ჩოხატაურის მუნიციპალიტეტის 2017 წლის ბიუჯეტის პროექტის თანახმად, რომელიც საკრებულოში ჯერ არ შესულა, მომავალი წლის ბიუჯეტი 6 მილიონ 117,5 ათასი ლარი იქნება.
ბიუჯეტში ხარჯები 6 მილიონ 88.6 ათასი ლარია. საკრებულოს, გამგეობის და თავდაცვის უწყების თანამშრომელთა შრომის ანაზღაურებაზე მომავალ წელს 1 მილიონ 581.6 ათასი ლარია გათვალისწინებული.
პროექტის მიხედვით, სოციალური უზრუნველყოფისთვის დაიხარჯება 557 ათასი ლარი; საქონლის და მომსახურების ხარჯი შეადგენს 879.0 ათას ლარს; შტატგარეშე მომუშავეთა ანაზღაურებაზე 126.6 ათასი ლარია გათვალისწინებული; მივლინებებზე _ 22.4 ათასი; ოფისის ხარჯებისთვის _ 220.1 ათასი ლარი, ხოლო წარმომადგენლობითი ხარჯებისთვის _ 10.8 ათასი ლარი.
მომავალი წლის ბიუჯეტის პროექტში, არაფინანსური აქტივების მუხლში 28.9 ლარია გათვალისწინებული; გაუთვალისწინებელი გადასახდელების დაფინანსების მიზნით სარეზერვო ფონდი 100,0 ათასი ლარი იქნება, რომელსაც გამგებელი ერთპიროვნულად განკარგავს.
მომავალი წლის ბიუჯეტის პრიორიტეტი ინფრასტრუქტურაა:
"გაგრძელდება საგზაო ინფრასტრუქტურის მშენებლობა-რეაბილიტაცია, კულტურის სახლების მშენებლობა, მუნიციპალური ინფრასტრუქტურის მშენებლობისა და რეაბილიტაციის გარდა, პრიორიტეტის ფარგლებში გახორციელდება არსებული ინფრასტრუქტურის მოვლა-შენახვა და დაფინანსდება მის ექსპლოატაციასთან დაკავშირებული ხარჯები. დაბაში მოწესრიგდება საგზაო მოძრაობის ნიშნები; უზრუნველყოფილი იქნება მუნიციპალიტეტის დასუფთავება", _ აღნიშნა ჩვენთან საუბრისას ჩოხატაურის მუნიციპალიტეტის გამგებელმა ირაკლი კუჭავამ.
მისივე თქმით, მომავალი წლის ბიუჯეტის კიდევ ერთი მთავარი პრიორიტეტი მოსახლეობის ჯანმრთელობის დაცვა და სოციალური უზრუნველყოფაა:
"მუნიციპალიტეტი, არსებული რესურსების ფარგლებში, განაგრძობს სოციალურად დაუცველი მოსახლეობის სხვადასხვა დახმარებებით უზრუნველყოფას. ერთიანი სახელმწიფო პოლიტიკის ფარგლებში გაგრძელდება საზოგადოებრივი ჯანმრთელობის დაცვის მიზნით ადგილობრივ დონეზე სხვადასხვა ღონისძიებების გახორციელება; 2017 წელს გაგრძელდება მუნიციპალიტეტის ტერიტორიაზე მცხოვრები მოსახლეობის სხვადასხვა ფენებისთვის სოციალური დახმარებებით უზრუნველყოფა, როგორც სახელმწიფო ბიუჯეტიდან გამოყოფილი, ასევე, მუნიციპალიტეტის ბიუჯეტით გათვალისწინებული თანხებით. პროგრამა ითვალისწინებს სარიტუალო მომსახურების ხარჯების ანაზღაურებას, მოხუცებულთა, მიუსაფართა და სოციალურად დაუცველ პირთა მდგომარეობის გაუმჯობესებას, მრავალშვილიანი ოჯახების დახმარებას, დევნილთა და ტერიტორიული მთლიანობისთვის დაღუპულთა ოჯახების დახმარებას, სტიქიის შედეგად დაზარალებულთა დახმარებას, სამედიცინო მომსახურების თანადაფინანსებას და სხვა სოციალურ ღონისძიებებს, რომლებიც მთლიანობაში უზრუნველყოფენ მუნიციპალიტეტის მოსახლეობის სოციალური მდგომარეობის გაუმჯობესებას," _ ამბობს ირაკლი კუჭავა.
მომავალი წლის ბიუჯეტში მძიმე საცხოვრებელ პირობებში მყოფი, უბედური შემთხვევისა და სტიქიური მოვლენების შედეგად უსახლკაროდ დარჩენილი ოჯახების დახმარების პროგრამის ფარგლებში, გათვალისწინებულია დახმარება გაეწიოს სტიქიური მოვლენების შედეგად დაზარალებულ ოჯახებს _ 5 000 ლარამდე ერთჯერადად, ხოლო დროებით თავშესაფრის უზრუნველყოფისთვის _ ბინის ქირა, არა უმეტეს 110 ლარისა.
ქვეპროგრამით დახმარება ეძლევა სამაჩაბლოდან და აფხაზეთიდან დევნილ ოჯახებს ზამთრისთვის სათბობის შეძენაზე 200 ლარი, სხვა აუცილებლობიდან გამომდინარე არა უმეტეს 100 ლარისა; დაკრძალვის ხარჯი ერთჯერადად _ არა უმეტეს 250 ლარისა.
დახმარება მიეცემა 9 აპრილს საქართველოს დამოუკიდებლობის მოთხოვნით გამართული მშვიდობიანი აქციის დარბევის, აფხაზეთის კონფლიქტისა და სამაჩაბლოში 2008 წლის 8 აგვისტოს გახორციელებული აგრესიის შედეგად დაღუპულთა ოჯახებს; მომავალი წლის ბიუჯეტიდან ისევ დაფინანსდება ფენილკეტონურიით დაავადებული ბავშვები (12,0 ათასი ლარი); 18 წელს ზევით ასაკის პირები, რომელთა სარეიტინგო ქულა 65 000-დან 200 000 -ის ჩათვლითაა, დახმარებას მიიღებენ სტაციონარული სამედიცინო მომსახურებისთვის და მედიკამენტების შესაძენად (50,0 ათასი ლარი); 18 წელს ზევით ასაკის შ.შ.მ პირების სტაციონარული სამედიცინო მომსახურებისთვის და მედიკამენტების შესაძენად მომავალი წლის ბიუჯეტში, პროექტის თანახმად, 12,0 ათასი ლარია გათვალისწინებული; ონკოლოგიური დაავადებით დაავადებულთა სტაციონარული სამედიცინო მომსახურების, მედიკამენტების შეძენის და ოპერაციის შემდგომი გამოკვლევების ხარჯებისთვის _ 35,0 ათასი ლარი; მეორე მსოფლიო ომის ვეტერანების და ომში დაღუპული ქვრივებისადმი სტაციონარულ სამედიცინო მომსახურების და მედიკამენტების შეძენის ხარჯი 5,1 ათასი ლარით არის განსაზღვრული; 0-დან 18-წლამდე ასაკის პირების სტაციონარული სამედიცინო მომსახურების ხარჯების მუხლში 7.1 ათასი ლარია; თირკმლის უკმარისობით დაავადებული პირებისადმი დახმარება, რომლებიც გადიან დიალეზის კურსს, გათვალისწინებულია 18,5 ათასი ლარი. მომავალ წელს ასევე დაფინანსდება ა(ა)იპ განათლების ცენტრი 13,0 ათასი ლარით; გულის თანდაყოლილი პათოლოგიით (გულის მანკი) დაავადებული 0-დან 18-წლამდე ასაკის პირთა ოჯახების დახმარებისთვის 6,0 ათასი ლარია გამოყოფილი; 0-დან 18-წლამდე ასაკის შ.შ.მ. პირების მედიკამენტების შეძენის ხარჯი გათვალისწინებულია _ 7,0 ათასი ლარით; ეპილეფსიით დაავადებული ბავშვების ოჯახების დახმარებისთვის _ 10,2 ათასი ლარი; საინვესტიციო პროგრამების თანადაფინანსებისთვის _ 60.5 ათასი ლარი; ჰემოფილიით დაავადებულ ბავშვთა და მოზრდილთა დახმარებისთვის _ 1,8 ათასი ლარი.
როგორც მიმდინარე და წინა წლებში, წელსაც დახმარება გაეწევათ მრავალშვილიანი (4 და მეტი 18 წლამდე ასაკის ბავშვები) ოჯახებს და ამისთვის მომავალი წლის ბიუჯეტში 28,0 ათასი ლარია გამოყოფილი; ახალშობილთა ოჯახებზე დახმარებაზე _ 20,0 ათასი ლარი; დედ-მამით ობოლი ბავშვების დახმარებისთვის _ 2,4 ათასი ლარი; მარტოხელა (უპატრონო) პირთა სარიტუალო მომსახურებისთვის _ 2,5 ათასი ლარი; ხანდაზმულ პირთა დახმარებისთვის _ 2,4 ათასი ლარი; მძიმე ეკონომიკურ პირობებში მყოფი ოჯახების დახმარებისთვის _ 90,0 ათასი ლარი; მეორე მსოფლიო ომის ვეტერანების და ომში დაღუპულთა ქვრივებისადმი მატერიალური მხარდაჭერა, სადღესასწაულოდ ფაშიზმზე გამარჯვების 72-ე წლისთავთან დაკავშირებით, ასევე მათთვის ზამთრის სეზონისთვის სათბობის შეძენაზე დახმარებისთვის გათვალისწინებულია 5,5 ათასი ლარი; 0-დან 18-წლამდე ასაკის შ.შ.მ პირების ოჯახების დახმარებისთვის (კომუნალური გადასახადი) 25,2 ათასი ლარია გამოყოფილი.
მომავალი წლის ბიუჯეტში თანხა გათვალისწინებულია დაბის არქიტექტურული იერსახის კონცეფციის შესაქმნელად საჭირო პროექტების დასაფინანსებლად; სოფლის მეურნეობის განვითარებისთვის; იმის მიუხედავად, რომ სახელმწიფო პროგრამა არსებობს, თანხა გათვალისწინებულია სასოფლო-სამეურნეო კოოპერატივების მხარდაჭერისთვის; მუნიციპალიტეტის ტერიტორიაზე არსებული ეკლესია-მონასტრების დაფინანსებისთვის.
სოლიდური იქნება არასამეწამეო არაკომერციული იურიდიული პირების დაფინანსებაც. ისინი ჩოხატაურის მუნიციპალიტეტის ბიუჯეტიდან, პროექტის თანახმად სუბსიდიის სახით 3 მილიონ 7 ათას ლარს მიიღებენ, რომლის 80%, ტრადიციისამებრ, ხელფასებზე იხარჯება (გამონაკლისი მხოლოდ ბაღების გაერთიანებაა, სადაც ყველაზე დაბალი ანაზღაურებაა და რომლის ბიუჯეტის დიდი ნაწილი აღსაზრდელების კვებაზე იხარჯება).
აღსანიშნავია, რომ ჩოხატაურში 14 ააიპი ფუნქციონირებს და მასში 450-მდე ადამიანია დასაქმებული.
