"მე ვრჩები გიორგი კვირიკაშვილის კეთილისმყოფლად", _ განაცხადა საქართველოს პარლამენტის თავმჯდომარემ დავით უსუფაშვილმა დღევანდელ პრესკონფერენციაზე და ღნიშნა, რომ საკონსტიტუციო უმრავლესობით ქვეყნის მართვა არის ყველაზე რთული გზა.
"მე, პირადად, ვაგრძელებ პარლამენტის თავმჯდომარის მოვალეობებს იმ წუთამდე სანამ შეიკრიბება ახალი მოწვევის პარლამენტი. ჩვენ მთელი პარლამენტის აპარატი ვმუშაობთ იმისთვის, რომ ყველაფერი იყოს მზად და მზად იქნება რა თქმა უნდა. ამ პერიოდში მე ვიქნები სრულად ჩართული იმ პროცესებში რაც აუცილებელია არჩევნების ბოლომდე სამართლიანად და მშვიდობიანად დასრულებისთვის. მე ვიქნები თანამშრომლობისთვის ყველა თანამდებობის პირთან ვინც ამ პროცესშია ჩართული. ასევე, მე ვრჩები გიორგი კვირიკაშვილის კეთილისმყოფლად და ძალიან მინდა ვისურვო, რომ პერსონალურად ის და მისი მხარდამჭერები შეძლებენ ძალიან რთულ გზაზე წარმატებით გავლას, რომელიც თავად აირჩიეს. ჩემი აზრით, მან და მისმა ჭეშმარიტმა მხარდამჭერებმა ყველაზე რთული გზა აირჩიეს საკონსტიტუციო უმრავლესობით ქვეყნის მართვა. ეს არის ყველაზე რთული გზა და არა ყველაზე ადვილი გზა, რომელიც სხვებს წარმოუდგენიათ. მე მას პირადად და მის გუნდს ვუსურვებ წარმატებას და ქვეყნის წინ წაყვანას”, _ განაცხადა უსუფაშვილმა.
უსუფაშვილის თქმით საკონსტიტუციო უმრავლესობის პრაქტიკა საქართველოში ახალი არ არის და საკონსტიტუციო უმრავლესობა არის შეცდომების დაშვების შესაძლებლობა.
”ეს ხშირად მომხდარა ჩვენს ქვეყანაში. კომუნისტური პარტიიდან მოყოლებული ვისაც ჰქონდა საკონსტიტუციო უმრავლესობა, იყო ”მრგვალი მაგიდა”, ”მოქალაქეთა კავშირი”, ”ნაციონალური მოძრაობა”, აჭარაში ”აღორძინება”, ჩვენვე, ჩვენ ცხოვრებაში ვნახეთ, რომ საკონსტიტუციო უმრავლესობა არის შეცდომების დაშვების შესაძლებლობა. მაშინ როდესაც ადამიანებს უვითარდებათ განცდა, რომ მათ ყველაფერი იციან და მარტივია ყველაფრის კეთება, ხდება შეცდომების დაშვება და ეს არის სახიფათო. თუ გადავიხედებით რა პრინციპებს ეფუძნება დემოკრატიული სამყარო, სად და როგორ არის მიღწეული ეფექტური მმართველობა, მაშინ არის მთავრობა უფრო წარმატებული თუ 90%-ს აკონტროლებს პარლამენტში, თუ მაშინ როდესაც კონსულტაციებით საშუალება აქვს ყველა პოლიტიკურ ძალასთან მჭიდრო ურთიერთობით მიიღოს გადაწყვეტილება?. გადავიხედოთ ევროპაში, თუ მანახებთ ერთ ქვეყანას, რომელიც იყო წარმოდგენილი თავისი განვითარების პროცესში სადაც ერთი პარტია იყო საკონსტიტუციო უმრავლესობით წარმოდგენილი, მეც შემიძლია აზრი შევიცვალო. ამ თვალსაზრისით საქართველო არ არის გამონაკლისი. მე კარგად მესმის დღევანდელი აღტკინება რასაც ვხედავ ”ქართული ოცნების” წარმომადგენლებში, რომლებიც სიამაყით ამბობენ, რომ ჩვენ საკონსტიტუციო უმრავლესობა გვექნება, თითქოს ჩვენ ევერესტზე ავედით. ევერესტზე ასვლა არ არის მთავარი, იქიდან ჩამოსვლაც აუცილებელია”, _ აღნიშნა უსუფაშვილმა.
