"ეს ყველაფერი ჭიქაში ატეხილ ტორნადოს და ტაიფუნს წააგავს – უნდა გაშიშვლდეს თუ არა, უნდა მოეხადა ბოდიში თუ არა, უნდა წავიდნენ ნუდისტები სვანეთში თუ არა. მე უფრო მგონია, რომ რაღაცისგან ყურადღების გადატანა ხდება, უზარმაზარი ენერგია იხარჯება, მიდის დებატები, იძაბება ნერვები, არის მუქარა და ორგანოებისთვის წარამარა მოწოდება, იმოქმედონ" _ წერს სოციალურ ქსელში კონტსტანტინე გამსახურდია.
მისივე თქმით, ყურადღების გადატანა უნდათ თუნდაც იმისგან, რისი აღქმაც და რისთვის თვალის გასწორებაც არანაირად არ სურთ.
"იმისგან, რომ სულ რაღაც 30 წელიწადში საქართველოში უმცირესობაში მოექცევა ის ეთნოკულტურული ელემენტი, რომელიც აზროვნებს და მეტყველებს ქართულ ენაზე, რომელმაც შვა არაერთი გენიალური შემოქმედი და მოღვაწე და არავითარი "ფაშიზმი." გაიხსენეთ: "ქართლად ფრიადი ქვეყანა აღირაცხების, რომელსა შინა ჟამნი ქართულითა ენითა შეიწირვის და წირვა აღესრულების" – ამ დეფინიციის ჩამოქნის დროს, მე-10 საუკუნეში არანაირი "ფაშიზმი" არ არსებობდა. საერთოდ არ იყო "იზმები" და "ისტები". პარალელი გინდათ? მაგალითად, ისრაელის სახელმწიფო არ უშვებს 6 მილიონ პალესტინელ ლტოლვილს, რადგან ეს ისრაელში დემოგრაფიულ და კულტურულ-რელიგიურ სიტუაციას ძირეულად შეცვლის. შესანიშნავად მესმის მათი სახელმწიფოებრივი მიდგომის.
იმისგან, რომ ვიზა-ლიბერალიზებული საქართველოდან უმუშევრად და უსახსროდ დარჩენილი მასა მიაწყდება ევროპას, იმ იმედით, რომ აღთქმულ ქვეყანაში ჩავა, ან იმუშავებს, ან ლტოლვილად ჩაბარდება. ქართულმა სახელმწიფომ კი ვიზა-ლიბერალიზაციასთან ერთად ივალდებულა 100 მილიონი დოლარი დახარჯოს ყოველწლიურად ევროპიდან უკანვე დეპორტაციების ხარჯების დასაფარად.
იმისგან, რომ სტუდენტების 30 პროცენტი მაინც სწავლის ხარჯებს პრაქტიკულად ვერ იხდის უმაღლეს სასწავლებლებში.
იმისგან, რომ მიმდინარეობს საბანკო ვალში მყოფი ოჯახების გამოსახლებები, სახელმწიფო კი არაფერს არ აკეთებს ამ პროცესის შესაჩერებლად.
იმისგან, რომ რუსეთში იწყება პროექტი საქართველოს კუთხეების ერთი-მეორის მიყოლებით გამოძრობისა და რუსეთის ფედერაციასთან მიერთებისა. ამის ნიშანია თუნდაც "აფსუურ-აფხაზურ" მასმედიაშია მეგრულის შემსწავლელი კურსების დაწყება, რაზეც კომენტარს არ აკეთებს არავინ. ყველა კუთხეს თავისებურად მიუდგებიან, იცოდეთ. მათ არ ეპიტნავებათ საქართველოს არც "სახელმწიფო," არც "სსრ" – პირდაპირ "ნაშ იუგ" და მორჩა. ზვიად გამსახურდიამ თავის სიურეალისტურ ზღაპარში ამაღლების ციხეზე "ქათამ-ვეშაპი" უწოდა საბჭოთა იმპერიას და მოდით, პირობითად დავარქვათ ჩრდილოეთს "ქათამ-ვეშაპი N 1".
იმისგან, რომ ერდოგანისეულ ბოლო სულთნისდროინდელ ოსმანური იმპერიის "მცირე პორტას" მოდელში ბათუმიც მოაზრება. (ერაყის მოსულთან და ბალკანურ თრაკიასთან ერთად) ყოველ შემთხვევაში ეს ნეო-პორტა რუსეთთან მაინც ივაჭრებს ამ საკითხზე, მთლად რომ დაიქცეს ქვეყანა. ესეც "ქათამ-ვეშაპი N 2" სამხრეთით.
იმისგან, რომ იგივე სვანეთში გიგანტური ჰესების აშენებას გეგმავენ, რომ გააკეთონ ფული და ქართველ კაცს მთიანეთიდან ფეხი ამოუკვეთონ: თითქოს ენგურ-ჰესი საკმარისი არ იყოს.
იმისგან, რომ მოსახლეობისგან იცლება ქართული სოფელი – არამარტო მთაში, უკვე ბარშიც" _ წერს გამსახურდია.
