ჯერ კიდევ მიმდინარე წლის 19 მაისს, ლანჩხუთის მუნიციპალიტეტის გამგებელმა, ზაზა ურუშაძემ ქალაქში არსებული ხელოვნურსაფარიანი სტადიონების მონახულების შემდეგ, მდგომარეობა უმძიმესად შეაფასა და მათი რეაბილიტაციის გადაწყვეტილება მიიღო.
"ჟორდანიასა და იმედო დუნდუას სახელობის სტადიონების რეაბილიტაცია მოხდება. ყველაფერი უნდა გაკეთდეს იმისთვის, რომ ბავშვთა ფეხბურთის განვითარებას მაქსიმალურად ხელი შევუწყოთ. აღნიშნულ ხელოვნურსაფრიან სტადიონებზე რეგიონული და ადგილობრივი ტურნირები პერიოდულად ჩატარდება", _ ასეთი იყო მაშინ ზაზა ურუშაძის კომენტარი საკითხთან დაკავშირებით.
აღსანიშნავია, რომ როგორც წინა მოწვევის, ისე ამჟამინდელი საკრებულოს წევრების მხრიდან, არაერთხელ დადგა დღის წესრიგში ხელოვნურსაფარიანი სტადიონების მოწესრიგების საკითხი. ისინი ადგილობრივი აღმასრულებელი ხელისუფლებისგან, იმ ფონზე, როცა მილიონობით თანხები იხარჯება, მათ შორის, საკუთრივ ქალაქის ტერიტორიაზე, ახალგაზრდების ჯანსაღი ცხოვრების წესის ამაღლებისთვის რამდენიმე ათასი ლარის გამოყოფას და ინფრასტრუქტურის პროექტების ნუსხაში არსებული სტადიონების რეაბილიტაციის საკითხის მოხვედრას ითხოვდნენ.
გამგებლის მიერ გამოტანილი ვერდიქტის ფონზე, ხუთი თვის წინ ჩვენთან საუბარში დამაიმედებელ განცხადებას აკეთებდა გამგეობის ინფრასტრუქტურის სამსახურის უფროსი ლევან ჩხაიძეც:
"სტადიონების სრული რეაბილიტაცია წელს აუცილებლად გახორციელდება, ტენდერს ამასთან დაკავშირებით მომდევნო თვეში გამოვაცხადებთ. ჯერჯერობით, ვერ დავკონკრეტდებით, რა ღირებულების იქნება პროექტი, რადგან ამ ეტაპზე იმ პროექტის გადამუშავება მიმდინარეობს, რომელიც გასულ წელს მომზადდა სტადიონების რეაბილიტაციასთან დაკავშირებით. მაშინ პროექტის ღირებულება 30 ათასი ლარის ფარგლებში იყო".
ამ იმედის მომცემ დაპირებების გაცემიდან რამდენიმე თვე გავიდა, თუმცა, წინ გადადგმული ნაბიჯი აქამდე არ ჩანს. პირიქით, ლანჩხუთის მინისტადიონებზე მდგომარეობა დღითიდღე უარესდება და არათუ ტურნირების ჩატარება ან ვარჯიში, ელემენტარულად ბურთის გაგორებაც შეუძლებელი და სარისკოა, მით უმეტეს, რომ არაერთხელ იყო შემთხვევა, როცა აქ ვარჯიშისას ბავშვებმა სხვადასხვა სახის დაზიანებები მიიღეს.
სხვათა შორის, ფეხბურთის მოყვარულები იმას, რაც ლანჩხუთში ხელოვნურსაფარიან სტადიონებზე ხდება, დანაშაულად მიიჩნევენ, რადგან ზაფხულის პერიოდში უამრავი ბავშვი ჩამოდის ქალაქიდან და მათ ელემენტარულად არ ეძლევათ შესაძლებლობა, ჯანსაღი ცხოვრების წესით დაკავდნენ.
აუხდებათ თუ არა ბავშვთა ფეხბურთის გულშემატკივრებს საწადელი მიმდინარე წელს და რამდენად გახორციელდება, დაპირებისამებრ, ჟორდანიასა და დუნდუას სახელობის სტადიონებზე ინფრასტრუქტურული სამუშაოები, ეს საკითხი გამგეობის არქიტექტურისა და ინფრასტრუქტურის სამსახურში გადავამოწმეთ.
როგორც გაირკვა, ამ თემასთან დაკავშირებით დაზუსტებულ ინფორმაციას არ ფლობს სამსახურის სპეციალისტი ნუგზარ ბოლქვაძე: "რამდენადაც ვფლობ ინფორმაციას, მიმდინარე წელს სტადიონების რეაბილიტაცია არ იგეგმება. რაც შეეხება ხუთი თვის წინ გაცემულ პირობას, ეს თავად იმათთან გადაამოწმეთ, ვინც ის გასცა. მე ვერაფერს გეტყვით", _ გვითხრა ბოლქვაძემ.
განსხვავებულ ინფორმაციას გვაწვდის აღნიშნული სამსახურის უფროსი ლევან ჩხაიძე, რომელიც შვებულების ხარჯზე ნინო წილოსანის საარჩევნო კამპანიაშია ჩაბმული _ ის საკითხის გაჭიანურებას არჩევნებს მიაწერს: "ყველაფერი მზად გვაქვს, უბრალოდ, არჩევნების გამო გაიწელა დროში. როგორც კი არჩევნები დამთავრდება, საკითხს დასამტკიცებლად საკრებულოს სხდომაზე გამოვიტანთ და პროექტს გავახორციელებთ", _ ამბობს ჩხაიძე.
