საქართველოს კულტურის პალატის პრეზიდენტმა დავით ოქიტაშვილმა, ჩოხატაურის მუნიციპალიტეტის საკრებულოს თავმჯდომარეს ზაალ მამალაძეს ოფიციალური წერილით მიმართა, რომელშიც აღნიშნულია, რომ კარგი იქნება, თუ ჩოხატაურში ახალაშენებულ ხელოვნების სასახლეს ნინო რამიშვილის სახელი მიენიჭება.
"18 ნოემბერს ჩოხატაურში იხსნება ახალი საკონცერტო დარბაზი. საქართველოს კულტურის პალატა შემოდის ინიციატივით, რომ აღნიშნულ დარბაზს ეწოდოს დიდი ქართველი ხელოვნის ქალბატონი ნინო რამიშვილის სახელი. სიმბოლურია, რომ ქალბატონი ნინო და მისი ოჯახი წარმოშობით ჩოხატაურიდან, კერძოდ კი სურებიდან არიან. ეს იქნება დიდი აღიარება და უკვდავყოფა ქალბატონი ნინო რამიშვილის სახელისა," _ აღნიშნულია დავით ოქიტაშვილის წერილში.
ჩოხატაურის მუნიციპალიტეტის საკრებულოს თავმჯდომარის ზაალ მამალაძის თქმით, ამ თემაზე კონსულტაციებს მოსახლეობასთანაც გაივლიან:
"ეს ძალიან მნიშვნელოვანი თემაა. თუკი ქართველები რაიმეთი ვართ ცნობილნი მსოფლიოში, ეს არის ქართული ცეკვა, რომლის ერთ-ერთი არქიტექტორი არის ნინო რამიშვილი. ამიტომ, მისი სახელის მინიჭება ხელოვნების სასახლისთვის ნიშანდობლივია. ვერ გეტყვით, მოესწრება თუ არა ეს ყველაფერი სასახლის გახსნამდე, მაგრამ დავიწყებთ პროცედურებს. გვინდა, ამ საკითხზე კონსულტაციები მოსახლეობასთან გავიაროთ. აქვე იმასაც გეტყვით, რომ ჩოხატაურს უამრავი სახელოვანი ადამიანი ჰყავს. ჩვენ გეგმაში ძალიან ბევრი, მნიშვნელოვანი პროექტის გახორციელება და ბევრი ობიექტის გაკეთება გვაქვს. შესაბამისად, იმ ჩოხატაურელების სახელები, რომლებმაც სხვადასხვა სფეროში მიღწეული წარმატებით ჩოხატაურის სახელი შორს გაიტანეს, უკვდავყოფილი იქნება", _ გვითხრა ზაალ მამალაძემ.
საკრებულოში, ხელოვნების სასახლისთვის ნინო რამიშვილის სახელის მინიჭების თხოვნით სხვა განცხადებებიც არის შესული. იმ ადამიანების უმრავლესობა, რომლებსაც ჩოხატაურისთვის ბევრი რამ გაუკეთებიათ, მიიჩნევენ, რომ ხელოვნების სასახლეს ნინო რამიშვილის სახელი უნდა მიენიჭოს. მათ შორის ჩოხატაურის მუნიციპალიტეტის მაჟორიტარი დეპუტატის წინა პარლამმენტში თემურ ჭკუასელი, რომლის წვლილი, სასახლის აშენებაში ძალიან დიდია. ჭკუასელმა რამდენიმე თვის წინ საჯაროდ განაცხადა, რომ მისი აზრით, ხელოვნების სასახლეს, ერთ-ერთი დიდი ხელოვნის, ნინო რამიშვილის სახელი უნდა მიენიჭოს.
შეგახსენებთ, რომ ხელოვნების სასახლის აუცილებლობაზე ჩოხატაურელები წლებია საუბრობდნენ. მათ მიერ ხელმოწერილი წერილები თითქმის ყველა სამინისტროში, ყოველწლიურად, 2006 წლის შემდეგ იგზავნებოდა, თუმცა, ეს ყველაფერი უშედეგო იყო.
2011 წელს "გურია ნიუსმა" სპეციალური კამპანია წამოიწყო და კონკრეტული შედეგიც გამოჩნდა _ 2012 წლის ზაფხულში პროექტი გაკეთდა და 2013 წლის ბიუჯეტში თანხაც ჩაისვა. თუმცა, ხელისუფლების შეცვლამ პროექტის გახორციელების ვადები გადასწია.
ახალმა ხელისუფლებამ ახალი კონკურსი გამოაცხადა და ახალი პროექტიც შედგა. ჩოხატაურის მუნიციპალიტეტის მაჟორიტარი დეპუტატის თემურ ჭკუასელის ხელშეწყობით, ცენტრალური ბიუჯეტიდან ხელოვნების სასახლის ასაშენებელი თანხებიც გამოიყო და გასულ წელს მშენებლობაც დაიწყო. თუმცა, ტენდერში გამარჯვებულმა კომპანიამ ნაკისრი ვალდებულებები ვერ შეასრულა და მშენებლობაც რამდენიმე თვის განმავლობაში შეჩერებული იყო.
რამდენიმეთვიანი პაუზა გასული წლის ბოლოს დასრულდა და ხელშეკრულება ახალ კომპანიასთან დაიდო, რომელიც ვალდებულებებს მშენებლობის გრაფიკის შესაბამისად შეასრულა და 18 ნოემბერს სასახლის გახსნაა დაგეგმილი.
