“ქართული დასის” ლიდერმა ჯონდი ბაღათურიამ აპატურაისა და ვერშბოუს საქართველოს ხელისუფლებაში არსებული ელიტარულ კორუფციის ამსახველი დოკუმენტაცია გადასცა. რა მიზანს ემსახურება ბაღათურიას მხრიდან დოკუმენტების გადაცემა და ელოდება თუ არა პასუხს ნატოს წარმომადგელნებისგან, ამასთან დაკავშირებით “გურია ნიუსი” ჯონდი ბაღათურიას ესაუბრა.
_ ბატონო ჯონდი, ალექსანდრე ვერშბოუსთანაც აპირებდით ელიტარული კორუფციის თემაზე საუბარს. შედგა ეს დიალოგი?
_ დიახ. ვერშბოუსთან შეხვედრის დროს, მთავარი აქცენტი გავაკეთე ელიტარულ კორუფციაზე და ავტორიტარულ მმართველობაზე. ვისაუბრე კავალერისტულ შტურმზე ნაცმოძრაობის მხრიდან, რასაც ადგილი აქვს თავისუფალ მედიაზე, პოლიტიკურ ოპონენტებზე. მინდა გითხრათ, რომ ვერშბოუს გადავეცი ელექტრონული ვერსია, თარგმნილი ვარიანტი, სადაც ჩაწერილი იყო ჩემი და პრეზიდენტის დებატები პარლამენტში. ასევე კორუფციის 187 გვერდიანი მტკიცებულებები. მათ შორის პრეზიდენტის “ლევი” ანუ დაუსაბუთებელი ქონების უკანონო შემოსავლები. მტკიცებულებები პრეზიდენტისა და მისი ოჯახის კორუფციაში ჩართულობის შესახებ.
_ იგივე მასალები იყო, რაც ჯეიმს აპატურაის გადაეცით?
_ დიახ. რა მტკიცებულებებიც გადავეცი ჯეიმს აპატურაის, იგივე მტკიცებულებები გადავეცი ვერშბოუსაც. ერთადერთი განსხვავებით, რომ ვერშბოუსთან განცხადებაში დაემატა ტრეფიკინგის პრობლემა საქართველოში ამერიკის სახელმწიფო დეპარტამენტის ანგარიშით.
ჩვენი მიზანია, ბრიუსელშიც, ვაშინგტონშიც და ცივილიზებული მსოფლიოს ყველა დედაქალაქში ხელისუფლება ინფორმირებული იყოს, რეალურად ვინ ბრძანდება საქართველოს პრეზიდენტი და რა მდგომარეობაა საქართველოში შექმნილი.
საქართველოს ხლისუფლებაში არსებული ელიტარული კორუფციის შესახებ დოკუმენტების გადაცემას ბაღათურიას მხრიდან, ჯეიმს აპატურაიც ადასტურებს. “გურია ნიუსს” საშუალება ჰქონდა ამასთან დაკავშირებით მისთვის კითხვა დაესვა. “დიახ, ვადასტურებ, ბაღათურიამ ნამდვილად გადმომცა დოკუმენტები, მაგრამ სულ რაღაც ორი დღეა დავბრუნდი და ჯერ-ჯერობით არ გავცნობივარ,” _ გაგვიცხადა აპატურაიმ ჩართვისას, რომელიც ნატოს საზაფხულო კვირეულის ფარგლებში სპეციალურად ჟურნალისტებისთვის მოეწყო.
_ ბატონო ჯონდი, არის თუ არა შესაძლებელი, თქვენს მიერ გადაცემული მასალები ყურადღების მიღმა დარჩეს?
_ მინდა გითხრათ, რომ ისეთი მაღალი რანგის დიპლომატები როგორიც აპატურაი და ვერშბოუა, როცა თავს არიდებენ პასუხის გაცემას, ეს ნიშნავს რომ კონკრეტულ საკითხში მნიშვნელოვან პრობლემას ხედავენ.
ვფიქრობ, მიზანი მიღწეულია. თუმცა გაგიმხელთა იმასაც, რომ სანამ აპატურაის და ვერშბოუს პირადად გადავცემდი დოკუმენტებს, მანამდე ნატოს სამეკავშირეო ოფისის მეშვეობით, საქართველოდან ბრიუსელში გადავაგზავნე დოკუმენტაცია. ასე რომ, გარკვეული წარმოდგენა შექმნილ ვითარებაზე უკვე ექნებოდა. იგი ნამდვილად ვერ გაგცემდათ სხვანაირ პასუხს, რადგან პრეზიდენტის კორუმპირებულობა ჩვენი ქვეყნის შიდა საქმეა.
