“მე ისეთი ადამიანი არ ვარ, მუშტი -კრივით გადავიდე გუბერნატორთან! მე მინისტრი ვარ!”

თავად მინისტრი რამაზ ნიკოლაიშვილი “გურია ნიუსთან”ამ ყველაფერს მორიგ ჭორებს უწოდებს და ამბობს, რომ ვიღაცას ვალერი ჩიტაიშვილის დაკნინება უნდა.

_ რა სისულელეა. რა მაინტერესებს იცით? მართლა მგონია, რომ ნორმალური ჟურნალისტი ხარ. ჭორები _ ეს არის ჟურნალისტიკა გურიაში. რა უბედურებაა. ვალერისთან მე რა უნდა მქონდეს დასაპირისპირებელი ან რატომ უნდა დავუპირისპირდე, ან რა შუაშია ეს ამბავი? დამაბნიე, რა. მე და ვალერი ჩიტაიშვილმა ხელით გავიწიეთ ერთმანეთზე?! ხალხი ბევრ რამეს ამბობს, ნუ აყვები. ჩემი მეგობარია ვალერი ჩიტაიშვილი, საკმაოდ კარგი ურთიერთობა მაქვს, ეგ არის იმის მოგონილი ჭორი, ვისაც არ უყვარს გურია. მით უმეტეს, გამგებლის გამო რატომ უნდა მომივიდეს დაპირისპირება, ვერ გავიგე. მე ისეთი ადამიანი არ ვარ, მუშტი-კრივით გადავიდე გუბერნატორთან, მე მინისტრი ვარ, რეგიონული განვითარების და ინფრასტრუქტურის! რა სისულელეა, როგორ წარმოგიდგენიათ?

ვალერი არის ჩემი მეგობარი, ის კარგად მუშაობს. მე, როგორც რეგიონული განვითარების და ინფრასტრუქტურის მინისტრი, კმაყოფილი ვარ მისი მუშაობით და არანაირი ხმამაღალი სიტყვა მისთვის არ მითქვია. თუ უკმაყოფილო იქნება გუბერნატორის ან გამგებლის მუშაობით, ცენტრალური ხელისუფლება შესაბამის გადაწყვეტილებას მუშტი-კრივის გარეშე მიიღებს. ვიღაცას უნდა, დააკნინოს გურიის გუბერნატორი, მაგრამ არ გამოუვა. ვალერის აქვს ძალიან ბევრი საქმე გასაკეთებელი. ყველა ღონეს ვიხმარ, რომ ვალერის გვერდში ვიდგე ბოლომდე და ვალერიმ წარმატებებს მიაღწიოს გურული ხალხის საკეთილდღეოდ. _ გვითხრა რამაზ ნიკოლაიშვილმა.