ბესიკ გულედანის წერილიდან: “ქსნის #15-ე დაწესებულებაში მიყვანის დღეს, დაწესებულების დირექტორმა თოლორდავა შოთამ გასცა ბრძანება, მე და 20-25 პატიმარი მათ შორის ზურა ნასყიდაშვილი ვეცემთ. მათ დაახლოებით 15 თანამშრომელმა რომელთაგანაც ზოგიერთს ამოვიცნობთ, გვცემეს. ყველა, უმიზეზოდ დაშინების მიზნით, თან გვაგინებდნენ უცენზურო სიტყვებით, ეს ცემა მოხდა ჩვენი ქსანში მიყვანის დღეს.
პატიმარი პაატა მოდებაძე: #15 საპყრობილეში ეტაპში მისვლისას, ე.წ. ვახტაზე მცემეს. შემდეგ ცემის დროს იქ იყვნენ უშუალოდ უფროსი კოლონიის, და ასევე მოადგილე და სხვა თანამშრომლები. შემდეგ გადამიყვანეს ზონაში, სადაც დავყავი სამი დღე. შემდეგ გამიყვანეს ოთახში და გადამპარსეს თმები, რა დროსაც მომთხოვეს მუხლებზე დადგომა.
მოგვიანებით, გამიყვანეს ოთახში და მითხრეს, რეჟიმის უფროსი ვარო. მეორეზეც მითხრა რაღაც თანამდებობა, მაგრამ არ მახსოვს, გიორგი ჰქვია, რუსთაველია. შემდეგ მითხრეს, _ ჩვენთან ითანამშრომლეო და უარი რომ ვუთხარი, წყლის პლასმასის მილი გადამარტყა ბეჭებში. შემდეგ მომიჭირა ყელში ორი წყლის პლასმასის მილი, როდესაც გავშავდი გამიშვა…
პატიმარი ზურაბ ნასყიდაშვილი: ქსანში მოხვედრის დღიდან ჩემს მიმართ აგრესიული დამოკიდებულება ხორციელდებოდა, რაც გამოიხატებოდა შემდეგში. მიყვანის დღეს, საბადრაგო მანქანიდან ჩამოსვლისთანავე მომაყენეს ფიზიკური შეურაცყოფა, რამდენიმე თანამშრომელი რომელიც აქტიურობდა ამაში, შემიძლია ამოვიცნო…
ეს გახლავთ მცირეოდენი ამონარიდი იმ წერილებიდან, რომელიც პატიმრებმა მთავარი პროკურორის, მურთაზ ზოდელავას სახელზე დაწერეს, ასლი კი “ქართული ოცნება _ დემოკრატიული საქართველოს” თავმჯდომარეს, მანანა კობახიძეს გადაუგზავნეს.
“გურია ნიუსის” ინფორმაციით პატიმრების წერილი შევიდა სახალხო დამცველის სახელზეც. ვრცელ მასალას მომხდარის შესახებ, “გურია ნიუსი” მალე შემოგთავაზებთ.
