"ჯორჯიან უოთერ ენდ ფაუერი" , ვაკის რაიონის გამგეობა და თბილისის მერიის ზედამხედველობის სამსახური, დაახლოებით, 2 საათია არკვევენ, ვის ეკუთვნის ვაჟა-ფშაველას გამზირზე, ძეგლის წინ მდებარე სკვერში გამსკდარი მილი, რომელიც ამ წუთებში ქუჩის ნაწილს ტბორავს.
გამზირზე დიდი რაოდენობით წყალი მოედინება. სავარაუდოდ, სკვერში მცენარეების სარწყავი მილია გამსკდარი. რის გამოც, სკვერი და მიმდებარე ტერიტორია წყლით არის დაფარული.
"გურია ნიუსმა" პრობლემა 14:31 წუთზე აღმოაჩინა. პირველი ფოტოები სწორედ ამ დროს გვაქვს გადაღებული.
ამის შესახებ ინფორმაცია "გურია ნიუსმა" "ჯორჯიან უოთერ ენდ ფაუერს" მიაწოდა. კომპანიაში აღნიშნეს, რომ შეტყობინება დაზიანებასთან დაკავშირებით მიღებული არ ჰქონდათ. თუმცა, დაგვპირდნენ, რომ ადგილზე დახმარების სამსახური უმოკლეს ვადაში გამოცხადდებოდა. მოგვიანებით, კომპანიის პრესსამსახურის წარმომადგენელი დაგვიკავშირდა და გვითხრა, რომ სკვერში გამსკდარი მილი მათ არ ეკუთვნოდათ და თბილისის მერიის ზედამხედველობის სამსახურს უნდა დავკავშირებოდით.
მერიის ზედამხედველობის სამსახურში დარეკვის შემდეგ კი გაირკვა, რომ გამსკდარი მილი არც მათი საკუთრებაა და ვაკის რაიონის გამგეობაში გადაგვამისამართეს.
ვაკის რაიონის გამგეობაში "გურია ნიუსს" განუცხადეს, რომ აღნიშნულთან დაკავშირებით ინფორმაცია არ ჰქონდათ. თუმცა, დაგვპირდნენ, რომ გადაამოწმებდნენ. ინფორმაციის მიწოდებიდან დაახლოებით 7 წუთში, პრესსამსახურის თანამშრომელი დაგვიკავშირდა და გვაცნობა, რომ გამგეობის წარმომადგენლები ადგილზე იმყოფებოდნენ.
"გურია ნიუსი" შემთხვევის ადგილზე გავიდა, თუმცა, ადგილზე არც ვაკის რაიონის გამგეობის წარმომადგენლები და არც "ჯორჯიან უოთერ ენდ ფაუერის" დახმარების სამსახურის თანამშრომლები არ დაგვხვედრიან. ადგილზე ჩვენი ყოფნის პერიოდში ვაკის რაიონის გამგეობიდან კიდევ დაგვირეკეს და გვითხრეს, რომ მათი წარმომადგენლები 5 წუთის წინ იმყოფებოდნენ ვაჟა-ფშაველას გამზირზე.
პრესსამსახურის წარმომადგენელთან დიალოგს უცვლელად გთავაზობთ:
_გამგეობიდან გირეკავთ, თქვენ დაგირეკიათ ჩვენთან წყალთან დაკავშირებით. ჩვენ ველაპარაკეთ gwp-ს, ადგილზეც ვიმყოფებოდით ერთი 5 წუთის წინ.
_ქალბატონო ნინო, დაახლოებით, 10 წუთია აქ ვიმყოფებით და ადგილზე არც თქვენი და არც gwp-ს სამსახურის თანამშრომლები არ მოსულან.
_მე მგონი, არ ვიტყუები.
_იტყუებით თუ არა მე არ ვიცი, ეს არ მიკადრებია, არც მითქვამს თქვენთვის, ქალბატონო ნინო.
_არა, ეგრე გამოდის, 5 წუთის წინ ვიყავით ეხლა ჩვენ, ვნახეთ პრობლემა და გადავეცით gwp-ს და წამოვიდა კიდევაც საავარიო პრობლემის მოსაგვარებლად.
_ჯერჯერობით არც არავინ არის ადგილზე და არც პრობლემაა მოგვარებული. გადავამოწმებთ ცოტა ხანში მდგომარეობას, რადგან საკმაოდ დიდი რაოდენობით წყალი მოდის მთელ ვაჟა-ფშაველაზე.
_რა პრობლემაა, გადაამოწმეთ.
ამ "გადამისამართების კასკადიდან" ცხადად ჩანს, რომ ადამიანს, რომელიც ამგვარ ფაქტს წააწყდება და მოქალაქეობრივი ვალის მოხდას მოინდომებს, არაერთ უწყებაში მოუწევს დარეკვა. პრობლემა კი კომპეტენციების არცოდნის გამო, შესაძლოა, მაინც ვერ მოგვარდეს.
ჩვენ ცოტა ხანში ისევ გადავამოწმებთ, შეაკეთებს თუ არა ამ უწყებებიდან ერთ-ერთი დაზიანებულ მილს, რომელიც ვაჟა-ფშაველას გამზირს მთელი დღეა ტბორავს.
შენიშვნა: მასალზე თანდართული ფოტოები "გურია ნიუსმა" რამდენიმე წუთის წინ გადაიღო.
