იუსტიციის სამინისტროს საჯარო რეესტრის ეროვნული სააგენტოს რეგიონული მართვის სამსახურის უფროსმა ზვიად ტალაკიძემ ლანჩხუთის მუნიციპალიტეტის გამგეობის სხდომათა დარბაზში შეხვედრა გამართა და იმ პრობლემის შესახებ ისაუბრა, რაც მოქალაქეებს მიწის დარეგისტრირებასთან დაკავშირებით ხშირად ექმნებათ.
შეხვედრას მუნიციპალიტეტისა და ადმინისტრაციული ერთეულების ხელმძღვანელები ესწრებოდნენ.
ზვიად ტალაკიძემ, პირველ რიგში, სასოფლო-სამეურნეო საკუთრების უფლების მოპოვების საკითხზე და ადგილმდებარეობის დადასტურების შესახებ საჭირო დოკუმენტაციის მოპოვების თაობაზე ისაუბრა. სტუმრის თქმით, სასოფლო-სამეურნეო მიწის ნაკვეთის დარეგისტრირების პრობლემას, ხშირ შემთხვევაში, ნახაზის არასწორად შედგენა იწვევდა. ასევე, მისივე თქმით, არსებობს მეორე პრობლემა, რაც ფინანსურ მხარეს უკავშირდება:
"მოსახლეობა ვერ ახერხებდა მიწის დარეგისტრირებას, რადგან ეს ყველაფერი გარკვეულ ფინანსებთან იყო დაკავშირებული", _ დასძინა ტალაკიძემ საკითხზე საუბრისას.
შეხვედრისას ზვიად ტალაკიძემ აღნიშნა, რომ ამჯერად მოქალაქეებს ოთხი დღის ვადაში შესაძლებლობა აქვთ უფასოდ მიიღონ, როგორც აზომვითი ნახაზი, ასევე, საჭიროების შემთხვევაში, საარქივო დოკუმენტაციაც.
"იმისთვის, რომ კონკრეტულ სასოფლო-სამეურნეო მიწის ნაკვეთზე დარეგისტრირდეს საკუთრების უფლება, აუცილებელია მოხდეს ამ უფლების რეგისტრაცია საჯარო რეესტრში. მხოლოდ ამის შემდეგ შეეძლება მესაკუთრეს თავისი შეხედულებისამებრ განკარგოს მის საკუთრებაში არსებული მიწის ნაკვეთი. საკუთრების უფლების რეგისტრაციისთვის დაინტერესებულმა პირმა უნდა მიმართოს იუსტიციის სახლის ან საჯარო რეესტრის ეროვნული სააგენტოს ნებისმიერ ოფისს და წარადგინონ კანონმდებლობით დადგენილი დოკუმენტები.
სასოფლო-სამეურნეო მიწის ნაკვეთზე საკუთრების უფლების პირველადი რეგისტრაცია და დაუზუსტებელი საკადასტრო მონაცემების დაზუსტება (გარდა თვითმმართველი ქალაქების ადმინისტრაციულ საზღვრებსა და რეკრეაციულ ტერიტორიებზე მდებარე სასოფლო-სამეურნეო დანიშნულების მიწის ნაკვეთებისა) წარმოებს მომსახურების საფასურის გადახდის გარეშე 4 სამუშაო დღის ვადაში", _ ითქვა შეხვედრისას.
