“რა უნდა გავაკეთო, რომ ხმის მიცემა შევძლო” _ ტუფა ჯიქია

ჩოხატაურში, წერეთლის ქუჩაზე მცხოვრები ტუფა ჯიქია "გურია ნიუსის" რედაქციაში მოვიდა და დახმარება გვთხოვა. როგორც ქალბატონი ტუფა ამბობს, მას, დაახლოებით, ერთი თვის წინ მოუვიდა ბარათი, რომელშიც არჩევნებში მონაწილეობისთვის რიგითი ნომერი _ 902 იყო აღნიშნული.

დღეს კი, საკუთარი არჩევანისთვის მისულმა ქალბატონმა, თავისი სახელი და გვარი საარჩევნო სიაში ვერ აღმოაჩინა, უფრო მეტიც, საარჩევნო სიის რიგითი ნომერი 900-ით მთავრდებოდა.

"ძალიან მინდოდა ჩემი პოზიცია გამომეხატა, მაგრამ აღმოჩნდა, რომ სიაში არ ვარ, მითხრეს ეს ნომერი საერთოდ არააო, იქნებ, დამეხმაროთ, რა უნდა გავაკეთო, რომ ხმის მიცემა შევძლო", _ წუხს ქალბატონი ტუფა.

აღნიშნულთან დაკავშირებით, ჩოხატაურის საოლქო-საარჩევნო კომისიის თავმჯდომარე თემურ კუტუბიძე ამბობს, რომ ამ პრობლემის შესახებ იცის, თუმცა, ქალბატონი ტუფა, სამწუხაროდ, ხმას ვერ მისცემს, რადგან ამის მექანიზმი არ არსებობს.

"ტუფა ჯიქია მოსული იყო ჩემთან და ვიცი, რომ არ არის სიაში. მას ერთი თვის წინ მიუვიდა ბარათი, ეგ იყო კედლის სიაში აღნიშნული, მაგრამ ახალ, ფოტოებიან სიაში არ არის. რაც უნდა გავარკვიოდ, სიაში ახლა ვერავინ შეიყვანს. რაღაც პრობლემაა აქ, რაც გასარკვევია რეესტრში. ჩვენი აზრით, პრობლემა უნდა იყოს ფოტოსთან დაკავშირებით, იმიტომ, რომ ძალიან ახალგაზრდობის სურათია. ქალბატონ ტუფას რომ მოემართა ჩვენთვის ორი კვირის წინ ეს პრობლემა მოგვარდებოდა, მაგრამ, სამწუხაროდ, დღეს აზრი აღარ აქვს, სია უკვე დაბეჭდილია და ვერავინ  შეიყვანს სიაში, ამის მექანიზმი არ არსებობს. რატომ არ არის ეს ქალბატონი ამომრჩეველთა ერთიან სიაში, გასარკვევია. ამომრჩეველმა ორი კვირით ადრე უნდა გადაამოწმონ, არიან თუ არა საარჩევნო სიაში. არჩევნებამდე 10 დღით ადრე სასამართლოს აქვს უფლება ცვლილება განახორციელოს ამომრჩეველთა სიაში. ხდება სიის ფორმირება. დღეს კი კიდევ ერთხელ ვიმეორებ, სამწუხაროდ, ქალბატონი ტუფა არჩევნებში მონაწილეობას ვერ მიიღებს, _ გვითხრა თემურ კუტუბიძემ.