8 ივნისს, ოზურგეთის მუნიციპალიტეტის გამგეობის საჯარო ინფორმაციის გაცემაზე პასუხისმგებელი პირის სახელზე სამი განცხადება შევიტანეთ, რომლითაც კონკრეტული ობიექტების სარესტავრაციო-სამშენებლო სამუშაოების შესახებ ვითხოვდით ინფორმაციას. კონკრეტულად, რომელიც იწყების მიერ და როდის იქნა გაცემული ნებართვა აღნიშნულ სამუშაოებთან დაკავშირებით (ვითხოვდით ხელშეკრულების ასლებს), რამდენად არის ჩართული ადგილობრივი თვითმმართველობა ამ სამუშაოების ჩატარებაში, რა თანხებია გამოყოფილი აღნიშნული სამუშაოებისთვის, რომელი კომპანია აწარმოებს ამ სამუშაოებს აღნიშნულ მისამართზე და ა.შ.
ამავდროულად, “გურია ნიუსმა” მუნიციპალიტეტის გამგეობის საჯარო ინფორმაციაზე პასუხისმგებელ პირს წერილობით მიმართა, რომლითაც ვითხოვდით ოზურგეთის მუნიციპალიტეტის გამგეობის განცხადებების სარეგისტრაციო ჟურნალიდან რამდენიმე დღის ამონაწერს.
22 ივნისს, საქმეში, იზურგეთის მუნიციპალიტეტის გამგეობის იურიდიული სამსახურის უფროსი თეა ლომჯარია ჩართეს, რომელმაც გვითხრა, რომ განცხადება გამგებლის სახელზე უნდა დაგვეწერა და არა პასუხისმგებელ პირზე.
_ გამგეობის დებულებისა და ზოგადი ადმინისტრაციული კოდექსის შესაბმისად უნდა მომართოთ ადმინისტრაციული ორგანოს ხელმძღვანელს, ილია ვაშაყმაძეს, ამის შემდეგ ინფორმაციაზე გაცემის პირს დაეწერება განცხადება და დაუყოვნებლივ გაგაცნობს დედანს, _ გაგვიცხადა ლომჯარიამ.
_ ჩვენი მოთხოვნა კანონის ფარგლებში ჯდება…
_ კი, მაგრამ, ჩვენთან ხდება ესე, ყველა ადმინისტრაციული ორგანოში უნდა მიმართო ხელმძღვანელს.
_ მაჩვენეთ მაშინ კანონი და დებულება, სადაც ის წერია, რასაც თქვენ ამბობთ.
_ საჯარო ინფორმაციის პასუხისგებაზე, ინფორმაციის გაცემასა და თანხმობას ან უარს გეუბნება ადმინისტრაციული ორგანო, შესაბამისად ზოგადი ადმინისტრაციული კოდექსი ამას აწესრიგებს დიდებულად.
_ და ასევე ამბობს, რომ დაყოვნებლივ უნდა მაჩვენოთ ინფორმაცია, რომელიც საჯაროა.
_ დაუყოვნებლივ, ჩვენ უარს არ ვამბობთ. უბრალოდ, ჩვენ გეუბნებით, რომ ხელმძღვანელის სახელით მოგვმართეთ და ახლავე დედანს გაგაცნობთ. შენ თვითონ პასუხისმგებელ პირთან ერთად გაეცნობი ყველა იმ განცხადებებს, რაც არის რეგისტრირებული.
_ მაშინ რატომ არსებობს ეს შტატი საერთოდ? (საუბარია ოზურგეთის მუნიციპალიტეტის გამგეობის საჯარო ინფორმაციის გაცემაზე პასუხისმგებელ პირზე, ავტ.)
_ იმისთვის, რომ ნებისმიერ საჯარო ინფორმაციაზე მოთხოვნის განცხადებას ორგანიზება გაუწიოს, ანდა კანონით დადგენილი ვადეში გაცეს. როცა რაიმე პრობლემა შეგექმნება, უნდა მიმართო მას.
_ ანუ თქვენ მეუბნებით, რაც აქ წერია…( მაწყვეტინებს სიტყვას).
_ეს არის კანონიერი მოთხოვნა, წინააღმდეგობას არ გიქმნით და ახლავე გაგაცნობთ დაუყოვნებლივ.
მიუხედავად თეა ლომჯარიას რჩევა-დარიგებისა, განცხადებების სარეგისტრაციო ჟურნალის გაცნობა იმ დღეს მაინც ვერ მოხერხდა. ლომჯარია კი გვპირდებოდა, თუ ადრესატს შევცვლიდით, დაუყოვნებლივ გაგვაცნობდნენ ჩანაწერს, მაგრამ სულ ტყუილად გვაიმედებდა.
ჩვენ იმავე დღეს ვესაუბრეთ ოზურგეთის მუნუციპალიტეტის გამგებლის მოვალეობის შემსრულებელს ილია ვაშაყმაძეს.
_ ახლა შრომაში ვარ, დამელოდოთ უნდა, რეზოლუციას ხელი უნდა მოვაწერო და შემდეგ მოხდება გაცნობა. შრომაში ვარ, მეწყერი ჩამოწვა და ხალხს პრობლემები აქვს. _ გვითხრა სატელეფონო საუბრის დროს ილია ვაშაყმაძემ.
დედანში გაცნობის თაობაზე “გურია ნიუსს” მხოლოდ ორშაბათს დაუკავშირდნენ.
“გურია ნიუსი” ამ საკითხთან დაკავშირებით საქართველოს იურისტთა ასოციაციის” ოზურგეთის ოფისის ხელმძღვანელს თამაზ ტრაპაიძეს ესაუბრა.
_ ბატონო თამაზ როცა საჯარო ინფორმაციას ვითხოვთ აუცილებლად ადმინისტრაციული ორგანოს ხელმძღვანელს უნდა მივმართოთ?
_ რა თქმა უნდა, არა. თქვენ შეგიძლიათ განცხადებით მიმართოთ საჯარო ინფორმაციის გაცემაზე პასუხისმგებელ პირს და ზოგადიი ადმინისტრაციული კოდექსის შეაბამისად, მიიღოთ საჯარო ინფორმაცია.
_ სურვილი მქონდა დედანში გავცნობოდი საჯარო ინფორმაციას, კერძოდ განცხადებების სარეგისტრაციო ჟურნალს, რამდენად კანონიერია ჩემი მოთხოვნა?
_ზოგადი ადმინისტრაციული მკოდექსის 37-ე მუხლის თანახმად: “ყველას აქვს უფლება მოითხოვოს საჯარო ინფორმაცია მისი ფიზიკური ფორმისა და შენახვის მდგომარეობის მიუხედავად და აირჩიოს საჯარო ინფორმაციის მიღების ფორმა, თუ იგი სხვადასხვა სახით არსებობს, აგრეთვე გაეცნოს ინფორმაციას დედანში. . . . “.
ამდენად, თქვენი მოთხოვნა სრულიად კანონიერია.
_ იმის გამო, რომ გამგებელი ადგილზე არ იმყოფებოდა, მე ვერ შევძელი გავცნობოდი საჯარო ინფორმაციას. დაირღვა თუ არა ჩემი უფლებები?
_ დიახ, დაირღვა. გამგებელი ერთ-ერთი ისეთი თანამდებობის პირია, რომ შეიძლება ხშირად არ იყოს თავის სამუშაო ოთახში. სწორედ ამიტომ განსაზღვრა კანონმა საჯარო ინფორმაციის (რომელიც სხვათაშორის გარდა რამდენიმე გამონაკლისისა დაუყოვნებლივ უნდა გაიცეს) გაცემაზე პასუხისმგებელი პირი. ამ პირის მეშვეობით უნდა მოხდეს საჯარო ინფორმაციის მიწოდება და სამსახურში ხელმძღვანელის ყოფნა არ ყოფნამ არ უნდა შეუშალოს ხელი პირს საჯარო ინფორმაციის მიღებაში.
