ოზურგეთის ყოფილი გამგებელი, რომელმაც 2011 წლის 22 დეკემბერს გამართულ სასამართლო სხდომაზე ბრალი სრულად აღიარა, დღეს თავისუფალია.
“2 000 ხმა თავისუფლების სანაცვლოდ?” _ ზუსტად 2 თვის წინ, ამ სათაურით გამოქვეყნდა სტატია “გურია ნიუსის” ვებგვერდზე.
სტატიაში ჩვენს წყაროზე დაყრდნობით ვწერდით, რომ ოზურგეთის ყოფილ გამგებელს, გიორგი ტაკიძეს, რომელსაც საპროცესო შეთანხმების შედეგად ორწელიწადნახევარი მიესაჯა თბილისის საქალაქო სასამართლოს მიერ, ციხიდან უშვებდნენ. ამავე წყაროს ცნობით, ტაკიძის გამოშვება მოახლოებულ არჩევნებს უკავშირდებოდა _ გამოსვლის შემდეგ, მას, მინიმუმ, 2 000 ხმა უნდა შეეგროვებინა ხელისუფლებისთვის.
წყარო ამტკიცებდა, რომ წინასაარჩევნო თავისუფლებას თავისი პარტიული მიზანი ჰქონდა: სახელისუფლებო პარტიას ნატანებში, სადაც გიორგი ტაკიძე ცხოვრობს, საკმაოდ სერიოზული პრობლემები აქვს და ყოფილი გამგებლის დახმარება სწორედ აქ დასჭირდათ _ ადგილობრივი თვითმმართველობის არჩევნებში, ნატანების თემში, სადაც გიორგი ტაკიძე “ერთიანი ნაციონალური მოძრაობის” სიით მაჟორიტარად იყრიდა კენჭს, ყოფილ გამგებელს საკმაოდ მაღალი მაჩვენებელი ჰქონდა.
გიორგი ტაკიძის სასამართლო პროცესებზე, რომელსაც “გურია ნიუსი” სისტემატურად აშუქებდა, გურიის გუბერნატორის, ვალერი ჩიტაიშვილისა და მისი მოადგილის, ლელა თავართქილაძისთვის, თვალი ნამდვილად არ მოგვიკრავს.
“გურია ნიუსის” ინფორმაციით, ერთიც და მეორეც, ციხიდან გამოსულ გიორგი ტაკიძესთან სტუმრად იმყოფებოდნენ. ამას ჩვენთან საუბრისას გიორგი ტაკიძის მეზობლებიც ადასტურებენ. რაც შეეხება თავად ლელა თავართქილაძეს, მისი კომენტარი სტუმრობასთან დაკავშირებით, ასეთი მრავალმნიშვნელოვანია: _ ეს ჩემი პირადი საქმეა და არ ვაპირებ მაგ თემაზე საუბარს, გმადლოოობთ! _ გვითხრა თავართქილაძემ და ტელეფონი გაგვითიშა.
ინფორმაციის დასაზუსტებლად, თავად გიორგი ტაკიძეს დავუკავშირდით.
_ ბატონო გია, რამდენიმე შეკითხვა გვაქვს.
_ ყველაფერი დევს თქვენს ვებგვერდზე, რაღა უნდა მკითხოთ?
_ ის რაც არ დევს და არსად თქმულა, ბატონო გია.
_ ჰო, აბა, გისმენთ
_ როგორც ვიცით, მოულოდენლად გამოგიშვეს, ისე, რომ არაფერი უთქვამთ წინასწარ.
_ კი, ნამდვილად.
_ უცებ გაგიღეს ციხის კარები და “ჩუსტებით” გამოხვედით, ასე იყო?
_ კი, კი, მასე იყო.
_ ფული არ გქონდათ და გარეთ გამოსულმა ტაქსისტს თხოვეთ, სახლში, ოზურგეთში ჩაეყვანეთ?
_ კი, კი, ნამდვილად მასე იყო.
_ სახლში ისე მოხვედით, მეუღლემ არაფერი იცოდა, ტაქსისტის ტელეფონით რეკავდით მეუღლესთან.
_ კი კი ნამდვილად მასე იყო ყველაფერი, როგორც ამბობთ.
_ ერთ შეკითხვა ბატონო გია, ლელა თავართქილაძე და ვალერი ჩიტაიშვილი იყვნენ თქვენთან სახლში, სუფრაზე?
_ რა მნიშვნელობა აქვს, იყვნენ თუ არა? სუფრაზე არ ყოფილან ნადვილად, თორემ არ დაგიმალავდით.
P.S. ციხიდან ტაქსით წამოსული გიორგი ტაკიძე მეუღლეს პერიოდულად ურეკავდა. ჭიშკართან მისულმაც დაურეკა და მეუღლემ უპასუხა: _ ვიღაც მოვიდა ამ შუაღამისას და გავხედავო.
გარეთ გასულს, მეუღლე დახვდა…
