დათა ახალიამ კუდ-ის უფროსის პოსტი მას შემდეგ დატოვა, რაც შინაგან საქმეთა მინისტრის თანამდებობაზე მისი ძმა, ბაჩო ახალაია წარადგინეს.
მეგის ქარდავა ახალაიების ნდობით აღჭურვილი პირია. იგი იყო სამეგრელო-ზემო სვანეთის სამხარეო პოლიციის უფროსი, მის პერიოდს უკავშირდება ყველაზე სკანდალური საქმეები სამეგრელოში. იმ პერიოდში, როცა ბაჩო ახალაია სასჯელაღსრულების დეპარტამენტის თავმჯდომარე იყო, მეგის ქარდავა მე-7 საპყრობილის დირექტორად დანიშნა.
მეგის ქარდავა ერთ-ერთი იმ პოლიციელთაგანია, რომელიც სამართალდამცავ სტრუქტურებში სისასტიკით გამოირჩევა. მისი სახელი სახალხო დამცველის ანგარიშშიც არის შესული. ერთი წლის წინ, 2011 წლის 22 ივნისს, სახალხო დამცველის წარმომადგენელს პატიმარმა მალხაზ არქანიამ სკანდალური ჩვენება მისცა, სადაც იგი აღწერდა, როგორ შევიდა მეგის ქარდავა მე-8 საპყრობილეში, როგორ შეაჭამა პატიმარს მის მიერ დაწერილი ჩვენება და სადისტურად აწამა იგი.
ქარდავას სისასტიკეს უკავშირდება “ციხის ბუნტის” საქმეც _ საქმის მასალებში, პატიმრის ჩვენებიდან, ვკითხულობთ: “ამ დროს, მეგის ქარდავამ პლატონ მამარდაშვილს მაკრატლით ამოაჭრა ერთი ბღუჯა თმა და ჩაუდო ჯიბეში. როდესაც პლატონ მამარდაშვილმა უთხრა, გეყოფა ამდენი დამცირებაო, იქვე მდგომმა ნიღბიანმა სახის არეში დაარტყა რკინიანი ხელი, რა დროსაც მოტყდა კბილი და ცხვირპირიდან წამოუვიდა სისხლი. დაინახა, რომ ხელკეტებს ურტყამდნენ ვიბლიანსაც და ავალიანსაც… დერეფანში აიძულეს, ჩაკუზულიყო და ამ მდგომარეობაში მყოფს, დაახლოებით, 10 წუთი ურტყამდნენ ხელკეტებს. შემდეგ ლ. ცინდელიანთან ერთად გაიყვანეს ეზოში, სადაც მიწაზე ეყარნენ ვიბლიანი და ავალიანი. იქაც გააგრძელეს ცემა, რა დროსაც გაიგო პატიმრების ხმა, რომლებიც მოუწოდებდნენ შეეწყვიტათ ცემა. შემდეგ ოთხივენი გადაიყვანეს #7 საპყრობილეში, სადაც საერთოდ გააშიშვლეს და გააგრძელეს ცემა, რის შემდეგაც შიშვლები შეყარეს საკანში.”
მეგის ქარდავას სახელს უკავშირდება 2008 წლის 28 ოქტომბერს, ზუგდიდში, გაერთიანებული ოპოზიციის მიტინგის დარბევა და იქ მომხდარი ინციდენტი, სადაც კონსერვატორ ბიძინა გუჯაბიძის მეუღლემ, მაკა სახურიამ, მეუღლისა და მისი თანაგუნდელების ცემის გამო, მეგის ქარდავას ყბაში უთავაზა.
როგორც “გურია ნიუსისთვის” გახდა ცნობილი, კუდ-ის უფროსად მეგის ქარდავას კანდიდატურის წარდგენამ პოლიციელებში დიდი უკმაყოფილება გამოიწვია და არ არის გამორიცხული, სტრუქტურა არაერთმა მათგანმა დატოვოს.
