“ბიძინა ივანიშვილმა ამომრჩევლის მოსყიდვის მიზნით, შეისყიდა თეფშები, შემდეგ თავის კომპანიას “გლობალ ტვ-ს” გადასცა და საბოლოო ჯამში, ამით სარგებლობს ბიძინა ივანიშვილის პოლიტიკური პარტია “ქართულო ოცნება – დემოკრატიული საქართველო”, _ ნათქვამია თბილისის სააპელაციო სასამართლოს მიერ ივანიშვილისთვის დაახლოებით 75 მილიონი ლარის ოდენობის ჯარიმის დაკისრების ნაწილში.
“მაინტერესებს, საიდან ჩანს, რომ ბიძინა ივანიშვილმა შეისყიდა თეფშები? არის საქმეში თუნდაც ერთი ქვითარი, რომელიც ადასტურებს, რომ ბიძინა ივანიშვილმა ამოიღო ჯიბიდან და შეიძინა რამდენიმე ათასი სატელიტური თეფში? არის საქმეში საბანკო ამონაწერი ან რამე ქვითარი გადარიცხვაზე ბიძინა ივანიშვილის საბანკო ანგარიშიდან, რომელიც ადასტურებს, რომ მან გადაურიცხა რომელიმე კომპანიას ფული ამ თეფშებისთვის?! თუ დამიჯერებთ, ამისთანა მტკიცებულება საქმეში არ არის”, _ აცხადებს ბიძინა ივანიშვილის ერთ-ერთი ადვოკატი, სანდრო ბარამიძე “გურია ნიუსთან” საუბრისას
_ საერთოდ, როდესმე ჰქონია ივანიშვილს შეხება “გლობალ ტვ”-ისთან?
_ არა, გარდა იმისა, რომ ბიძინა ივანიშვილის ძმა, ალექსანდრე ივანიშვილი არის “გლობალ ტვ”-ის მეწილე, 66%-ის მფლობელი.
_ რამდენი ხანია, რაც ადიკო ივანიშვილი ამ კომპანიის საკონტროლო პაკეტს ფლობს?
_ მას შემდეგ, რაც “გლობალ ტვ” შეიქმნა. “გლობალ ტვ” გუშინ და დღეს არ შექმნილა, იგი შეიქმნა 2002 წელს. რა შეიძლება დაუკავშირო 2002 წელს შექმნილ კომპანიას? ის, რომ “ქართული ოცნება – დემოკრატიული საქართველოსთვის” განახორციელებდა უკანონო შემოწირულობას 2012 წელს?! მაშინ, არც ასეთი პოლიტიკური რეალობა იყო და არც ასეთი კანომდებლობა. ეს ყველაფერი არის აბსურდი.
ერთადერთი, რასაც დაეყრდნო სასამართლო, გახლავთ ვიღაცა 41 პირის ახსნა-განმარტება კონტროლის პალატაში. ისინი დაიბარეს კონტროლის პალატაში და არავინ იცის, რა ვითარებაში დააწერინეს ეს ახსნა-განმარტებები. ეს ადამიანები სასამართლოში არც კი გამოიძახეს მოწმის სახით. სასამართლომ ჩვენი შუამდგომლობები ამ ხალხის დაკითხვის თაობაზე, არ დააკმაყოფილა. ეს არ იყო პროცესი, სადაც რამე მტკიცებულებები შემოწმდა.
_ “გლობალ-ტვ”-ს ამერიკელი მეწილის დაკავება, რეალურად ამ პროცესებს უკავშირდებოდა?
_ პირდაპირი იურიდიული კავშირი არაფერი აქვს, მაგრამ სხვა მხრივ აქვს. ეს ადამიანი ჩამოვიდა საქართველოში, გამართა პრესკონფერენცია იმ პრობლემების თაობაზე, რასაც აწყდებოდა იმ პერიოდში “გლობალ ტვ”. მისი წასვლის შემდეგ, ეს პრობლემები უფორ გაღრმავდა. ამ ადამიანმა პრესკონფერენციაზე იწინასწარმეტყველა და ამას დიდი წინასწარმეტყველება არ უნდოდა, რადგან ხელისუფლების ქმედებები აქეთკენ მიდიოდა, რომ ისინი შეუტევდნენ ამ თეფშებს. ამაზე ისაუბრა პრესკონფერენციაზე. ამის გამო, იაფფასიანი შური იძიეს მასზე და ჩაატარეს ეს იაფფასიანი ფარსი, რაც ჩვენ ვნახეთ. ბრალდება ვერაფერი წარუდგინეს, არაფერი იყო იქ კრიმინალური. ბოლომდეც ვერ შეთხზეს, რადგან ამერიკის კონსული იყო ჩართული საქმეში. ცხადია, ეს იყო შურისძიების მცდელობა, რომელიც კრახით დამთავრდა.
