შინაგან საქმეთა მინისტრის მოადგილის, შალვა ხუციშვილის განცხადებით, შსს ახალციხეში მომხდარი ინციდენტის გამოძიებას განსაკუთრებულ ყურადღებას მიაქცევს. როგორც ხუციშვილმა ჟურნალისტებთან საუბრისას განაცხადა, დაზარალებულის ჩვენების საფუძველზე, საქმე 178-ე მუხლის პირველი ნაწილით არის დაწყებული.
"დაზარალებულმა წუხელ მისცა ჩვენება. ყველას დაკითხვა მოხდება. მინიმუმ, გამოძიებამ უნდა დაადგინოს ვინ უნდა დაკითხოს. მაგრამ მე რამდენადაც ვიცი, დღეს დილას დაგეგმილი იყო შემთხვევის ადგილის დათვალიერება, რომ ენახათ სად მოხდა, ადგილზე რამე კვალი თუ არის. ამ გამოძიებას ჩვენ განსაკუთრებულ ყურადღებას მივაქცევთ", _ განაცხადა ხუციშვილმა.
ცნობისთვის, "ნაციონალური მოძრაობის" წევრი ნიკოლოზ ხიზაძე სამცხე-ჯავახეთის გუბერნატორს და მის თანმხლებ პირებს ფიზიკური შეურაცხყოფის მიყენებაში ადანაშაულებს.
მისი თქმით, გუშინ სოფელ მუსხში "ნაციონალური მოძრაობის" მაჟორიტარი დეპუტატობის კანდიდატის წინასაარჩვნო შეხვედრის გადასაღებად მიდიოდა, რა დროსაც გუბერნატორ აკაკი მაჭუტაძის მანქანით გზა გადაუღობეს, რის შემდეგაც მას ფიზიკურად გაუსწორდა ახალციხის კეთილმოწყობის სამსახურის ყოფილი უფროსი გია ბალიაშვილი, კამერა წაართვა და ტერიტორია გუბერნატორთან და სხვა პირებთან ერთად დატოვა.
ახალციხეში მომხდარ ინციდენტთან დაკავშირებით, ხიზაძე წუხელ ღამითვე დაკითხეს.
როგორც ხიზაძემ ჟურნალისტებს დაკითხვის შემდეგ განუცხადა, შეკითხვები ძარცვის მუხლით დაწყებულ საქმესთან დაკავშირებით დაუსვეს.
"აღნიშნული ფაქტი რაც იყო, დეტალურად აღვწერე და მოვყევი. ძირითადად კითხვები შეეხო, თუ ვინ იყვნენ ადგილზე, ვინ მომაყენა შეურაცხყოფა. კამერა არ მინახავს და არ ვიცი სადაა", _ განაცხადა ხიზაძემ.
