კვირის დასაწყისში, რამდენიმედღიანმა ძლიერმა ქარმა ლანჩხუთის მუნიციპალიტეტის მოსახლეობას დიდი პრობლემები შეუქმნა _ ქარიშხალმა დააზიანა სახლების სახურავები, ელექტროგაყვანილობის ბოძები და ელექტროსადენები, ასევე, ძირფესვიანად მოთხარა რამდენიმე ასწლოვანი ხე.
გამგეობის პრესასთან ურთიერთობის განყოფილების ინფორმაციით, ქარის შედეგად ზარალი მიადგა შუხუთის, ნიგვზიანისა და აკეთის ადმინისტრაციული ერთეულების მცხოვრებლებს, რომელთაც ქარმა სახლის სახურავები დაუზიანა.
ძლიერმა ქარმა სოფელ ქვიანის ცენტრში ასწლოვანი ფიჭვის ხე ძირიანად მოთხარა, რომელიც იქვე მდებარე სავაჭრო დახლებს დაეცა და დააზიანა.
ხის წაქცევის შედეგად, ასევე, დაზიანდა რკინა-ბეტონის ელექტრობოძი და ელექტროსადენები. ვინაიდან ფიჭვის ხე ცენტრალურ ავტომაგისტრალზე წაიქცა, რამდენიმე ხნით შეფერხებული იყო ავტომობილების მოძრაობა _ საპატრულო პოლიციამ სამაშველო სამსახურთან ერთად ოპერატიულად განახორციელა გზის გაწმენდითი სამუშაოები.
სტიქიის შემოტევას ვერც ქალაქის ცენტრი გადაურჩა, სადაც ქარმა რამდენიმე ადგილზე დააზიანა მრავალწლიანი ნარგავები. მათ შორის, ქალაქის ცენტრალურ პარკში საკმაოდ დიდი ზომის ფიჭვის ხე ძირიანად მოთხარა.
ძლიერი ქარის შედეგად თავისუფლების ქუჩაზე მდებარე იმედო დუნდუას სახელობის ხელოვნურსაფარიანი მინისტადიონის ღობეც დაზიანდა და ისედაც სავალალო მდგომარეობაში მყოფი სტადიონი საერთოდ გამოვიდა მწყობრიდან. მიმდებარე ტერიტორიაზე მაცხოვრებლები ხუმრობანარევი ირონიით ამბობენ, ეს სტიქია ერთგვარ "საკონტროლო გასროლასავით" იყო ისედაც ამორტიზირებული სტადიონისთვის.
აღსანიშნავია, რომ ადგილობრივი ხელისუფლება რამდენჯერმე აანონსებდა, რომ ამ და კიდევ დანარჩენ ხელოვნურსაფარიან სტადიონებს მიმდინარე წელს რეაბილიტაციას ჩაუტარებდა, თუმცა, წელი იწურება და აქამდე არაფერი ჩანს.
"ისე კი "ზოგი ჭირი მარგებელიაო" და იქნებ, სტიქიის შედეგების სალიკვიდაციო თანხებიდან მაინც მოხდეს სამომავლოდ ამ სტადიონის აღდგენა. მით უმეტეს, რომ მუნიციპალიტეტს ცენტრალური ხელისუფლების მხრიდან სხვადასხვა სტიქიის სალიკვიდაციოდ გამოყოფილი მილიონების ათვისება არ უჭირს", _ ამბობენ ადგილობრივები.
ამ ქარიანობისას სავალალო სიტუაცია შეინიშნებოდა ყოფილი სასტუმროს მიმდებარე ტერიტორიაზე, სადაც ამ ამორტიზირებული შენობის სახურავიდან შიფერი ცვიოდა და ფეხით მოსიარულეებს თუ ავტომობილებს საფრთხეს უქმნიდა. ასეთი ფაქტი რამდენჯერმე დაფიქსირდა და ერთ შემთხვევაში, თვითმხილველთა თქმით, გამვლელი ახალგაზრდა მამაკაცი სასწაულებრივად გადაურჩა სიკვდილს, როცა მოულოდნელად სახურავიდან წამოსული შიფრის ერთი მთლიანი ნაჭერი, რამდენიმე სანტიმეტრით აცდა მას.
ეს შენობა ცოტა ხნის წინ გადავიდა მუნიციპალიტეტის ბალანსზე და იგი საპრივატიზაციო ნუსხაშიცაა ჩასმული. შენობის პირველ სართულზე ფართი, თითქმის, მთლიანად გასხვისდა. მაგრამ დანარჩენ სართულებს რა ბედი ეწევა, გაურკვეველია. მით უმეტეს, რომ შენობის მეორე და მესამე სართულზე რამდენიმე სამსახურია განთავსებული.
