დღეს, საქართველოს შეიარაღებულ ძალებს, დავით აღმაშენებლის სახელობის ეროვნული თავდაცვის აკადემიის 125 იუნკერი შეემატა.
სამხედრო ფიცის დადების ღონისძიება საზეიმო ვითარებაში ეროვნული თავდაცვის აკადემიის სამწყობრო მოედანზე გაიმართა. იუნკერებს ფიცის დადება საქართველოს თავდაცვის მინისტრმა ლევან იზორიამ და შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ მიულოცეს.
„გილოცავთ ბატონო იუნკერებო დღევანდელ დიდებულ დღეს! ეს თითოეულის ბიოგრაფიაში იქნება უდიდესი დღე; იმიტომ, რომ დღეიდან თქვენ უკვე სრულფასოვანი წევრები ხართ ქართული შეიარაღებული ძალების. ფიცის დადება საჯაროდ, როგორც დღეს ჩვენ მოვისმინეთ, არის მხოლოდ ღირსეულთა, გამორჩეულთა ხვედრი. იმიტომ, რომ თქვენ საჯაროდ იღებთ უდიდეს პასუხისმგებლობას თქვენი ქვეყნის, ერის წინაშე. ფიცით თქვენ ჩვენს დიდებულ წინაპრებს ესაუბრებით, მათ წინაშე დებთ პირობას, რომ გააგრძელებთ ღირსეულ საბრძოლო ტრადიციებს", _ განაცხადა ლევან იზორიამ.
ფიცის დადებამდე იუნკერებმა და მოწვეულმა სტუმრებმა წუთიერი დუმილით პატივი მიაგეს საქართველოს ერთიანობისათვის ბრძოლის დროსა და სამსახურებრივი მოვალეობის შესრულების დროს დაღუპულ სამხედრო მოსამსახურეებს; შესრულდა საქართველოს სახელმწიფო ჰიმნი.
