ტყემალი, კოლხური თხილი, რაჭული ლორი, ხარაგაულის ნიყვი, ჭოპორტის პომიდორი, ლაგოდეხის საზამთრო, კოლხური დაფნა, ხელვაჩაურის მანდარინი, ტაბაწყურის სტაფილო, მარნეულის საადრეო კარტოფილი პოტენციური გეოგრაფიული აღნიშვნით დაცული პროდუქციის სიაშია.
ამის შესახებ კონფერენციაზე – „ბრენდინგის სტრატეგიები“ ისუბრეს, რომლის მიზანია ქართველი მეწარმეები და ფერმერები გეოგრაფიული აღნიშვნით დაცული პროდუქციის უპირატესობებს გაეცნონ როგორც საქართველოს, ასევე მსოფლიოს ბაზარზე.
კონფერენცია დღეს გაიხსნა. მისი ორგანიზატორია საქპატენტი და ინტელექტუალური საკუთრების მსოფლიო ორგანიზაცია (WIPO). კონფერენცია WIPO-ს გენერალური დირექტორის მოადგილე ბინინ ვანგმა გახსნა. ღონისძიებას 120-ზე მეტი მეწარმე და ფერმერი ესწრება საქართველოს ყველა რეგიონიდან და მიმდინარეობს მსჯელობა გეოგრაფიულ აღნიშვნებზე როგორც მარკეტინგულ ინსტრუმენტზე ქართული პროდუქციის ექსპორტისთვის, ასევე დიზაინისა და შეფუთვის გამოყენებაზე გეოგრაფიული ადგილის ბრენდინგის სტრატეგიებში, ბრენდების რეპუტაციასა და ბაზარზე მათ იმიჯზე, ასევე, მეწარმეთა ასოციაციების როლზე ეფექტური ბრენდინგის სტრატეგიების შემუშავებასა და განხორციელებაში.
საქპატენტის ინფორმაციით, კონფერენციის ფარგლებში პოტენციური გეოგრაფიული აღნიშვნების გამოფენა-დეგუსტაცია გაიმართება, რომელზეც საქპატენტის მიერ დაფუძნებული ა(ა)იპ „ორიჯინ-ჯორჯია“ მუშაობს. აღნიშნული ორგანიზაციის საქმიანობა ითვალისწინებს საქართველოში გეოგრაფიული აღნიშვნით დაცვადი პროდუქტების გამოვლენას, მათ ინვენტარიზაციას, სპეციფიკაციების დადგენას და სამართლებრივი დაცვის უზრუნველყოფას. ამ დროისთვის გამოვლენილია 130-მდე პოტენციური გეოგრაფიული აღნიშვნა, რომელთა შორის არის: ტყემალი, კოლხური თხილი, რაჭული ლორი, ხარაგაულის ნიყვი, ჭოპორტის პომიდორი, ლაგოდეხის საზამთრო, კოლხური დაფნა, ხელვაჩაურის მანდარინი, ტაბაწყურის სტაფილო, მარნეულის საადრეო კარტოფილი.
კონფერენცია ორი დღე გაგრძელდება და გეოგრაფიული აღნიშვნების საერთაშორისო არასამთავრობო ორგანიზაცია OriGin და "OriGin საქართველოს“ შორის სალიცენზიო შეთანხმების ხელმოწერის ცერემონიალით დასრულდება. შეთანხმება ითვალისწინებს ფერმერებისა და მეწარმეების დახმარებას ბრენდინგის, მარკეტინგის, მენეჯმენტის საკითხებში და საერთაშორისო კონტაქტების მოძიებაში.
გეოგრაფიული აღნიშვნა არის გეოგრაფიული არეალის სახელი, რომელიც ისეთი პროდუქტის აღსანიშნავად გამოიყენება, რომლის განსაკუთრებული თვისებები და ხარისხი უშუალოდ არის განპირობებული ამ გეოგრაფიული ადგილის დამახასიათებელი (ხშირად უნიკალური) გარემო პირობებით (ნიადაგი, წყალი, ჰავა, ტრადიციული წარმოების წესი). გეოგრაფიული აღნიშვნის მატარებელი პროდუქციის ღირებულება საშუალოდ 2.5 ჯერ აღემატება ანალოგიური სხვა პროდუქტების ფასს და სარგებლობს ბაზარზე განსაკუთრებულად მაღალი მოთხოვნილებით.
საქპატენტში აცხადებენ, რომ გეოგრაფიული აღნიშვნები მნიშვნელოვან როლს ასრულებენ ქვეყნების რეგიონალურ განვითარებაში, კერძოდ მათი გამოყენება შესაბამის რეგიონებში ხელს უწყობს ახალი სამუშაო ადგილების შექმნას და შემოსავლების საგრძნობ ზრდას; ამცირებს რეგიონებიდან სამუშაო ძალის გადინებას და პირიქით, ხელს უწყობს ადგილობრივი მოსახლეობის ადგილებზე დამაგრებას; ზრდის რეგიონის ცნობადობას და ხელს უწყობს აგრარული ტურიზმის განვითარებას.
გეოგრაფიული აღნიშვნების დაცვა წარმოადგენს ევროკავშირსა და საქართველოს შორის ღრმა და ყოვლისმომცველი თავისუფალი ვაჭრობის შეთანხმების (DCFTA) ერთ-ერთ შემადგენელ ნაწილს, აგრეთვე საქართველოს სოფლის მეურნეობის განვითარების ერთ – ერთ სტრატეგიულ მიმართულებას. ამჟამად საქართველოში წარმოებული პროდუქციიდან 40-ზე მეტი (ღვინო, მინერალური წყალი, ყველი და სხვ.) რეგისტრირებულია როგორც გეოგრაფიული აღნიშვნა, რომლის დიდი ნაწილი ქართულ ექსპორტზე გადის.
