ცესკო-ს სპიკერის ანა მიქელაძის განცხადებით მთაწმინდის მე-18 უბანზე, გუშინ, დაახლოებით 18:20 საათზე, სამი პირი მივიდა.
მათ დაცვის პოლიციას თავი წარუდგინეს როგორც საოლქო საარჩევნო კომისიის წარომომადგენლებმა, შევიდნენ საარჩევნო უბანზე, დაიწყეს საარჩევნო მასალების დათვალიერება, გადაღება, სხვადასხვა უჯრების გახსნა, სადაც ინახებოდა საარჩევნო დოკუმენტაცია.
აღნიშნულმა პირებმა გადაიღეს ამომრჩეველთა სამაგდიო სიები, რომელიც შეიცავს ამომრჩევლის პერსონალურ და პირად მონაცემებს.
„მოგვიანებით, დადგინდა, რომ აღნიშნული პირები არ იყვნენ საოლქო საარჩევნო კომისიის წარმომადგენლები, მათ ჰქონდათ დამკვირვებლისა და პარტიის წარმომადგენლობის სააკრედიტაციო ბეიჯები.
დაცვის პოლიციამ დაატოვებინა უბანი. ადგილზე მასალების გადასამოწმებლად მივიდნენ საოლქო საარჩევნო და ცენტრალური საარჩევნო კომისიის წარმომადგენლები. ადგილზე მისული იყო ასევე საარჩევნო კომისიის თავმჯდომარე. შეტყობინება შევიდა 112-ზე და შესაბამისად, გამოძახებული იყო პოლიცია. აღნიშნულ ფაქტზე მიმდინარეობს გამოძიება“,-აღნიშნა მიქელაძემ.
მიქელაძის თქმით საარჩევნო მასალა და დოკუმენტაცია უბანზე სრულყოფილი და დაუზიანებელია, თუმცა, აღნიშნული ფაქტი, კანონმდებლობის თანახმად, წარმოადგენს საარჩევნო უბანზე მოტყუებით შესვლას და უფლებამოსილების გადამეტებას.
„შესაბამისად, ჩვენ კიდევ ერთხელ მივმართავთ დამკვირველებს, საარჩევნო უბნებზე უფლების მქონე პირებს, იმოქმედონ კანონის ფარგლებში, არ გასცდნენ საკუთარ უფლებამოსილებას და ხელი შეუწყონ საარჩევნო ადმინისტრაციას საკუთარი საქმიანობის განხორციელებაში“,-განაცხადა ცესკო-ს სპიკერმა.
მიქელაძის თქმით, ვინაიდან აღნიშნულზე მიმდინარეობს გამოძიება, ამ ეტაპზე ვერ გაასაჯაროვებს ინფორმაციას, რომელ სადამკვირებლო ორგანიზაციასა და პარტიაზეა საუბარი.
„დღეს ამ უბანზე არანაირი შეფერხება არ არის, ჩვეულებრივად მიმდინარეობს არჩევნები“,-განაცხადა მიქელაძემ.
