ლანჩხუთის მუნიციპალიტეტის გამგეობის საშტატო ნუსხაში მორიგი ცვლილება იგეგმება _ კერძოდ, გამგეობის ქონების მართვის, ეკონომიკისა და სოფლის მეურნეობის განვითარების სამსახურში არსებული წამყვანი სპეციალისტის შტატი, რომელიც ამ ეტაპზე ვაკანტურია, შეიცვალოს მთავარი სპეციალისტის შტატით.
აღნიშნულ ინიციატივას, რასაც, შესაბამისად, თანამდებობრივი სარგოს ზრდაც მოჰყვება, მმართველი გუნდის წევრთა ნაწილი იმით ხსნის, რომ ამ სამსახურს კოლოსალური შრომა აქვს გასაწევი, ხოლო ის ადამიანი, ვინაც ამ თანამდებობაზე დაინიშნება, მთავარი სპეციალისტის რანგში ბევრად მოტივირებული იქნება, განახორციელოს დაკისრებული მოვალეობა.
ქონების მართვის სამსახურის უფროსი გოგი ფაცურია დაგეგმილ ცვლილებას იმით ხსნის, რომ სამსახურს ბევრი სამუშაოს შესრულება უწევს:
"ჩვენს სამსახურს ახალი ფუნქციები დაემატა. საკმაოდ მოცულობითი სამუშაოების შესრულება გვიწევს. ამიტომაც გადაწყდა ამ ცვლილების გატარება", _ ამბობს ფაცურია.
საკრებულოს წევრის, ია ჩხაიძის აზრით, საქმის კეთებისას ძალიან დიდი მნიშვნელობა აქვს ანაზღაურებას, რაც დამატებით მოტივაციას ქმნის:
"ისმის კითხვა _ თუ მთავარი სპეციალისტი არ იქნება, ისე ვერ გააკეთებს საქმესო? რა თქმა, უნდა გააკეთებს, მაგრამ მთავარი სპეციალისტის რანგში მისი შრომა და პასუხისმგებლობა გაცილებით იზრდება. რას ნიშნავს მთავარი სპეციალისტი?! უფრო მეტ ანაზღაურებას, უფრო მეტ პასუხისმგებლობას, უფრო მეტი სამუშაოების შესრულებას. ამიტომ შემოდის ეს სამსახური თხოვნით, დაემატოს მთავარი სპეციალისტის შტატი. საქმეს სპეციალისტიც კი გააკეთებს, მაგრამ მას სჭირდება მისი შრომის შესაფერისი ანაზღაურება _ არ შეიძლება ყველას ერთნაირი ხელფასი ჰქონდეს. მიმაჩნია, ის ადამიანი, ვინაც ამ თანამდებობაზე დაინიშნება მთავარი სპეციალისტის რანგში უფრო მოტივირებული", _ ამბობს საკრებულოს სოციალური კომისიის თავმჯდომარე ია ჩხაიძე საკითხზე მსჯელობისას.
საკითხთან დაკავშირებით სხვაგვარი შეხედულება აქვთ საკრებულოს ზოგიერთ წევრს. მათი თქმით, თანამდებობის რანგში ამაღლებას კიდევ ერთი წამყვანი სპეციალისტის შტატის დამატება ჯობია.
სამსახურის ფუნქციებიდან გამომდინარე, სამომავლოდ წამყვანი სპეციალისტის შტატის დამატებას შესაძლებლად მიიჩნევს გოგი ფაცურიაც.
საკრებულოს წევრთა შორის არსებობს მოსაზრება, რომ ზემოთ ნახსენები ცვლილება ერთ კონკრეტულ პიროვნებაზეა მორგებული, რომელიც შერჩეული ჰყავს უკვე მმართველ გუნდს.
