განცხადებას ამის შესახებ “ქართული ოცნების” პრესსამსახური ავრცელებს, რომელსაც უცვლელად გთავზობთ.
ქალბატონმა ნიკოლაიმ მოუწოდა ვან რომპეის გულახდილი და პირდაპირი საუბრისაკენ ფართოდ გავრცელებული შემაშფოთებელი პრობლემების შესახებ ოქტომბრის საპარლამენტო არჩევნების წინ საქართველოში შექმნილ პოლიტიკურ კლიმატთან დაკავშირებით. მან განაცხადა, რომ ევროკავშირის უწყვეტი ურთიერთობა საქართველოსთან მოითხოვს ქმედებას და არა სიტყვებს საქართველოს მთავრობისაგან გამჭვირვალე დემოკრატიული კონკურენციის უზრუნველყოფასთან დაკავშირებით.
შეხვედრა ვან რომპეისა და სააკაშვილს შორის ჩატარდება თბილისში იმავე დღეს, როცა ევროპარლამენტში გაიმართება დებატები საქართველოში ამჟამინდელი პოლიტიკური დაძაბულობის შესახებ. ქალბატონმა ნიკოლაიმ აღნიშნა, რომ ეს დებატები კარგი შესაძლებლობა იქნება ევროკავშირისათვის, გამოხატოს საკუთარი მოლოდინი საქართველოს ხელისუფლების მიერ თავისუფალი და სამართლიანი არჩევნების უზრუნველყოფასთან დაკავშირებით.
მთავარი ოპოზიციური კოალიციის, “ქართული ოცნების” 2 წევრი პარტია – საქართველოს რესპუბლიკური პარტია და “თავისუფალი დემოკრატები” არიან ევროპის ლიბერალებისა და დემოკრატების ალიანსის (ALDE) მოკავშირეები. ამ კვირაში, სტრასბურგში, ქალბატონი ნიკოლაი და ევროპის ლიბერალებისა და დემოკრატების ალიანსი (ALDE) უმასპინძლებენ “ქართული ოცნების” წარმომადგენლებს.
კოალიცია “ქართული ოცნება” აცხადებს, რომ სააკაშვილის მთავრობა ახორციელებს დაშინების, სასამართლო პროცესების ბოროტად გამოყენებისა და პრესის თავისუფლების ხელყოფის მიზანმიმართულ კამპანიას. ადამინის უფლებათა დამცველმა წამყვანმა ორგანიზაციებმა გამოხატეს შეშფოთება საქართველოში განვითარებული მოვლენების გამო, ხოლო მშვიდობიანი შეკრებისა და გაერთიანების თავისუფლების დაცვის საკითხებში გაეროს სპეციალურმა მომხსენებელმა ახლახანს მეტად კრიტიკული ანგარიში წარადგინა საქართველოსთან დაკავშირებით:
“ეს არჩევნები საქართველოს დემოკრატიის ნამდვილი გამოცდა იქნება. ვიმედოვნებთ, რომ ეს ქვეყანა წავა უფრო ჩამოყალიბებული პოლიტიკური გარემოსა და ძლიერი დემოკრატიის გზით, თუმცა თბილისში არის მინიშნებები, რომლებიც შეშფოთების საფუძველს იძლევა.
ვან რომპეიმ უნდა გამოიყენოს ეს შესაძლებლობა, რათა ზედმიწევნით ნათლად გადასცეს სააკაშვილს ევროკავშირის მოლოდინები საქართველოსთან დაკავშირებით. თავად სააკაშვილი მოვიდა ხელისუფლებაში სწორედ მშვიდობიანი დემოკრატიული რევოლუციის წყალობით. ასე რომ, მას აკისრია პასუხისმგებლობა ამ არჩევნების ჩატარებაზე.
ევროპის ლიბერალებისა და დემოკრატების ალიანსმა (ALDE) წამოიწყო დღევანდელი დებატები ევროპარლამენტში საქართველოს მიერ მიღწეული პროგრესის შესახებ ევროკავშირის იურიდიული და საკანონმდებლო გადაწყვეტილებების საქართველოს კანონმდებლობაში დანერგვის თვალსაზრისით და მკაფიოდ გამოთქვა საკუთარი მოლოდინი მომავალ არჩევნებთან დაკავშირებით. ჩვენ დიდი იმედები გვაქვს საქართველოსთან დაკავშირებით, თუმცა ევროკავშირმა მკაფიოდ უნდა დაადასტუროს საკუთარი პოზიცია, რომ თავისუფალი და სამართლიანი არჩევნები სასიცოცხლო მნიშვნელობისაა საქართველოს პერსპექტივებისათვის ევროპასთან დაკავშირებით”, _ ნათქვამია განცხადებაში.
