“სსა-ს რეგისტრაციიდან მოხსნის შესახებ წარდგენილ განცხადებაში მითითებული უნდა იყოს სსა-ს საგადასახადო ორგანოში რეგისტრაციის ნომერი და თარიღი. რეგისტრაციიდან მოხსნისათვის, განმცხადებელმა განცხადებასთან ერთად საგადასახადო ორგანოს ან იურიდიულ პირს უნდა წარუდგინოს სსა. რეგისტრაციიდან მოხსნის მიზნით, ხორციელდება სსა-ის გაუნაშთავი ჯამის (აპარატის მაჯამებლის მაჩვენებლის ფიქსაცია) ამობეჭდვა რეგისტრაციის დღიდან მოხსნის დღემდე (გარდა GPღშ და ცრყპტო-ს მოდულის ფისკალური სსა-ის რეგისტრაციიდან მოხსნის შემთხვევისა) და მონაცემთა ერთიან კომპიუტერულ ბაზაში კეთდება აღნიშვნა სსა-ის რეგისტრაციიდან მოხსნის შესახებ. პირს, განცხადების მიღებიდან არა უგვიანეს 1 სამუშაო დღის ვადაში, გადაეცემა სსა და ცნობა მისი რეგისტრაციიდან მოხსნის შესახებ (დანართი Z6), რომელშიც ასახულია ინფორმაცია რეგისტრაციიდან მოხსნის თარიღის, გაუნაშთავი ჯამის და ,,ძ“ ანგარიშის რაოდენობის შესახებ,” _ აღნიშნულია ბრძანებაში.
ამ ბრძანების პარალელურად, გავრცელდა ინფორმაცია, რომ მეწარმეები, აპარატების რეგისტრაციიდან არ მოხსნის შემთხვევაში, 3000 ლარით დაჯარიმდებიან.
ამ ინფორმაციას კატეგორიულად უარყოფს გურიის საგადასახდო სამსახურის უფროსი, ანტონ ბარამიძე. მისი თქმით, ძველი სალარო აპარატის რეგისტრაციიდან მოხსნა სავალდებულოა, თუმცა ჯარიმას არ ექვემდებარება:
_ არანაირი ჯარიმა არ ეკისრებათ. თუმცა, ყველა მეწარმეს აქვს ვალდებულება, რომ ძველი აპარატი რეგისტრაციიდან მოხსნას და 6 წლის მანძილზე შეინახოს. ეს არის ჩვეულებრივი, ბუღალტრული დოკუმენტაცია, _ გვითხრა ბარამიძემ.
ექსპერტი, საგადასახადო საკითხებში, ირაკლი შავიშვილი, ჩვენთან საუბრისას ამბობს, რომ ამ საკითხის შესახებ ინფორმაციას არ ფლობს.
_ ვერაფერს გეტყვით, ამგვარ ცვლილებას არ ვიცნობ, _ გვითხრა შავიშვილმა.
მიუხედავად იმისა, რომ გურიის საგადასახადო სამსახურის უფროსი, ჯარიმის ალბათობას გამორიცხავს, “გურია ნიუსმა” მოიპოვა დოკუმენტი, რომელშიც ნათლად არის განმარტებული, რომ ძველი სალარო აპარატის რეგისტრაციიდან მოუხსნელობის შემთხვევაში, ჯარიმა 3000 ლარით არის განსაზღვრული. აღსანიშნავია ისიც, რომ აღნიშნული დოკუმენტები, საჯარო არ არის და მეწარმეებმა არც კი იციან, რომ ამგვარი ვალდებულება ეკისრებათ. ისიც საგულისხმოა, რომ როცა ახალი სალარო აპარატები დაურეგისტრირეს, მეწარმეები არც კი გაუფრთხილებიათ, რომ ძველი სალარო აპარატები ფინანსურ დოკუმენტს წარმოადგენდა და მისი შენახვა სავალდებულო იყო მფლობელებისგან. ახალი სალარო აპარატების რეგისტრირებისას, მეწარმეების ეუბნებოდნენ, რომ ძველი აპარატი აღარაფერში გამოდგებოდა; ჩვენ ვნახეთ მეწარმე, რომელმაც აპარატი შვილებს სათამაშოდ სახლში წაუღო, ახლა კი, 3000-ლარიანი ჯარიმა ელოდება!
ჩვენი წყაროს ინფორმაციით, საგადასახადო სამსახური არაფერს აკეთებს იმისთვის, რომ მეწარმეებმა ეს ინფორმაცია გაიგონ. საგადასახადო სამსახურის თანამშრომლები ამ ბრძანების შინაარსს და მოსალოდნელ 3000-ლარიანი ჯარიმის საფრთხეს გასაცნობად მხოლოდ ახლობლებს უგზავნიან მესიჯებით.
ზემოთ ნახსენებ დოკუმენტში იმ ორგანიზაციების ჩამონათვალიცაა, რომლებიც ძველი აპარატების რეგისტრაციიდან მოხსნას ახორციელებენ. ჟურნალისტებთან საუბარი არცერთი კომპანიის წარმომადგენელს არ სურს და ფინანსთა სამინიტროში გვამისამართებენ, სადაც ტელეფონს არც “ცხელ ხაზზე” და არც სხვა მითითებულ ნომერზე არ პასუხობენ.
ამის გამო, დოკუმენტში მითითებულ რამდენიმე ორგანიზაციაში მეწარმის სახელით დავრეკეთ. ყველგან დაგვიდასტურეს, რომ აპარატის რეგისტრაციიდან მოუხსნელობა 3000 ლარით ჯარიმდება. აღნიშნული კომპანიებიდან ერთ-ერთია შპს “ლ.ბ. ინვეტს ჯგუფი”, რომელიც საქართელოს სხვადასხვა ქალაქში აპარატების რეგისტრაციიდან მოხსნას 5 ლარად ახორციელებს. მათ შორის,Lლანჩხუთში, ნინოშვილის ქუჩა #56-ში.
მითითებულ ნომერზე გ.ზოიძემ გვიპასუხა, რომელიც მისი თქმით, ამ საკითხებში გარკვეული პირია.
_ ბატონო გელა, როგორც გვითხრეს, 2013 წლის 1 იანვრამდე ძველი აპარატები რეგისტრაციიდან უნდა მოიხსნას. რომ არ მოვხსნათ მართლა 3000-ლარიანი ჯარიმაა?
_ მასე წერია კანონში და მოხსნა არ არის რთული პროცედურა. რეგისტრაციიდან უნდა მოიხსნას, ბაზაში უნდა შევიდეს მონაცემები, ზე ჩეკი უნდა ამოვიდეს და მეხსიერება დარჩება იმ კომპანიაში სადაც ეს გაკეთდა.
_ შეგიძლიათ გვითხრათ რომელი კანონია და რატომ არ იცოდნენ მეწარმეებმა ამის შესახებ?
_ როგორ არა. ეს შემოსავლების სამსახურმა გააცნო მეწარმეებს. არ ვიცი, ალბათ გამოქვეყნებულიც იქნებოდა.
_ სად გააცნეს? მე ახლა გავიგე _ ისიც მეზობლიდან…
_ ტექნიკური დეტალები ზუსტდება და შემდეგ ყველას ეცნობება.
_ რას ნიშნავს დეტალები ზუსტდება, აკი კანონი არსებობს?…
_ კანონი არსებობს, უბრალოდ, ახლა ტექნიკურ მომსახურებას ვინ გაუწევს ეს ზუსტდება. თქვენ სად მუშაობთ, რომელ ორგანიზაციაში?
_ ინდმეწარმე ვარ ჩოხატაურიდან.
_ კანონის მიხედვით, წლის ბოლომდე არის ვადა. მოხსნა ეღირება 5 ლარი, ეს არის ოფიციალური გადასახდელი და პლიუს ტექნიკური მომენტი, როცა აპარატი უნდა გაიხსნას, ბლოკი ამოიღოს…
_ სულ რა ჯდება მოხსნა?
_ 3000 ლარია ჯარიმა, თუ არ მოხსნიან.
_ ჯარიმას არ ვგულისხმობთ. გვაინტერესებს მოხსნა რა ჯდება?
_ მაქსიმუმ, 15 ლარი დაგიჯდებათ.
_ თქვენ ხელშეკრულებით ასრულებთ ამ მომსახურებას თუ როგორაა?
_ ჩვენ, როგორც დისტრიბუტორები ისე ვართ. აპარატები ჩვენ შემოგვქონდა. ამ კომპანიას, შპს “L.B IVESTS ჯგუფს” აქვს შემოსავლების სამსახურიდან დავალებული, რომ მან განახორციელოს მოხსნა რეგისტრაციიდან.
მსგავსს დეტალებს გვიყვებიან სხვა კომპანიებშიც. მიუხედავად ბევრი მცდელობისა, ვერ დავადგინეთ, რატომ მალავს შემოსავლების სამსახური ამ ინფორმაციას და რატომ არ უთხრეს მეწარმეებს, რომ ძველი სალარო აპარატის რეგიტრაციიდან მოუხსნელობა 3000-ლარიანი ჯარიმით ისჯება.
