POST ალიონის" ერთობლივი პროექტის _ "მონოლოგიდან _ დიალოგამდე", ფარგლებში, არჩევნებამდე ზუსტად 5 დღით ადრე, სტუდიაში ლანჩხუთისა და ჩოხატაურის #60 ოლქში რეგისტრირებული კანდიდატები მათ მხარდამჭერებთან ერთად მოვიწვიეთ და დიალოგის ფორმატში შევეცადეთ, ისინი ამომრჩევლებისთვის უკეთ გაგვეცნო.
გურამ ჩალაგაშვილი _ საარჩევნო ბლოკი "პაატა ბურჭულაძე _ სახელმწიფო ხალხისთვის"; თამილა ჟღენტი _ პროგრესულ – დემოკრატიული მოძრაობა ("თქვენგან, თქვენთვის, თქვენთან ერთად!"); ნინო კვიტაიშვილი _ საარჩევნო ბლოკი "ერთიანი ნაციონალური მოძრაობა"; გურანდა მანაგაძე _ საარჩევნო ბლოკი "დავით თარხან – მოურავი, ირმა ინაშვილი _ საქართველოს პატრიოტთა ალიანსი, გაერთიანებული ოპოზიცია"; ტარიელ კალანდარიშვილი _ "შალვა ნათელაშვილი _ საქართველოს ლეიბორისტული პარტია"; ამირან ჭაღალიძე _ საარჩევნო ბლოკი "თოფაძე _ მრეწველები, ჩვენი სამშობლო" ამირან ჭაღალიძე; ნინო წილოსანი _ "ქართული ოცნება _ დემოკრატიული საქართველო" ; დავით ჟღენტი _ დამოუკიდებელი დეპუტატობის კანდიდატი _ ეს ის კანდიდატები არიან, რომლებიც გადაცემაში მოვიდნენ.
#60 ოლქში რეგისტრირებული ორი კანდიდატი _ ლაშა ჯიბლაძე ბლოკიდან "კახა ძაგანია, სოსო შატბერაშვილი, პაატა ჯიბლაძე, არჩილ ბენიძე _ მემარცხენე ალიანსი" და დამოუკიდებელი დეპუტატობის კანდიდატი აკაკი ჩხაიძე გადაცემაში არ მოვიდნენ _ ჯიბლაძემ არმოსვლის მიზეზად ჯანმრთელობის მდგომარეობა დაასახელა, ხოლო ჩხაიძემ, გადაცემის დაწყებამდე რამდენიმე საათით ადრე შეგვატყობინა, რომ მნიშვნელოვან შეხვედრაზე მიდიოდა.
გადაცემის პირველი ბლოკი კანდიდატების წარდგენას და ერთმანეთში კითხვა-პასუხს ითვალისწინებდა. საკუთარი თავის წარსადგენად და კითხვაზე _ რატომ უნდა დაუჭირონ მას მხარი, პასუხის გასაცემად თითოეულ კანდიდატს 1 წუთი მიეცა.
გურამ ჩალაგაშვილი: _ მე გახლავართ დეპუტატობის კანდიდატი ლანჩხუთი-ჩოხატაურის მაჟორიტალურ ოლქში პარტია "პაატა ბურჭულაძე " სახელმწიფო ხალხიდან". რატომ უნდა დაგვიჭიროს ამომრჩეველმა მხარი? _ იმიტომ საქართველოს მოსახლეობის 80 % დაუსაქმებელია, იმიტომ, რომ არაფერი კეთდება ქვეყანაში, იმიტომ, რომ ადამიანების, დაახლოებით, 55% შიმშილობის ზღვარზეა _ ეს ყველაფერი უნდა შეიცვალოს, ქვეყანამ უნდა დაასრულოს უკუსვლა და ჩვენს გუნდს შესწევს უნარი, აქვს გამოცდილება, რომ ქვეყანა ამ ჭაობიდან ამოიყვანოს.
თამილა ჟღენტი: _ ჩვენი პარტიის წარმომადგენლები დიდი ხანია პოლიტიკაში არიან. ეს არის ეროვნულ საფუძვლებზე დაყრდნობილი პარტია, რომელსაც გააჩნია დიდი რესურსი პარლამენტში მოღვაწეობისთვის. ჩვენ მოვდივართ პარლამენტში არა სკამების დასაკავებლად, არამედ გამზადებული პროდუქტით _ ჩვენ გვაქვს 22 კანონპროექტი, რომელიც დიდი ხანია დევს თაროზე. თუ ჩვენს პროგრამას წაიკითხავთ, თუ ამ კანონპროექტებს გადახედავთ, დაინახავთ, რომ ჩვენი პარტია ცდილობს ქვეყანა გაჭირვებიდან ამოიყვანოს.
ნინო კვიტაიშვილი: _ ჩემთვის დიდი პატივია, კენჭს ვიყრიდე ოლქში, სადაც დავიბადე და გავიზარდე. მე წარმოვადგენ "ერთიან ნაციონალურ მოძრაობას" _ ერთადერთ პოლიტიკურ ძალას, რომელსაც შესწევს უნარი ქვეყანა იმ დუხჭირი, იმ შეჭირვებული ყოფიდან გამოიყვანოს, რომელშიც ამ ოთხი წლის განმავლობაში ჩავარდა. დღეს შეჩერებულია ყველა ის პროექტი, რომელიც ქვეყნის განვითარებას ემსახურებოდა ან უბრალოდ, ძალიან ცუდად არის გაგრძელებული. შესაბამისად. ხელისუფლება, რომელმაც 4 წლის განმავლობაში გამოავლინა სრული უნიათობა და უუნარობა, უნდა შეიცვალოს იმ პოლიტიკური ძალით, რომელსაც შესწევს უნარი, ქვეყანა ისევ წინსვლის გზაზე დააბრუნოს და გააგრძელოს აღმშენებლობითი საქმიანობა.
გურანდა მანაგაძე: _ პროფესიით იურისტი და სამი შვილის დედა ვარ. ჩვენი პარტია ტრადიციებზეა დამკვიდრებული თავისი პროგრამით და გეგმებით. ჩვენი ერთ-ერთი მიზანი გახლავთ, რომ პარლამენტი გავხადოთ მრავალპარტიული. წინააღმდეგ შემთხვევაში, შეუძლებელი იქნება იმ ჭაობიდან ამოსვლა, რომელშიც ჩვენი ქვეყანა იმყოფება. პრობლემები მრავალმხრივია _ როგორც ეკონომიკური, ისე _ სამართლებრივი. ჩვენ გვაქვს სტრატეგიული გეგმა იმ სიღატაკიდან ამოსასვლელად, რომელშიც ცხოვრობს მოსახლეობის 70%.
ტარიელ კალანდარიშვილი: _ ჩვენი პარტია 1995 წლიდან ფუნქციონირებს. ჩვენ საზოგადოებას ყოველთვის სიმართლეს ვეუბნებოდით და ამის გამო ხშირად გავკიცხულვართ კიდეც, მაგრამ სიმართლეს ერთი გზა აქვს. მსგავსი სიტუაცია იყო ქვეყანაში 2003 წელს, ე. წ. "ვარდების რევოლუციის" დროს და 2012 წელს, როცა ოლიგარქი მოდიოდა ხელისუფლებაში _ ჩვენ ვაფრთხილებდით საზოგადოებას, რომ ის მოლოდინი, რომელიც ჰქონდათ და გულწრფელად მიანდეს საკუთარი ხმა ბატონს და მის გუნდს, არ გამართლდებოდა. ჩვენი მთავარი პრიორიტეტი სოციალური თემატიკაა; ასევე, გვაქვს დაბალანსებული, გათვლილი, მკაცრი, მაგრამ ძალიან კორექტული საგარეო პოლიტიკა.
ამირან ჭაღალიძე: _ პროფესიით ვარ იურისტი. გახლავართ თადარიგის ვიცეპოლკოვნიკი. დაჯილდოებული ვარ მრავალი მედლით. მყავს მეუღლე, 3 შვილი, ორი შვილიშვილი.
ნინო წილოსანი: _ წარმოვადგენ "ქართულ ოცნებას" _ გუნდს, რომელთან ერთადაც თქვენ იბრძოლეთ 2012 წელს იმისთვის, რომ დაგვებრუნებინა ადამიანების უფლებები, აღგვედგინა თქვენი თავისუფლება; ვართ გუნდი, რომელიც მომდევნო 4 წელს დაუთმობთ იმას, რომ ქვეყანა განვითარდეს სწრაფად და თითოეულ ჩვენგანს ჰქონდეს კეთილდღეობა. დარწმუნებული ვარ, რომ "ქართული ოცნება" და ნინო წილოსანი გაიმარჯვებს იმიტომ, რომ თქვენთან ერთად ვემსახურებით ერთ იდეას _ ეს იდეა არის ქვეყნის სწრაფი განვითარება.
დავით ჟღენტი: _ წარმოშობით ვარ ჩოხატაურელი. ორგზის ვიყავი არჩეული პარლამენტში ჩოხატაურიდან. აქედან გამომდინარე, ძალიან კარგად და ღრმად ვიცნობ იმ პრობლემებს, რომლებიც გურიაში და საქართველოშია. ამჟამად უპარტიო ვარ და ჩემთვის საინტერესოა ამ კუთხით მოღვაწეობა _ არ ვარ პარტიული მარყუჟებით შეკრული და ეს თავისუფლება იძლევა საშუალებას, რომ ჩემი ხედვა, ჩემი პროფესიონალიზმი, ჩემი გამოცდილება სხვა კუთხით წარმოვაჩინო.
საკუთარი თავის წარდგენის შემდეგ კანდიდატებს საშუალება მიეცათ, ერთმანეთისთვის კითხვები დაესვათ და პასუხები მიეღოთ. პირველი შეკითხვის დასმის უფლება, რეგისტრაციის ნომრების შესაბამისად, გურამ ჩალაგაშვილს ერგო, რომელმაც შეკითხვა გურანდა მანაგაძეს დაუსვა:
_ ქალბატონო გურანდა, თქვენ ხართ "პატრიოტთა ალიანსის" კანდიდატი, თუმცა, არავისთვის დამალული არ არის, ის გუნდი, რომელსაც თქვენ წარმოადგენთ, აკაკი ჩხაიძის მხარდამჭერები არიან, დაყვებიან მათ შეხვედრებზე, დაკავებულები არიან მისი აგიტაციით და ამის ამსახველი ვიდეომასალაც შემიძლია წარმოგიდგინოთ. თქვენ თუ ფლობთ ამის შესახებ ინფორმაციას და მაინტერესებს, თქვენ ხართ კანდიდატი კანდიდატობისთვის,თუ რა ხდება?
გურანდა მანაგაძე: _ კანდიდატი კანდიდატისთვის ნამდვილად არ ვარ, რადგან ჩვენ ძალიან აქტიურ შეხვედრებს ვატარებთ მოსახლეობასთან. ერთი ნიუანსია, რომლის შესახებაც შეიძლება თქვენ არ იცოდეთ _ დაახლოებით, 8 თვის წინ მიდიოდა მოლაპარაკება აკაკი ჩხაიძესთან იმის თაობაზე, რომ გამხდარიყო კანდიდატი ჩვენი პარტიიდან, თუმცა, მოლაპარაკება არ შედგა და მან დამოუკიდებლად გადაწყვიტა კენჭისყრა. თუმცა, იმდენად დიდხანს გაგრძელდა ამ თემის განხილვა, რომ ჩვენი წევრების რაღაც ნაწილმა ჩხაიძის მხარდამჭერი ღონისძიებების გატარება დაიწყო. შემდგომ, როცა ხელმძღვანელობამ გადაწყვიტა, რომ მაჟორიტარი კანდიდატი უნდა დაგვეყენებინა, წამომაყენეს მე, _ აღნიშნა მანაგაძემ და კითხვით ნინო წილოსანთან გადავიდა:
_ ქალბატონო ნინო, აქ საარჩევნო გარემოზე იყო საუბარი და გურამ ჩალაგაშვილმაც აღნიშნა, რომ მიმდინარეობს ზეწოლები. მსგავსი ფაქტები ჩვენც გვაქვს და არათანაბარ პირობებში გვიწევს ბრძოლა. აშკარაა ადმინისტრაციული რესურსის გამოყენება _ შვებულებაში გასული გამგებლები, საკრებულოს თავმჯდომარეები და საჯარო მოხელეები აქტიურად გეხმარებიან. ამ გადმოსახედიდან, ეთანხმებით თუ არა იმ მოსაზრებას, რომ ადმინისტრაციული რესურსის გამოყენება ხდება და თუ არ ეთანხმებით, მაშინ რით ახსნით იმ ფაქტს, რომ ლანჩხუთის მოქმედი გამგებელი ზაზა ურუშაძე თქვენი შტაბის უფროსია? _ მიმართა წილოსანს მანაგაძემ.
ნინო წილოსანი: _ ნამდვილად არ ვიცი კონკრეტული ციფრი, თუ რამდენი ადამიანი მეხმარება ადმინისტრაციული ერთეულებიდან. მადლობელი დავრჩები თუ საქმის კურში ჩამაყენებთ _ მადლობას გადავუხდი ამ ადამიანებს. რაც შეეხება ბატონ ზაზას, იგი იზიარებს ჩვენი პარტიის ფუნდამენტურ იდეებს, არის ჩვენი გუნდის წევრი. მას სრული უფლება აქვს, იყოს "ქართული ოცნების" საარჩევნო შტაბის უფროსი და თავისთავად, მედგეს გვერდით, _ თქვა წილოსანმა, რომელმაც შეკითხვა დავით ჟღენტს დაუსვა:
_ ბატონო დავით, თქვენ ხართ დამოუკიდებელი კანდიდატი. როგორ წარმოგიდგენიათ იმ პირობებში მუშაობა პარლამენტში, როდესაც "ქართული ოცნება" იმარჯვებს დიდი უპირატესობით? რამდენად შეძლებთ მმართველი პარტიით დაკომპლექტებულ მთავრობაში მიიტანოთ ის პრობლემები, რომლებიც აწუხებს რეგიონს და რეალურად გაატაროთ ის პოლიტიკა, რასაც გვპირდებით? _ დაინტერესდა წილოსანი.
დავით ჟღენტი: _ რაკი დამოუკიდებლად ვიყრი კენჭს, ეს ნიშნავს, რომ უფრო თავდაჯერებული ვარ. ჩემი სიტყვა, ჩემი შრომით მიღწეული და მოგვარებული საქმეები ჩემზე ილაპარაკებენ და ეს არ ეხება მხოლოდ წარსულს _ მე გამაჩნია საკმაოდ დიდი რესურსი, რითაც შემიძლია პრობლემების მოგვარება. თქვენ დაპირებებს იძლევით პარტიული ინტერესებიდან გამომდინარე. მსგავსმა დაპირებებმა ორჯერ ჩამაყენა უხერხულ მდგომარეობაში, რადგან, როცა პარტია ვერ ასრულებს დანაპირებს, პასუხს მაჟორიტარს სთხოვენ. თქვენი გამარჯვების შემთხვევაში, ყველა დარტყმა და სიმძიმე თქვენზე გადმოვა, _ აღნიშნა დავით ჟღენტმა და შეკითხვა წილოსანს დაუბრუნა:
_ როცა თავდაჯერებული ხართ, რომ აუცილებლად გაიმარჯვებთ, როცა თავდაჯერებული ბრძანდებით, რომ კონკურენტი არ გყავთ გურიის სიყვარულში, მე ამით თავს შეურაცხყოფილად ვგრძნობ, რადგან წლების განმავლობაში გურიაში ვცხოვრობ და აქ ბევრი რამე მიკეთებია. მიუხედავად იმისა, რომ ქალბატონი ბრძანდებით, უხერხულია ასეთი პრეტენზია გქონდეთ გურულების არა კონკურენტუნარიანობაზე. რაც შეეხება კონკრეტულ კითხვას, რომ აქტიურად იყენებთ სახელისუფლებო რესურსს, ამას ბევრი ფაქტი მოწმობს. თუნდაც ის, რომ სილაურში თქვენი მისვლის შემდეგ მოიხრეშა გზები. ზოტში თქვენი ყოფნის შემდეგ, ჩემს გაკრულ დაფაზე გაიკრა თქვენი ბანერი. ხომ არ ფიქრობთ, რომ ეს ადმინისტრაციული რესურსი გარკვეულ მომენტში თქვენს საწინააღმდეგოდ მუშაობს? _ ჰკითხა წილოსანს ჟღენტმა, რომელსაც თავისი სიტყვების დასტურად სტუდიაში ფოტოებიც ჰქონდა მოტანილი.
ნინო წილოსანი: _ რატომ არ მყავს კონკურენტი გურიის სიყვარულში? მიუხედავად იმისა, რომ არ დავბადებულვარ ლანჩხუთში, ჩემი ოჯახი ლანჩხუთიდანაა და ბავშვობა იქ მაქვს გატარებული. მეამაყება, რომ ჩემი ოჯახი მუდმივად იდგა გურულების გვერდით. რამდენიმე წლის განმავლობაში ვხელმძღვანელობდი საოჯახო ფონდს, რომლის პრიორიტეტი გურიაში გასახორციელებელი პროექტები იყო. ამიტომ ნამდვილად არ მივიღებ მოსაზრებას, რომ არ შემიძლია შეგეცილოთ გურიის სიყვარულში. რაც შეეხება გზების გაკეთების საკითხს _ ამის გამო მადლობას გადავუხდი მუნიციპალიტეტებს, რადგან კარგად მუშაობენ. თუმცა, ნამდვილად არ მაქვს უფლებამოსილება, ჩავერიო მიმდინარე საქმიანობაში. გპირდებით, როდესაც ვიქნები დეპუტატი, დეტალურად გავივლი ამ საკითხებს. რაც შეეხება პლაკატების თემას, გულისწყვეტით მოვედი სტუდიაში, რადგან ჩემი ყველა პლაკატი ჩამოხეულია და მის ადგილზე თქვენი პლაკატებია გაკრული. სამწუხაროდ, ამ პროცესებს ნამდვილად ვერ ვაკონტროლებ, _ თქვა წილოსანმა.
შემდეგი შეკითხვა თამილა ჟღენტმა ნინო კვიტაიშვილს დაუსვა: _ ჩემი პარტია ყველას მიმართ ლიბერალურია, მაგრამ, როდესაც თქვენი წარდგენისას მოვისმინე სიტყვები, რომ ქვეყნის ამოყვანა შეგიძლიათ ჭაობიდან, გამიკვირდა _ ეს ჭაობი ოთხ წელიწადში შეიქმნა? ხომ არ ფიქრობთ, რომ იგი იმ უფსკრულში გაჩნდა, რომელიც თქვენმა პარტიამ შექმნა 9 წლის განმავლობაში? _ დაინტერესდა ჟღენტი.
ნინო კვიტაიშვილი: _ პრობლემები არსებობდა იმ პერიოდშიც, როდესაც ხელისუფლებაში "ნაციონალური მოძრაობა" იყო. თუმცა, თქვენ კარგად უნდა გახსოვდეთ, როგორი ქვეყანა ჩაიბარა "ნაციონალურმა მოძრაობამ". ჩვენი პარტიის ხელისუფლებაში ყოფნის დროს მთავარი ამოცანა იყო იმ სოციალური პრობლემების დაძლევა, იმ ინფრასტრუქტურული საკითხების მოგვარება, რომელიც ქვეყნის წინაშე იდგა. ამის გარდა, ბევრი პრობლემა იყო _ კორუფცია, კრიმინალი და ეს საკითხებიც მოგვარდა. დღეს, ხედავთ, ამ კუთხით რა მდგომარეობაა _ გუშინ, ერთ-ერთი კანდიდატი კინაღამ მოკლეს. ჩვენი მთავარი მიზანი სიმშვიდე და მოსახლეობის კრიმინილისგან დაცვაა, რომელიც ამ ოთხწლიან პერიოდში გაიზარდა; მოჭარბდა სოციალური პრობლემები და ქვეყანა ვეღარ ვითარდება. სწორედ ამიტომ ვამბობთ, რომ ჭაობში ვართ და ჩვენ პარტიას შეუძლია ამ ჭაობიდან ამოსვლა, _ თქვა კვიტაიშვილმა და შეკითხვა წილოსანს დაუსვა:
_ მას შემდეგ, რაც ჭკუასელი ჩაანაცვლეს, "ორი ნინო _ ერთ მარათონში" ეჭვებს ბადებს. რაც შეეხება კონკრეტულ კითხვას _ მოგეხსენებათ, რომ ხელისუფლება სამი შტოსგან შედგება. ერთ-ერთ შტოში _ საკანონმდებლო ორგანოში აპირებთ ადგილის დაკავებას მაშინ, როცა პროკურატურა გედავებათ 65 მილიონი ლარის მითვისებაში და ამ საქმეს განიხილავს სასამართლო. როგორ ფიქრობთ, თუ თქვენ გახდით ხელისუფლების ერთი შტოს წარმომადგენელი, ხელისუფლების ორი შტო დაუპირისპირდება ერთმანეთს და სასამართლო ობიექტურ გადაწყვეტილებას მიიღებს, როცა 65 მილიონის მითვისებაზე მიდის დავა? _ თქვა კვიტაიშვილმა.
ნინო წილოსანი: _ უპირველეს ყოვლისა, ჩემ თავს არ ვაკადრებ, გავაიგივო ჩემი პიროვნება თქვენთან და გირჩევთ, თქვენც თქვენს პიროვნულობას ნუ დააიგნორებთ. რაც შეეხება თქვენს კითხვას, დავიწყებ იმით, რომ თქვენგან არ მოველოდი ამ შეკითხვას, რადგან 2004 წელს "ნაციონალურმა მოძრაობამ" დაიჭირა მამაჩემი და ციხეში, ჩუქების წესით, გადააფორმებინა 100 მილიონი ლარის ქონება. ამიტომ, მგონი, მორალური უფლება არ გაქვთ, თქვენი პარტიული წარმომავლობიდან გამომდინარე, ეს კითხვა დამისვათ. რაც შეეხება ჩემი კამპანიის წინააღმდეგ წარმოებულ საქმეებს, ეს პროცესი რამდენიმე წელია, მიმდინარეობს და სასამართლოს წერილობითაც კი მივმართეთ, რომ დაეჩქარებინათ განხილვა. ჩემს ინტერესშია, რომ მალე გავმართლდეთ და ამაში დარწმუნებული ვარ. გარდა ამისა, გეტყვით, რომ ძალიან მიხარია, როცა გვაქვს საშუალება, ვცხოვრობდეთ ქვეყანაში, სადაც პროკურატურა, ბიზნესი და სასამართლო არის სრულიად განცალკევებული ერთმანეთისგან და არა ჯაჭვურად გადაბმული, როგორიც იყო, _ თქვა წილოსანმა.
შემდეგი შეკითხვის ადრესატი ისევ ნინო წილოსანი იყო.
ტარიელ კალანდარიშვილი: _ თქვენ არაერთხელ აღნიშნეთ, რომ უალტერნატივო კანდიდატი ხართ. თუმცა, თქვენ ხართ იმ გუნდის კანდიდატი, რომელიც 2012 წელს გვპირდებოდა აგუგუნებულ ფაბრიკებს, უპროცენტო კრედიტებს, სამართლიანობის აღდგენას და სოფლის მეურნეობის აყვავებას. გულწრფელად გჯერათ, რომ ამ შეუსრულებელი დაპირებების ფონზე "ქართული ოცნება" გაიმარჯვებს და უმრავლესობით მოვა ხელისუფლებაში?
ნინო წილოსანი: _ ნამდვილად გავიმარჯვებთ! ზუსტად ვიცი, რომ ამ 4 წლის მანძილზე, მცირე და საშუალო ბიზნესის დასახმარებლად ბევრი რამ გაკეთდა. არავის არ აქვს იმის თქმის უფლება, რომ ბიზნესს სახელმწიფოს მხრიდან მხარდაჭერა არ აქვს _ იმდენი პროექტი, რამდენიც სოფლის მეურნეობის სფეროში გახორციელდა, არასდროს გახორციელებულა. ვამაყობ, რომ ამ გუნდის გვერდით ვდგავარ და დარწმუნებული ვარ, ბატონი გიორგი კვირიკაშვილის მიერ წარმოდგენილი პროგრამა აუცილებლად შესრულდება ისეთი ენერგიული, განათლებული და მონდომებული ადამიანების ძალისხმევით, როგორიც წარმოდგენილია ამ არჩევნებზე და, სასიხარულოდ, მათ შორის მეც ვარ, _ აღნიშნა წილოსანმა.
ამირან ჭაღალიძემ შეკითხვა ნინო კვიტაიშვილს დაუსვა და დაინტერესდა, რას ჰპირდება "ნაციონალური მოძრაობა" ხალხს:
_ რამდენიმე წუთის წინ აღნიშნეთ, რომ "ნაციონალურმა მოძრაობამ" 2003 წელს გადმოიბარა ხელისუფლება. ის გადმობარება კი არა, გადატრიალება იყო და რასაც ჩადიოდით 9 წლის განმავლობაში, ყველასთვის ცნობილია. ამის შემდეგ "ნაციონალური მოძრაობა" რას ჰპირდება ხალხს?
ნინო კვიტაიშვილი: _ პროფესიით ისტორიკოსი ვარ და ერთმანეთისგან ვარჩევ გადატრიალებას, გადაბარებას და სხვადასხვა ტერმინებს. 2003 წლის მოვლენები "ვარდების რევოლუციის" სახელით შევიდა ისტორიაში და რევოლუცია ამ შემთხვევაში გადაბარებას არ გულისხმობს. მე ის აღვნიშნე, რომ პრობლემებით სავსე ქვეყანა გადმოიბარა ჩვენმა ხელისუფლებმა. რაც შეეხება დაპირებებს _ ჩვენი დაპირებები ეფუძნება აბსოლუტურად რეალისტურ საფუძვლებზე შემუშავებულ და რეალისტურ ხედვაზე დაფუძნებულ პროგრამას. თუ გაეცნობით, ნახავთ, რომ პროგრამაში პრიორიტეტებად ჩაშლილია ყველა ის მიმართულება, რომელიც დღეს არის მნიშვნელოვანი _ პენსიის ზრდა 50 ლარით; ნოემბრიდან მასწავლებლების ხელფასის ზრდა 650 ლარამდე; იმ ადამიანების დახმარება, რომლებსაც "ოცნებამ" შემწეობა შეუჩერა; ბიზნესის განვითარებისთვის მნიშვნელოვანი სახის საშეღავათო პოლიტიკის გატარება; ჯანდაცვის ახალი პაკეტების შექმნა, რომელშიც უფასო მედიკამენტებიც შევა; სუს-ისა და ფინანსური პოლიციის გაუქმება. გარდა ამისა, მომზადებული გვაქვს საგარეო პოლიტიკის მიმართულებით გასახორციელებელი პროექტები ევროკავშირსა და ევროატლანტიკურ ალიანსთან ინტეგრაციისთვის, _ აღნიშნა კვიტაიშვილმა.
გადაცემის მეორე ბლოკში, კანდიდატების მხარდამჭერებს შეკითხვების დასმის საშუალება მიეცათ, რომლის ნახვაც შეგიძლიათ აქ.
