დასმულია შეკითხვა: “წარმოადგენს თუ არა “გლობალ კონტაქტ კონსალტინგის” ბიზნეს გეგმითა და საქმეზე წარმოდგენილი ფიზიკურ პირებთან დადებული ხელშეკრულებებით გათვალისწინებული საქმიანობა მოგებაზე ორიენტირებულს და შეიძლება იყოს თუ არა აღნიშნული საქმიანობა მოგების მომტანი კომპანიისთვის?”
ამ კითხვაზე პასუხის გასაცემად კონტროლის პალატის მთავარი ფინანსური კონსულტანტი ლ. მერაბიშვილი და 2 ექსპერტ-ანალიტიკოსი შეიკრიბა. მათ ერთხმად გადაწყვიტეს, რომ: შპს “გლობალ კონტაქტ კონსალტინგის” მიერ განხორციელებული ქმედება არ არის მოგებაზე ორიენტირებული, რადგან გამოთვლებით დადგინდა, რომ კომპანიის მიერ კონტრაქტის მიხედვით მისაღები თანხის დღევანდელი ღირებულება შეადგენს მხოლოდ 25.68 ლარს (დღგ-ს ჩათვლით).
ეს მონაცემი კონტროლის პალატის ექსპერტ ანალიტიკოსებმა თავიანთი გადათვლის ტექნიკითა და განსაკუთრებული მეთოდოლოგიით გამოიყვანეს.
მაგრამ, მოხდა უცნაური რამ, ლევან სამხარაულის სახელობის სასამართლო ექსპერტიზის ბიურომ კონტროლის პალატას “ცივი წყალი გადაასხა”. მართალია, ორივე უწყება ერთ აზრზეა იმასთან დაკავშირებით, რომ “გლობალ ტვ-ს” ქმედება არ არის მოგებაზე ორიენტირებული, მაგრამ ექსერტიზის ბიუროს ციფრობრივი მონაცემები სამჯერ აღემატება კონტროლის პალატის გამოთვლებს.
“ეკონომიკური თვალსაზრისით, შპს “გლობალ კონტაქტ კონსალტინგის” მიერ განხორციელებული ქმედება არ არის მოგებაზე ორიენტირებული. კონტრაქტის დადების მომენტში არსებული მიმდინარე ღირებულება შეადგენს 72.7 ლარს (დღგ-ს გარეშე)”, _ ვკითხულობთ სამხარაულის სახელობის სასამართლო ექსპერტიზის ბიუროს დასკვნაში.
დამოუკიდებელი ექსპერტების შეფასებით, არცერთი მაჩვენებელი არ არის სწორი და დღევანდელი ღირებულების რეალური სიდიდე 248 ლარია.
მაგრამ რას უნდა ნიშნავდეს კონტროლის პალატისა და სამხარაულის ექსპერტიზის ბიუროს ეს აზრთა სხვადასხვაობა, ამასთან დაკავშირებით “გურია ნიუსმა” კომენტარის გაკეთება “გლობალ ტვ-ს” იურიდიულ კონსულტანტს, სანდრო ბარამიძეს თხოვა:
“რაც შეეხება კონტროლის პალატისა და სამხარაულის ექსპერტიზის ბიუროს მიერ მომზადებულ დასკვნებს, ისევე როგორც საზოგადოების დიდი ნაწილი, არც მე ვენდობი და ეს უნდოობა ზოგადი ფაქტორებით კი არა, იმ კონკრეტული რიცხვების გამოა გამოწვეული, რომელიც იქ წერია.
კონტროლის პალატის დასკვნაში მცდარი ფორმულა არის გამოყენებული, რის გამოც პროექტის დღევანდელი ღირებულება 10-ჯერ არის შემცირებული და ის, რაც უნდა ყოფილიყო 248 ლარი, რატომღაც დაყვანილია 25 ლარამდე.
Eეს პირდაპირი გაყალბებაა ფორმულის და ფაქტების, რაც თავისთავად ირიბად დაადასტურა სამხარაულის ექსპერტიზის ბიურომაც, იმიტომ რომ ის რაც კონტროლის პალატის ექსპერტებმა 25 ლარად დათვალეს, სამხარაულის ექსპერტებმა დათვალეს 72 ლარად.
25 ლარსა და 72 ლარს შორის თითქმის სამჯერადი სხვაობაა. თვითონ ეს ფაქტი ადასტურებს, რამდენას “სწორი” იყო კონტროლის პალატის გათვლები
ცხადია, რომ არცერთი მაჩვენებლი არ არის სწორი, რადგან დღევანდელი ღირებულების რეალური სიდიდე, დამოუკიდებელი ექსპერტების შეფასებით, 248 ლარია, მაგრამ თვით სამხარაულის ბიუროს დასკვნაც კი ადასტურებს, თუ რაოდენ დაწეულია ეს მაჩვენებელი კონტროლის პალატის მიერ. ეს შეიძლება იყოს შეცდომა, მაგრამ შეიძლება იყოს განზრახ გაყალბება ფაქტებისა და ფორმულის, _ განაცხადა სანდრო ბარამიძემ.
