ბახმარო ზამთრის ექსტრემალური სპორტის მოყვარულებს და პროფესიონალებს ევროპის ქვეყნებიდან წელს პირველად უმასპინძლებს. კურორტს დეკემბერში 60 ევროპელი ტურისტი და მედიის წარმომადგენელი ეწვევა და მოხდება მისი, როგორც სათხილამურო კურორტის ათვისება.
წლის დასაწყისში საქართველოს მთავრობამ კურორტ "ბახმაროს"განვითარება ერთ-ერთ მთავარ პრიორიტეტად დაასახელა.
"ძალიან მნიშვნელოვანია, რომ ასეთი კურორტების პოტენციალი იქნას ბოლომდე ათვისებული, რადგან ტურიზმი გახლავთ ჩვენი ერთ-ერთი უმთავრესი დარგი", _ განაცხადა საქართველოს პრემიერ-მინისტრმა გიორგი კვირიკაშვილმა.
მანვე სამთავრობო კომისიაც შექმნა, რომლის ხელმძღვანელი ვიცე-პრემიერი დიმიტრი ქუმსიშვილია.
პრემიერმა, სპეციალური განკარგულებით რეგიონული განვითარებისა და ინფრასტრუქტურის სამინისტროს დაავალა, მისი სახელმწიფო საქვეუწყებო დაწესებულების _ საავტომობილო გზების დეპარტამენტის მეშვეობით, შეისწავლოს ბახმაროს საკურორტო ზონისკენ მისასვლელი საავტომობილო გზები, საავტომობილო გზების მდგომარეობის გაუმჯობესების და შემდგომში, გზების მშენებლობის საჭიროებების განსაზღვრის მიზნით.
საჭიროებების განსაზღვრისა და ეკონომიკისა და მდგრადი განვითარების სამინისტროს მომართვის შემდეგ, რეგიონული განვითარებისა და ინფრასტრუქტურის სამინისტრომ უნდა უზრუნველყოს ამავე გზების მდგომარეობის გაუმჯობესება/მშენებლობა, წყალმომარაგებისა და წყალარინების ინსფრასტრუქტურის შექმნა.
გარემოს და ბუნებრივი რესურსების დაცვის სამინისტრომ ბახმაროსკენ მისასვლელ გზებზე მეწყრული პროცესებისა და მათი გამომწვევი მიზეზების, ზვავსაშიშროებისა და ქარის ნაკადების კვლევა უნდა ჩაატაროს.
ენერგეტიკის სამინისტრომ ბახმაროს საკურორტო ზონის ელექტროენერგიითა და ბუნებრივი აირის მომარაგების პროექტები უნდა შეადგინოს და შემდგომში მათი გახორციელება/კოორდინაცია უნდა უზრუნველყოს.
გიორგი კვირიკაშვილის განკარგულების თანახმად, სახელმწიფო ქონების ეროვნულმა სააგენტომ და საჯარო რეესტრმა უნდა უზრუნველყონ, ხოლო ჩოხატაურის მუნიციპალიტეტს ეთხოვოს ამავე მუნიციპალიტეტის ადმინისტრაციულ საზღვრებში განთავსებული ბახმაროს საკურორტო ზონაში მდებარე უძრავი ქონების კადასტრისა და მიწათმოწყობის ერთიანი სისტემის ორგანიზება მიწის ნაკვეთების საკადასტრო მონაცემების სრულყოფის მიზნით.
ეკონომიკისა და მდგარი განვითარების სამინისტრომ კი უნდა უზრუნველყოს ბახმაროს სარეკრეაციო ტერიტორიის გამოყენებისა და განაშენიანების რეგულირების წესებისა და მიწათსარგებლობის გენერალური გეგმის დამტკიცების შესახებ მთავრობის 2014 წლის 14 აგვისტოს დადგენილებით დამტკიცებული ბახმაროს სარეკრეაციო ტერიტორიის მიწათსარგებლობის გენერალური გეგმის სისტემური ანალიზი, გამოვლენილი ნაკლოვანებების აღმოფხვრის მიზნით, შესაბამისი პროექტის მომზადება და მთავრობისთვის წარდგენა.
ყველა უწყებას ბახმაროს განვითარების გეგმაზე მუშაობა დაწყებული აქვს და მომავალი წლისთვის კონკრეტული გეგმაც გახდება ცნობილი. თუმცა, მანამდე უნიკალური 
კორორტით უცხოელი ბიზნესმენებიც დაინტერესდნენ.
უფრო კონკრეტულად კი შვეიცარიელი ბიზნესმენი ინგუ შლუტიერი, რომელიც კურორტზე რამდენჯერმე იმყოფებოდა.
_ ეს პირველი შემთხვევაა, როცა ბახმაროს პოტენციალით უცხოელები დაინტერესდნენ და ისიც ზამთარში. დეკემბრის შუა რიცხვებში ბახმაროში სამოცკაციანი დელეგაცია ეწვევა და მარტის ბოლომდე დარჩება. ისინი კურორტის სპეციფიკას, სათხილამურო ტრასებს შეისწავლიან და ამის შემდეგ სამომავლო გეგმებზეც ისაუბრებენ, _ ამბობს კურორტ ბახმაროს დირექტორი დავით საჯაია, რომელიც უცხოელების დასახვედრად განსაკუთრებულად ემზადება:
_ რამდენიმე დღეში ინვესტორი საქართველოში ჩამოიტანს სპეციალურ ტექნიკას, რომლითაც ბახმაროში შესაძლებელი იქნება გადაადგილება. კურორტზე ჩართულია ანძა, ელექტროენერგია _ ერთი სიტყვით, ინვესტორებს ყველანაირ პირობას შევუქმნით, რომ ოთხი თვის განმავლობაში კურორტის შესწავლა კარგად მოახერხონ, _ ამბობს საჯაია.
მისივე თქმით, ამ პროექტის წარმატებით გახორციელებაში დიდი წვლილი მიუძღვის საქართველოს მთავრობას, გურიის გუბერნატორს გია სალუქვაძეს, ჩოხატაურის მუნიციპალიტეტის გამგებელს ირაკლი კუჭავას, ჩოხატაურის მუნიციპალიტეტის საკრებულოს თავმჯდომარეს ზაალ მამალაძეს:
_ ბახმაროს, როგორც ზამთრის კურორტის განვითარებაზე ყველა ხელისუფლება საუბრობდა. დაპირებებიც მრავლად იყო, თუმცა, "ქართულმა ოცნებამ" ეს ყველაფერი განახორციელა. ჩვენი ხელისუფლების განცხადებები განცხადებებად არ დარჩენილა და ამისთვის ძალიან დიდი მადლობა მინდა გადავუხადო ყველას, ასევე, სააქციო საზოგადოება "ვისოლს"და კომპანია "მაგთიკომს", _ ამბობს დავით საჯაია.
აღსანიშნავია, რომ 60-კაციანი უცხოური დელეგაციის ბახმაროში ყოფნის შესახებ რეპორტაჟები უცხოური მედიითაც გადაიცემა, რაც გურიის ამ ულამაზესი და უმნიშვნელოვანესი კურორტის პოპულარიზაციისთვის ძალიან მნიშვნელოვანია.
