თბილისში, ვაჟა-ფშაველას გამზირზე, სკვერში გამსკდარ მილს "ჯორჯიან უოთერ ენდ ფაუერი" გააკეთებს. აღნიშნულის შესახებ "გურია ნიუსს" უწყებიდან აცნობეს.
კომპანიაში აცხადებენ, რომ გამსკდარი მილის შეკეთება მათ კომპეტენციაში არ შედის, თუმცა, პრობლემის მასშტაბურობიდან გამომდინარე, მის აღმოფხვრას შეეცდებიან.
"გურია ნიუსი" თითქმის მთელი დღეა არკვევს, ვის კომპეტენციაში შედის ვაჟა-ფშაველას გამზირზე, ძეგლის წინ მდებარე სკვერში გამსკდარი მილის შეკეთება, რომელიც ნახევარ გამზირს ტბორავს.
ამ ხნის განმავლობაში რამდენჯერმე დავუკავშირდით "ჯორჯიან უოთერ ენდ ფაუერს", თბილისის მერიის ზედამხედველობის სამსახურს, მერიის გამწვანების სამსახურს, ვაკის რაიონის გამგეობას, თუმცა, უწყებები ერთმანეთთან გვამისამართებენ და აცხადებენ, რომ მილის შეკეთება მათი კომპეტენცია არაა.
"გურია ნიუსი" "ჯორჯიან უოთერ ენდ ფაუერის", მთავარ დისპეჩერს ესაუბრა, რომელიც აღნიშნავს, რომ კომპანიის საავარიო სამსახურის თანამშრომლებმა ადგილზე არსებული სიტუაცია შეამოწმეს. ამ წუთებშიც ადგილზე იმყოფებიან და მიუხედავად იმისა, რომ მილის შეკეთება მათ არ ეხებათ, პრობლემას ამაღამვე მოაგვარებენ.
"ეს მილი ეკუთვნის თბილისის მერიის გამწვანების სამსახურს, დღეს ვიყავით ადგილზე, შევამოწმეთ, მაგრამ იმის გამო, რომ არ შედიოდა მისი შეკეთება ჩვენს კომპეტენციაში, არ გაგვიკეთებია. ახლა ვხედავთ რომ პრობლემა მასშტაბურია და ვეცდებით ამაღამვე გავაკეთოთ. შევადუღებთ მილს. თუმცა, ზუსტად ვიცით, რომ ამ მილის გახსნას ცოტა ხანში გამწვანების სამსახური მოგვთხოვს, რადგან ნარგავებს ვერ მორწყავენ", _ აღნიშნა "გურია ნიუსთან" საუბრისას თემურ ჯანელიძემ.
მერიის გამწვანების სამსახურში კი აცხადებენ, რომ ადგილზე სიტუაცია მათმა თანამშრომლებმაც შეისწავლეს, მაგრამ მილი "ჯორჯიან უოთერ ენდ ფაუერს" ეკუთვნის და მათ უნდა გააკეთონ.
ამავე თემაზე:
ვაჟა-ფშაველას გამზირზე დიდი რაოდენობით წყალი მოედინება (ფოტო)
