მწერალი გრიგოლ ჩხარტიშვილი _ “ბორის აკუნინი”, ნათესავებისთვის „გრიშუტკა“, წარმოშობით ოზურგეთელია

ცნობილი მწერალი, წარმოშობით ქართველი გრიგოლ ჩხარტიშვილი (ფსევდონიმით _ "ბორის აკუნინი"), რომელიც სამწერლო ასპარეზზე ყველგან ნამდვილ გვარ-სახელს აფიქსირებს  ფსევდონიმთან ერთად, წარმოშობით ოზურგეთელია და არა ზესტაფონელი. მართალია, ის ზესტაფონში დაიბადა 1956 წელს, სადაც მამამისი შალვა ჩხარტიშვილი სამხედრო სამსახურში იმყოფებოდა, მაგრამ ძირძველი ოჯახი ჩხარტიშვილებისა ოზურგეთში მდებარეობს.

ამის შესახებ „გურია ნიუსი“ რამდენიმე წლის წინ წერდა კიდეც, თუმცა, ახლა, როცა სახელოვან მწერალს საქართველოში ელოდებიან, ჩვენ კიდევ ერთხელ ვესტუმრეთ გრიგოლ ჩახრტიშვილის მამის, შალვა ჩხარტიშვილის ოჯახს.  გრიგოლ ჩხარტიშვილის ერთადერთი ალალი ბიძაშვილი, ნოე ჩხარტიშვილი (შალვას ძმისშვილი), ოზურგეთში, კლდიაშვილის ქუჩაზე ცხოვრობს. ბატონი ნოე დეტალურად გვიყვება  ბიძის, შალვა ჩხარტიშვილის ბიოგრაფიას:

_ ის ახალგაზრდა ასაკში  რუსულ ჯარში გაიწვიეს, მაშინ სსრკ არსებობდა.  შემდეგ გაჰყვა სამხედრო სამსახურს, იქვე შეირთო ცოლიც და რამდენიმე წელში საქართველოში, ზესტაფონში დაბრუნდა  სამუშაოდ, სადაც  რუსული ნაწილი  იდგა. აქვე დაიბადა დღეს უკვე ცნობილი მწერალი, გრიგოლ ჩხარტიშვილი, რომელსაც მამამ ბაბუას სახელი დაარქვა.  რასაკვირვველია, დაბადების მოწმობაშიც ის  გეოგრაფიული მდებარეობაა მითთებული,   სადაც დაიბადა.  მალე მოსკოვში გადასულან და საცხოვრებლად იქვე დაფუძნებულან. თვითონ შალვა ჩხარტიშვილი ოზურგეთში ყოველ ზაფხულს ჩამოდიოდა, ხშირად ახსენებდა პატარა გრიშუტკას, რომელიც საქართველოს სტუდენტობის ასაკში ეწვია, მამასთან ერთად. ეს იყო, როგორც მახსოვს 1978-80 წლებში. მას ყველა „გრიშუტკას“ ვეძახდით. ქართულად არ საუბრობდა, თუმცა, მახსოვს ხელში ეჭირა ქართული გაზეთი და ასოებს ამოკითხვით იმეორებდა. დიდხანს არ რჩებოდნენ, რადგან ბიძა მსახურობდა, თან ნატანებსა და გურიანთაში დები უნდა მოენახულებინა და იქაც ჩადიოდა რამდენიმე დღით… მას შემდეგ  აღარ გვინახავს ერთმანეთი. მქონდა ტელეფონის ნომერი, ერთხელ დავურეკე და ვისაუბრეთ. მერე ქვეყანა აირია, ეტყობა, ტელეფონის ნომერიც შეცვალა, რადგან მომდევნო შეხმიანებისას, ძველ  ნომერზე აღარ მიპასუხა…  ერთხელ, ერთი მოსკოველი ახლობლისგან,  ასეთი ინფორმაციაც მოვიდა ჩვენამდე  _ ვიღაც, გვარად ჩხარტიშვილი, მისულა გრიგოლთან, შენი ოზურგეთელი ნათესავი ვარო! თუმცა, გრიგოლი მიმხვდარა,  რომ ატყუებდნენ და უთქვამს კიდეც, შენ არ ხარ ჩემი ნათესავიო. არ ვიცი, ეს ასე იყო თუ არა, სინამდვილე კი ასეთია _ გრიგოლ ჩხარტიშვილი ჩემი ალალი ბიძაშვილია, მამაჩემის ძმის, შალვას შვილი! რამდენჯერ ვცადეთ, ხმა მიგვეწვდინა, თუმცა, უშედეგოდ! ბედნიერი ვიქნებით, თუ მას ოდესმე ოზურგეთში ვიხილავთ, ჩვეთან, მამისეულ სახლში, სადაც სტუდენტობისას რამდენჯერმე  ჩამოიყვანა მამამ  და არ შეიძლება,  ეს არ ახსოვდეს! მაშინ ხომ 23-24 წლის ჭაბუკი იყო!

ნოე ჩხარტიშვილთან ერთად ჩვენ შევხვდით გრიგოლ ჩხარტიშვილის ბაბუის, გრიგოლის ძმისშილებს _ იამზე და გრიგოლ ჩხარტიშვილებს. მათ მოგვაწოდეს გრიგოლის ბავშვობისდროინდელი  ფოტოები, მამასთან ერთად გადაღებული, რომელსაც ოჯახში რელიქვიასავით ინახავენ!

_ გავიგეთ, რომ გრიგოლ ჩხარტიშვილი ("ბორის აკუნინი")  საქართველოს უნდა ესტუმროს! ნეტავ, ისე არ მოვკვდებოდეთ, რომ ერთხელ მაინც, აქ , ძირძველ ოჯახში, ბაბუას კერაზე მოსულს ვიხილავდეთ! თუ ჩვენს ხმას მიაწვდით ჟურნალისტები, ამით უდიდეს საქმეს გაგვიკეთებთ! ჩვენ ის გვიყვარს და გვენატრება ისეთი „გრიშუტკა“, როგორიც აქ ჩამოსვლისას გვახსოვს! _ გვეუბნებიან ჩხარტიშვილები.