სახალხო დამცველს „კრწანისის“ ცენტრში მომხდარ ფაქტთან დაკავშირებით ამ ეტაპზე კითხვები გამოძიებასთან არ აქვს, _ ამის შესახებ უჩა ნანუაშვილმა ჟურნალისტებთან საუბრისას განაცხადა. როგორც სახალხო დამცველმა აღნიშნა, საქმესთან დაკავშირებულ დეტალებს საკუთარი ინიციატივით შეისწავლის.
"ჩვენი წარმომადგენლები გუშინ იმყოფებოდნენ ადგილზე, გაესაუბრნენ იმ სავარაუდო მოწმეებს, მათ შორის, იმ პირებს, ვინც უშუალოდ მონაწილეობდა ამ ინციდენტში. იგულისხმება გუშაგები, აქედან გამომდინარე, ჩვენ ვაგრძელებთ საქმის შესწავლას, ადამიანის უფლებების დარღვევის კუთხით ჩვენ ვერ ვხედავთ, რომ ჯერ რაიმე გამოიკვეთა, რადგანაც გამოძიება მიმდინარეობს და უნდა დაველოდოთ გამოძიებას. მე ჯერ არ მიჩნდება კითხვები იქედან გამომდინარე, რომ შესაძლოა, მართლაც იყო გარკვეული საკითხი პრობლემური, ანუ ის ადამიანები რომ იყვნენ გადასული სამხედრო ტერიტორიაზე, ამას ადასტურებენ გუშაგები. თუმცა, იყო თუ არა ყველა პროცედურა დაცული, ამას შევისწავლით. რაც შეეხება საქმეს, საქმესთან დაკავშირებით მასალები არ გაგვაჩნია. შესაბამისად, რამდენად სწორი კვალიფიკაციით მიმდინარეობს გამოძიება, ამაზე მოგვიანებით გვექნება რეაგირება“, _ განაცხადა უჩა ნანუაშვილმა.
მომხდართან დაკავშირებით, გუშინ თავდაცვის მინისტრმა განცხადება გააკეთა. ლევან იზორიას თქმით, გუშაგი გასროლის დროს კანონის დაცვით მოქმედებდა, რასაც ექსპერტებისა და პოლიტიკოსების მხრიდან კრიტიკა მოჰყვა. მათი შეფასებით, გამოძიების დასრულებამდე მსგავსი შინაარსის განცხადების გაკეთება სამხედრო პოლიციისთვის ერთგვარი მინიშნება შეიძლება გახდეს და კრწანისის პოლიგონთან მომხდარის შესწავლა სხვა მუხლით გააგრძელონ. ამჟამად კი საქმეს მთავარი პროკურატურის ზედამხედველობით, თავდაცვის სამინისტროს სამხედრო პოლიციის დეპარტამენტი იძიებს. გამოძიება სსკ-ის 116-ე მუხლის I ნაწილით მიმდინარეობს.
შეგახსენებთ, რომ "კრწანისის" სამხედრო ბაზის ტერიტორიაზე, თავდაცვის სამინისტროს ინფორმაციით, უცხო პირების შეჭრის მცდელობას ჰქონდა ადგილი. ისინი არ დაემორჩილნენ განწესში მყოფი გუშაგის სიტყვიერ გაფრთხილებას და თავს დაესხნენ მას, რის შემდეგაც გუშაგმა წესდებით გათვალისწინებული მოქმედებები განახორციელა და ცენტრის ტერიტორიაზე შეჭრის ფაქტი აღკვეთა. თავდაცვის სამინისტროს სამხედრო პოლიციის დეპარტამენტის თანამშრომლებმა, ცენტრის მიმდებარე ტერიტორიის დათვალიერებისას, ერთ-ერთი თავდამსხმელის ცხედარი აღმოაჩინეს. გარდაცვლილი 1993 წელს დაბადებული გიორგი შენგელიაა. ეძებენ კიდევ ორ პირს, რომელმაც გაქცვა მოახერხა.
