ქუთაისის რამდენიმე საჯარო სკოლის პედაგოგებმა დაწყებითი კლასების მოსწავლეთა მშობლებს სიფრთხილისკენ მოუწოდეს. როგორც "გურია ნიუსს" ერთ-ერთმა მშობელმა აცნობა, მასწავლებელმა მშობლები 2 დღის წინ დაიბარა და უთხრა, რომ ქუთაისის რამდენიმე სკოლიდან ჯერჯერობით დაუდგენელმა პირებმა ბავშვები წაიყვანეს. ფაქტს შინაგან საქმეთა სამინისტროში არ ადასტურებენ.
"გუშინ მშობლები დაგვიბარა კლასის დამრიგებელმა და გვითხრა, რომ ბავშვები გავაფრთხილოთ უცხო ადამიანებს ქუჩაში არ გაყვნენ. როგორც თქვა, ბავშვებთან ამაზე თვითონაც ისაუბრა. გვთხოვა, რომ ნათესავები ბავშვის სკოლიდან წასაყვანად არ გავუშვათ და ჩვენ თვითონ მივაკითხოთ. რა თქმა უნდა, დავინტერესდით, რას უკავშირდებოდა ასეთი გაფრთხილება, რაზეც გვიპასუხა, რომ გავრცელებული ინფორმაციით, ქუთაისის რამდენიმე სკოლიდან 3 ბავშვი დაიკარგა. ბავშვები ჯერჯერობით დაუდგენელმა პირებმა სკოლიდან გაიყვანეს. მასწავლებლის თქმით, უცნობებს საეკლესიო ტანსაცმელი ეცვათ – მოძღვრის და მონაზვნის. არ ვიცი ეს ინფორმაცია რამდენად სანდოა, მაგრამ რადგან მასწავლებლები გვაფრთხილებენ, ვფიქრობ, უყურადღებოდ არ უნდა დავტოვოთ", _ აცხადებს მშობელი, რომელიც ვინაობის დასახელებისგან თავს იკავებს.
მსგავსი ინფორმაცია აქვს ქუთაისის კიდევ ერთი სკოლის მოსწავლის მშობელს. როგორც ის აცხადებს. ქალაქში ამ თემაზე უკვე ბევრი ადამიანი საუბრობს.
"ჩემი შვილი დაწყებით კლასში აღარ არის, მაგრამ მშობლებმა მომაწოდეს ეს ინფორმაცია, თითქოს რამდენიმე სკოლიდან ბავშვები დაიკარგნენ", _ აცხადებს ირმა მუზოშვილი.
"გურია ნიუსმა" აღნიშნული ინფორმაცია ქუთაისის საგანმანათლებლო რესურსცენტრის ხელმძღვანელთან, ბადრი ვაშაკიძესთან გადაამოწმა. ვაშაკიძის თქმით, მას მსგავსი ინფორმაცია არ აქვს.
"არა, არა. არაფერი მსმენია", _ აცხადებს ვაშაკიძე.
კითხვაზე: მაშინ რატომ აფრთხილებენ პედაგოგები მშობლებს? _ რესურსცენტრის ხელმძღვანელი გვპასუხობს:
"არ ვიცი რა ინფორმაცია ჰქონდა მასწავლებელს, მაგრამ ჩემთან მსგავსი შეტყობინება შემოსული არ არის. მაინც გადავამოწმებ", _ ამბობს ვაშაკიძე.
აღნიშნულთან დაკავშირებით შინაგან საქმეთა სამინისტროში აცხადებენ, რომ ინფორმაცია სინამდვილეს არ შეესაბამება.
"დეზინფორმაცია გავრცელდა. არცერთი სკოლიდან ბავშვის დაკარგვის ფაქტი არ ყოფილა. რამდენიმე დღის წინაც გავრცელდა და დეზინფორმაციაა", _ ამბობენ უწყებაში.
