“იტერა” დედა ტერეზა არ არის”

ოზურგეთის მუნიციპალიტეტში მცხოვრებმა, შპს “სამტრედია გაზის” ლიხაურის უბნის  აბონენტებმა, როგორც თავად თქვეს, იანვარში გაზის გადასახადი გაძვირებული ტარიფით მიიღეს _ თუ დეკემბერში  1კუბ.მ-ის ღირებულება 0,51 თეთრი იყო, იანვრის ქვითარში უკვე 0,57 თეთრია მითითებული. ბუნებრივია, ხალხმა უკმაყოფილება გამოხატა და სიტუაციაში გარკვევას შეეცადა. “იტერას” დაქვემდებარებაში მყოფ “სამტრედია გაზის” ლიხაურის უბნის უფროსის თქმით, გაზი, თურმე, 2 წელია, გაძვირებული ყოფილა და აბონენტები მაინც ძველი ტარიფით იხდიდნენ,  თუმცა, მათ პრეტენზიის გამოთქმის მიზეზი არ აქვთ, რადგან რომ მოგვესურვებინა, აქამდეც გადავახდევინებდითო (?!).
უკმაყოფილო აბონენტთა კვალდაკვალ, “გურია ნიუსმა” ჯერ ქვითრები გადაამოწმა და შეადარა, იყო თუ არა განსხვავება მითითებულ გადასახადებს შორის, რაც სიმართლე აღმოჩნდა. “იტერას” დაქვემდებარებაში მყოფ “სამტრედია გაზის” ლიხაურის უბნის უფროსი  გია ჩხატარაშვილი ადგილზე დაგვხვდა და ინტერვიუზეც დაგვთანხმდა.
_ ბატონო გია, 2011 წლის იანვრიდან გაზი ნამდვილად გაძვირდა? “სოკარის” წარმომადგენლებმა თქვეს, რომ ეს სიცრუეა…
_გაზის გაძვირება ახლა არ მომხდარა. საქართველოს ენერგეტიკის მინისტრის გადაწყვეტილებით, სეწმეკმა, კომპანიებს მისცა უფლება, 2008 წლის 1 სექტემბრიდან, ახალ აბონენტებისთვის, ანუ იმავე წლის სექტემბრიდან ვინც ჩაერთო ქსელში, გაზრდილი ტარიფით მიეყიდათ გაზი. “ლიხაურ გაზი”  ოფიციალურად 2010 წლის 10 დეკემბერს შეუერთდა “სამტრედია გაზს”. მანამდე ჩვენ არ გაგვიზრდია ფასი, დამოუკიდებელი კი ვიყავით, მაგრამ ახლა “იტერას” ვეკუთვნით, “სამტრედია გაზი” კი თავიდანვე “იტერასი” იყო. ამ წლის იანვრიდან ჩვენი არეალის აბონენტებმა მიიღეს ისეთი გადასახადი, როგორი ტარიფიც აქვს “იტერას, ” ანუ 1 კუბ.მ. 57 თეთრად.
_ ეს, თქვენი აზრით, გაძვირება არ არის?
_ ნამდვილად არ არის.
_ აბონენტებს თავიდანვე რატომ არ უთხარით, რაშიც იყო საქმე?
_ ძალიან კარგად იცოდნენ. თუ არ იცოდნენ, თქვენთან რას მორბოდნენ, ჩვენ ვერ გვკითხეს?
_ მე გეკითხებით, რატომ არ ახდევინებდით გადასახადს 2 წლის მანძილზე სეწმეკის გადაწყვეტილების მიხედვით?
_ ეს ძალიან კარგად იცოდნენ, ინკასატორებმა უთხრეს. თუ ძალიან უნდათ,  ვუანგარიშებთ და გადავახდევინებთ იმ შეღავათის საფასურს, რაც გავუწიეთ ამ ორი წლის მანძილზე(?) თუ ვინმეს არ მოსწონს ჩვენი გადასახადი, შეუძლია, გადავიდეს “სოკარში” _ იქ 1 კუბ.მ. ღირს 0,59 თეთრი. “იტერა” დედა ტერეზა არ არის, ვინმეს მუქთად ან მუდმივი შეღავათით ემსახუროს.
_ სხვა პრობლემებზეც გვინდა გესაუბროთ _ სოფლების გაზიფიცირების საქმეში, “სოკარი” უფრო უკეთეს პირობებს სთავაზობს მოსახლეობას, რაც იმაში გამოიხატება, რომ ყველა უბანში შედის. “იტერას” მხოლოდ ცენტრალური ხაზი გაჰყავს, ჩიხებში კი მოსახლეობა თვითონ აკეთებს გაზსადენს, თავისი ხარჯით, რის გამოც უკმაყოფილებას გამოთქვამენ, მაგალითად ჭანიეთში…
_ ასე არ არის. ჭანიეთელებთან ჩვენ წილობრივი წესით ვიღებთ ხარჯს. თუ არ სურთ, შევწყვეტთ, შედარებით პატარა სოფლები ისედაც არარენტაბელურია. თუ კომპანიამ მოგება ვერ ნახა, დაინტერესება აღარ ექნება. ჭანიეთში ახლახან შემოვედით და ასე უცებ ყველა ოჯახში ვერ მივალთ. ვინც შეიყვანა გაზი, საკუთარი სურვილით მოიქცა ასე. თუ არ უნდათ, ვინ დააძალა? თანხის ნაწილის გადახდაც თუ არ უნდათ, დაიცადონ და როცა ჩვენ თვითონ შევიყვანთ მთლიანი ხარჯით, მაშინ გააკეთონ.
_ ეს როდის იქნება?
_ ალბათ, 2-3 წლის შემდეგ.
კაცმა რომ თქვას, გია ჩხატარაშვილი “ძალიან შუაში” არ უნდა იყოს ამ ეშმაკურად მოფიქრებულ ფანდებში. გაზი ორი წლის წინ გაძვირებულა, თუმცა გადასახადის მომატების შესახებ ხალხს ახლა “გაუმხილეს”. როგორც ამბობენ, ეს ორწლიანი რევერანსი არჩევნებთან იყო დაკავშირებული და დანარჩენი მიზეზები თეთრი ძაფითაა ნაკერი. არანაკლებ ეშმაკურია გაზიფიკაციის დაჩქარების ტემპიც _ თუ ახლავე გსურს შეიყვანო და ამასთანავე “შუკაში” ცხოვრობ, ხარჯების უმეტესი ნაწილი შენ უნდა გაიღო. თუ დაიცდი რამდენიმე წელი (ამასობაში კი რა მოხდება, არავინ იცის), ან გაგიკეთებენ და ან _ არა. რომელი სჯობია, ვინ იცის. ეს კია, იმ ზღაპრის პერიფრაზი აუცილებლად გაგახსენდებათ, რომ ამბობს, მარჯვნივ წახვალ _ ვაია, მარცხნივ წახვალ _ უი!