გარემოს ეროვნული სააგენტოს ჰიდრომეტეოროლოგიური პროგნოზების ცენტრის უფროსის, სვეტლანა ნიორაძის ინფორმაციით, 27-28 ოქტომბერს საქართველოს მთელ ტერიტორიაზე უნალექო ამინდი იქნება. მომდევნო დღეებში კი, ისევ წვიმა და თოვლ-ჭყაპია მოსალოდნელი.
როგორც ნიორაძემ "გურია ნიუსს" განუცხადა, ჰაერის ტემპერატურა აღმოსავლეთ საქართველოსთან შედარებით, დასავლეთ საქართველოში უფრო მეტად გათბება.
"დასავლეთ საქართველოში დღეს წვიმაა მოსალოდნელი, მაღალ მთაში თოვლი; აღმოსავლეთ საქართველოში უმეტესად ნალექი და ზოგგან თოვლის სახით. მათ შორის თბილისშიც თოვლ-ჭყაპია მოსალოდნელი. თბილისის შემოგარენშიც თოვლია. მთაში და მაღალ მთაშიც ნალექი თოვლის სახით. დასავლეთ საქართველოში ქრის აღმოსავლეთის მიმართულების ძლიერი ქარი და დღეს ასე შენარჩუნდება.
რაც შეეხება ტემპერატურას, დღეს დასავლეთ საქართველოში 9-14 გრადუსის ფარგლებში იქნება. ხოლო აღმოსავლეთ საქართველოში +1-+6 გრადუსის ფარგლებში. თბილისში ღრუბლიანი ამინდი იქნება, ნისლი და მაქსიმალური ტემპერატურა +4 გრადუსი", _ აღნიშნავს ნიორაძე.
რაც შეეხება უახლოესი დღეების მოსალოდნელ ამინდის პროგნოზს ნიორაძის ინფორმაციით, უნალექო ამინდი მხოლოდ 27-28 ოქტომბერს იქნება, მომდევნო დღეებში კი, ამინდის გაუარესებაა მოსალოდნელი. თბილისში კი, ტემპერატურა მაქსიმუმ 14 გრადუსამდე აიწევს.
"ხვალ დღისით ამინდი გამოვა როგორც აღმოსავლეთ, ასევე დასავლეთ საქართველოში; ჰაერის ტემპერატურა მოიმატებს დასავლეთში, დაბლობში +15-+20 გრადუსის ფარგლებში. აღმოსავლეთ საქართველოში კი 8-13 გრადუსის ფარგლებში.
თბილისში ტემპერატურა +10 გრადუსი იქნება. 28 ოქტომბერსაც იგივე ამინდი შენარჩუნდება. თბილისში ტემპერატურა +14 გრადუსამდე გაიზრდება.
29 ოქტომბრიდან კი, ისევ წვიმაა მოსალოდნელი, როგორც დასავლეთ, ასევე აღმოსავლეთ საქართველოში. ასეთი ამინდი შენარჩუნდება 31 ოქტომბრის ჩათვლით", _ აღნიშნავს ნიორაძე.
-(1).jpg_22285.jpg)
