რჩება ისეთი შთაბეჭდილება, რომ ბიჭებს “მედია ჯგუფიდან” გავლილი აქვთ სპეციალური ტრენინგები და დავალებული აქვთ, ნებისმიერი მეთოდით ფსიქოლოგიური ზეგავლენა მოახდინონ ჟურნალისტზე, როგორც მინიმუმ, ხელი შეუშალონ მას ჟურნალისტური საქმიანობის გახორციელებაში. ამის დამადასტურებელი კადრები “ინფო-9-მ “უკვე გაავრცელა თავის ვებ-გვერდზე და სოციალურ ქსელში.
მანანა ელიაშვილი, საინფორმაციო სააგენტო “ინფო-9-ს” ხელმძღვანელი: _ სრულიად შემაძრწუნებელია ეს ფაქტი. ეკატერინე ძალიან პრინციპული და კარგი ჟურნალისტია, რომლის მუშაობაც თვალებში შეეჩხირათ. მე ვთვლი, რომ ამიტომ გადაეკიდნენ. ეს განსაკუთრებით ხდება მას შემდეგ, რაც თელიას და გარდაგანიძის სახე ძალიან კარგად გამოჩნდა ჩვენს ჟურნალისტთან ურთიერთობაში.
თელია არის ზესტაფონში სამხედრო გაწვევის სამსახურის უფროსი, გარდაგანიძე _ სახანძრო სამსახურის უფროსი. ჩვენს ვებგვერდზე დევს მასალა, როგორ ურტყამდა და ძალადობდა ეს ორი ადამიანი ჩვენს ჟურნალისტებზე; ეს მასალები ეკა დუგლაძის მიერ არის მომზადებული. ეკამ რამდენჯერმე დააფიქსირა გარდაგანიძე, თელია და მისი ხალხი როგორ უშლიდნენ მოსახლეობას ხელს ანტენების დაყენებაში. ჩვენს სიუჟეტებში, ამის შესახებ მოსახლეობა თავად ლაპარაკობს.
ეს აბსოლუტურად მიზანმიმართული დევნაა. ამას ვერ დავარქმევ იმას, რომ სახელისუფლებო მედია დაუპირისპირდა თავისუფალ მედიას, რადგან ეს არ წყდება ჟურნალისტების დონეზე. ეს ყველაფერი არ წყდება არც ამ “ჟურნალისტების” დამქირავებლის დონეზე. ეს ყველაფერი წყდება ცოტა უფრო მაღალ დონეზე. იმ კითხვებიდან გამომდინარე, რასაც ის ჟურნალისტები სვამენ, შეგვიძლია ვთქვათ, რომ არ არიან ჟურნალისტები. ისინი არიან ზონდერები. ჟურნალისტზე დევნის ეს უკვე მე-4 შემთხვევაა. პირველი იყო 29 ივნისს, მეორე _ 30 ივნისს, მესამე _ 2 ივლისს, მეოთხე _ დღეს.
ზესტაფონის პროკურატურაში ყველა ამ ფაქტთან დაკავშირებით, შეგვაქვს საჩივარი. გადავცემთ მასალებს და გამოიძიონ, რატომ დევნიან ჟურნალისტს, რატომ უშლიან მუშაობაში ხელს. ყველა ის მასალა, სადაც ჟურნალისტის საქმიანობაში ხელის შეშლაა დაფიქსირებული, ითარგმნება ინგლისურად და მივაწვდით ყველა დაინტერესებულ ადამიანს. ვფიქრობ, ეს იქნება ძალიან რეზონანსული ამბავი და შედეგად დევნა შეწყდება.”
ტელეკომპანია “იმერვიზიის” საინფორმაციო სამსახურის უფროსმა ინგა ჯაჯანიძემ “ინფო-9”-სთან სატელეფონო საუბრისას განაცხადა, რომ პიროვნება, რომელიც ჟურნალისტ ეკატერინე დუგლაძეს კითხვებს უსვამდა, მისი სარეკლამო სამსახურის წარმომადგენელია, რომელიც ამავდროულად ჟურნალისტურ საქმიანობასაც ახორციელებს.
“გურია ნიუსი” ამ საკითხთან დაკავშირებით ტელეკომპანია “იმერვიზიის” დირექტორს, საკონტროლო პაკეტის მფლობელს, რამაზ გამეზარდაშვილს დაუკავშირდა. მასთან ინტერვიუს უცვლელად გთავაზობთ:
_ საღამო მშვიდობის, ბატონო რამაზ, “გურია ნიუსიდან” გაწუხებთ, კითხვა გვაქვს თქვენთან. ნახეთ ალბათ “ინფო-9”-ის მიერ გავრცელებული კადრები, სადაც 7 კაცი დასდევს ჟურნალისტს და კითხვას უსვამს დამოუკიდებელი “მედია ჯგუფის” სახელით. როგორც ამბობენ, კითხვის დამსმელი თქვენი თანამშრომელია. ადასტურებთ ამ ინფორმაციას?
_ მე გაგავრცელე განცხადება “მედია გე-ზე”, სადაც ვითხოვ ინფორმაციის უარყოფას “მაესტროსგან” და “ინფო 9-ისგან”. არ არიან ეგენი ჩემები. “იმერვიზიასთან” მაგათ კავშირი არ აქვთ.
_ ინგა ჯაჯანიძე, რომელიც თქვენი საინფორმაციო სამსახურის უფროსია, ამბობს, რომ ერთ-ერთი მათგანი თქვენი სარეკლამო სამსახურის თანამშრომელია, რომელიც პერიოდულად ჟურნალისტურ საქმიანობას ეწევა.
_ ჩვენი სარეკლამო სამსახურის უფროსი კი არ არის, ინგაც ამბობს რომ ეს არის თავისი თანამშრომელი. ინგას აქვს თავისი საწარმო, პირადი საკუთრება აქვს… ეს “იმერვიზიის” თანამშრომლები კი არ არიან, ვინც კითხვას სვამს, ინგას თანამშრომელია. ინტერვიუმდე განვუმარტეთ ჩვენ, მეც ავუხსენი და ინგამაც აუხსნა, მაგრამ ამათ სასურველი წარმოაჩინეს რეალობად.
_ თქვენ თავად ხომ არ გეცნობათ ადამიანები, რომლებიც ეკატერინე დუგლაძეს დასდევენ? თქვენ ხომ კარგად იცნობთ ადგილობრივ მედიას?
_ მანდ ვინ ვის დასდევს, ეგ კიდევ გასარკვევია, რა…
_ ანუ თქვენ გინდათ თქვათ, რომ ეკატერინე დასდევს იმ 7 ახალგაზრდას?!
_ გეუბნებით, რომ მე არ მაქვს მაგ საკითხზე ჩამოყალიბებული აზრი. როგორ გითხრათ რა… სხვა საქმე მაქვს… ეს 2 დღეც უაზროდ წაიღეს და აღარ მინდა ახლა კიდე რა… რაღაცა პატარა ექსპერიმენტს გაციფრულებასთან დაკავშირებით აკეთებს ინგა თავისი ინიციატივით. ეს ადამიანები თუ მოიპოვებენ რეკლამას, ან თუ გააკეთებენ სიუჟეტს რაღაცა კარგს და მიაწვდიან, სააგენტო იმუშავებს ნორმალურად და გამართულად და ეს წაადგება ინგასაც და საქმესაც ზოგადად. თუ ვერ იმუშავებენ…
რაც შეეხება ინგას, ინგას არა აქვს საშუალება, რომ ექსკლუზიური ხელშეკრულება გაუფორმოს ამ ადამიანებს, ვინც არიან ისინი. იმიტომ, რომ ხელფასი ხომ უნდა მისცე ნორმალური, არა? ისინი ალბათ მუშაობენ ჰონორარზე და არ არის მხოლოდ ინგა, ვისთანაც ისინი მუშაობენ.
_ ბატონო რამაზ, ექსპერიმენტს ატარებენ იმაზე, რომ 7 კაცი ერთ ჟურნალისტ გოგონას დასდევს? რამე ახალი პროექტია ეს?
_ 7 კაცი ერთ ჟურნალისტს სად დასდევს, როგორ დასდევს, მე მაგას არ ვამბობ, მე უბრალოდ ვამბობ იმას, ინგამ რაც ამიხსანა და რაზეც მივეცი თანხმობა. ის ხომ ჩემთან მუშაობს და იმას აქვს თავისი ბიზნესი, თავისი საქმე. აი, ციფრულ სივრცეში ხომ გადიდდა ზონები, 25 სივრცე იყო, დარჩა 10 სამაუწყებლო და ჩვენ ახლა ჭიათურაში კი არ უნდა ვიმაუწყებლოთ მარტო და საჩხერეში, მოგეხსენებათ, უნდა ვიმაუწყებლოთ იმერეთში მთლიანად, რაჭა-ლეჩხუმში, გურიაში, სამეგრელოში და ასე შემდეგ.
აქედან გამომდინარე, ის ზრდის თავის იმას, რომ გააფართოვოს თავისი საქმე, თუ მე არ ვიქნებოდი წინააღმდეგი. მე ვუთხარი, რომ არ ვიყავი წინააღმდეგი. ვინ ვის დასდევს, რა ხელშეკრულება არის, როგორ არის, არ დავინტერესებულვარ რა… უბრალოდ, ვთხოვ ყველას, საერთაშორისო ორგანიზაციებსაც მივმართე ამასთან დაკავშირებით, ვესაუბრე ბევრ ადამიანს, მათ შორის მედიაექსპერტს…
_ კონკრეტულად რომელ მედიაექსპერტს ესაუბრეთ?
_ ნუ, ვისაც ვესაუბრე რა, ჩემს მეგობრებს… ვუთხარი, რომ სადაც გაიგონებენ, რომ ეს ადამიანები არიან “იმერვიზიასთან” კონტექსტში, იცოდნენ, რომ ეს ტყუილია. რაც შეეხება დანარჩენ ინფორმაციას, შეგიძლიათ დაუკავშირდეთ ინგას. დანარჩენი არაფერი არ ვიცით.
_ თქვენ, როგორც მედიის წარმომადგენელი და მედიამფლობელი, ამ კონკრეტულ ფაქტს, ჟურნალისტის დევნას როგორ შეაფასებდით?
_ ჟურნალისტის დევნას?
_ დიახ.
_ ჟურნალისტის დევნას ზოგადად მე შევაფასებ ყოველთვის ცუდად, ამის მომხრე არ ვიქნები და დავუპირისპირდები, მაგრამ ამ შემთხევაში არ ვიცი, ვინ ვის დევნის. არა ვარ საქმის კურსში.
_ კადრები არ გინახავთ, ბატონო რამაზ? აქ ჩანს კარგად ვინ ვის დევნის…
_ არ ვიცი, მე ბევრი კადრი ვნახე რაა და ჩამოყალიბებული პოზიცია არა მაქვს. პოზიცია რომ ჩამომიყალიბდეს, უნდა მქონდეს სრული ინფორმაცია და მე სრული ინფორმაცია არ მაქვს. ვერ ვიმკითხავებ რა…
რაც შეეხება ინგა ჯაჯანიძეს, ჯერჯერობით, ის ჩვენს ზარებს არ პასუხობს, თუმცა, მასთან დაკავშირებას კვლავ შევეცდებით.
“გურია ნიუსი” ამ საკითხთან დაკავშირებით კომენტარის მოპოვებას მედიაექსპერტებიდანაც შეეცდება.
