გუშინ, გორში, ცნობილი მოჭიდავის, გურამ პაპიტაშვილის სახელობის სპორტულ დარბაზში გაიმართა ტრადიციული ღია პირველობა კარატეში.
შეჯიბრში მონაწილეობა მიიღეს სამეგრელოს, იმერეთის, გურიის, ქართლის და თბილისის გუნდებმა, სულ 180-მდე სპორტსმენმა. ტურნირის ორგანიზატორი გახლდათ გორის სპორტისა და კულტურის სამსახური. მას ესწრებოდა კარატეს ფედერაციის პრეზიდენტი კახა ბასილია და გორის ადგილობრივი ხელისუფლების წარმომადგენლები. შეჯიბრზე მთავარ მსაჯად მიწვეული იყო ლანჩხუთელი მერაბ თურქია, მსაჯებად კი მანუჩარ ჩხაიძე და ლაშა ბერიძე.
გურულთა ღირსებას 15 კარატისტი იცავდა, რომელთა აქტივში გორის ღია პირველობიდან რვა სხვადასხვა სინჯის მედალია: ოთხი ოქრო, სამი ვერცხლი და ერთი ბრინჯაო. ჩემპიონები გახდნენ: ლაშა ჩხაიძე, ბათა დუმბაძე, გიორგი ჩხაიძე, ლუკა ლომაძე. ვერცხლის მედლები მოიპოვეს: თიკა ლომაძემ, მერაბ ლომაძემ, ზურა ბერიძემ, ხოლო ერთადერთი ბრიჯაოს მედალი გიორგი ზენაიშვილს ხვდა წილად. გუნდი ტურნირისთვის მერაბ თურქიამ, მანუჩარ ჩხაიძემ და ლაშა ბერიძემ მოამზადეს.
,,საერთო ჯამში, კმაყოფილი ვარ. შვიდი ფინალი ვითამაშეთ და ოთხი მოვიგეთ. ცალკე აღვნიშნავ აცანის ჯგუფის კარგ გამოსვლას (მწვრთნელი მანუჩარ ჩხაიძე). ასევე, კარგი იყო ახალგაზრდა სპორტსმენების გამოსვლები. იზრდება ჯანსაღი მომავალი თაობა, რაც ძალიან მახარებს. ეს ტურნირი იყო მოსამზადებელი ეტაპი ევროპის ჩემპიონატის წინ, რომელიც 11-13 ნოემბერს ბათუმში გაიმართება. განაცხადი უკვე 22 ქვეყანს აქვს გაკეთებული. ვიმედოვნეთ, რომ ჩვენი კარატისტები ღირსეულ ბრძოლებს ჩაატარებენ’’, _ ამბობს თურქია.
