“გურია ნიუსის“ ვებ-გვერდზე გამოქვეყნებულ მასალას “შეიძლება თავი მოვიკლა, ვერ გავუძლებ ზამთარს“ უამრავი გამოხმაურება მოჰყვა.
შეზღუდული შესაძლებლობის მქონე გიორგი ჩერქეზიშვილს, რომელიც სოფელ ნატანებში, ახალშენის დასახლებაში ცხოვრობს, უკვე ბევრმა ადამიანმა მიაკითხა და დახმარება გაუწია.
შეგახსენებთ, რომ გიორგი ჩერქეზიშვილს არ აქვს არცერთი კიდური და მეზობლების დახმარების იმედადაა, რადგან მარტო ცხოვრობს. მის საცხოვრებელ ოთახში ჭერიდან წყალი ჩამოდის და კედლები ღიაა.
ჩერქეზიშვილის ერთადერთი შემოსავალი პენსიაა – 180 ლარი. არ აქვს სოციალური დახმარება.
დღეს, ნატანებში ჩერქეზიშვილს არასამთავრობო ორგანიზაცია “მომავლის ხელის“ დამფუძნებებელი და ხელმძღვანელი აკაკი მარგველაშვილი, ასევე, ორგანიზციის წარმომადგენლები _ მარი ჩხეროძე, პაატა ჯანიაშვილი და შოთიკო ჩხეროძე “გურია ნიუსთან“ ერთად ესტუმრნენ. მათი ჩერქეზიშვილს სურსათი, საყოფაცხოვრებო ნივთები და ტანსაცმელი მიუტანეს.
“მომავლის ხელის“ ხელმძღვანელმა აკაკი მარგველაშვილმა ჩერქეზიშვილს ყველანაირი დახმრება აღუთქვა.
გიორგი ჩექეზიშვილმა ის ადამიანები დაასახელა, ვინც მის ოჯახს “გურია ნიუსში“ გამოქვეყნებული მასალის შემდეგ ესტუმრნენ და დაეხმარნენ:
“ფინანსური დახმარება გამიწია აკა სინჯიკაშვილმა, ასევე, ნატანების გამგებელმა. დამეხმარნენ, ასევე, სურსათით, ტანსაცმლით, სინჯიკაშვილმა ტელევიზორიც მომიტანა“, _ აღნიშნა გიორგი ჩერქეზიშვილმა.
არასამთავრობო ორგანიზაცია “მომავლის“ ხელს“ სურსათ- პროდუქტებით “მარგი“ დაეხმარა, ხოლო ტრანსპორტირება “ბასამ“ უზრუნველყო. მარგველაშვილის თქმით, მათ გამართეს საქველმოქმედო აქცია ჩერქეზიშვილის დასახმარებლად და შეგროვებული თანხით ბატონი გიორგის სანახავად ჩამოვიდნენ.
“კი, ბევრი მოდის და კითხულობს ჩემს ამბავს, იყვნენ ჟურნალისტებიც, ტელევიზიებიც, ყველას მადლობას ვუხდი, მაგრამ განსაკუთერბით დიდ მადლობას ვუხდი “გურია ნიუსს“ ჩემი გაჭირვების გულთან მიტანისთვის, გაშუქებისთვის. უდიდესი დახმარება გამიწია აკა სინჯიკაშვილმა _ პროდუქტებით, ფინანსებით. ჩემნაირებს რომ გვერდში დაუდგებით, ისაა საქმე. იმდენი პროდუქტი მაქვს, ერთ წელს მეყოფა. მივმართავ ყველა შეზღუდული შესაძლებლობების მქონე პირს _ ნუ დაეცემით სულიერად, არ ჩაწვეთ. გიორგობას გილოცავთ“, _ამბობს ჩერქეზიშვილი.
