რას ფიქრობენ ყოფილი გამგებლის ვადამდე გათავისუფლების შესახებ ოზურგეთელი ოპოზიციონერები:
კოალიცია “ქართული ოცნების” ოზურგეთის შტაბის წარმომადგენელი ტიფო მიქატაძე: “გურია ნიუსთან” საუბარში აღნიშნავს, რომ “გამადიდებელი ლუპით” დააკვირდებიან “ნაციონალების” აქტივისტთა და უპირველეს ყოვლისა, საჯარო მოხელეთა წინასაარჩევნო საქმიანობას.
“შექმნილი რეალობა გვაფიქრებინებს, რომ ოზურგეთის მუნიციპალიტეტის ყოფილ გამგებელი სწორედ რომ საარჩევნო მიზნებისთვის გამოუშვეს. თუმცა, იქნება კი იგი ამჯერად ეფექტური დაკისრებული როლისთვის?! ფაქტია, რომ ტაკიძე ხელისუფლების შიგნით ჯგუფურ დაპირისპირებას შეეწირა, რაც არანაირად არ ნიშნავს, რომ იგი უდანაშაულოა და მისი დისკრედიტაცია სწორედ რომ მათი “დამსახურებაა”. იმედია, მას ეს კარგად ესმის. მე პირადად გამოვრიცხავ, რომ მან რაიმე სარგებლის მოტანა შეძლოს “ნაციონალებისთვის”. ჯერ ერთი, ზოგადად ხელისუფლების მიმართ ნდობა საზოგადოებაში დღითიდღე ილევა და მეორეც, როგორც ვთქვი, თავად ტაკიძეა უკვე სახელგატეხილი, ნდობადაკარგული და როგორც სახელისუფლო რესურსი აბსოლუტურად არაეფექტურია.
ბუნებრივია მკითხავთ, მაშინ რაღას გამოუშვესო, რაზეც გიპასუხებთ _ განა მართლა რჩებათ სხვა, უკეთესი არჩევანი?! მათ, როგორც არასდროს, ისე უჭირთ, რეალურად არიან ძალაუფლების დაკარგვის წინაშე, მათთან დგომა თანდათან არაპოპულარული და მეტიც, სამარცხვინო ხდება, რადგან ასოცირდებიან ძალადობასთან, სიყალბესთან, თავისუფლების და უფლებების შეზღუდვასთან, ტერიტორიების დაკარგვასთან და ა.შ. ამიტომაც, თითოეულ მხარდამჭერს მოძებნიან და ჩააბამენ არჩევნებში.
გარწმუნებთ, რომ ჩვენც “გამადიდებელი ლუპით” დავაკვირდებით “ნაციონალების” აქტივისტთა და უპირველეს ყოვლისა საჯარო მოხელეთა წინასაარჩევნო საქმიანობას. საკუთარი გამოცდილებით ვფლობ უზარმაზარ ინფორმაციას ბოლო წლებში თითოეულ უბანში თითოეულის მოღვაწეობის შესახებ. ხალხმაც ხომ იცის ყველაფერი, არაფერია დამალული. საზოგადოება კეთილგანწყობილი ხდება იმ ადამიანების მიმართაც, რომლებსაც შეიძლება “მძიმე” წარსული აქვთ, მაგრამ კრიტიკულ მომენტში, როცა ქვეყნის ბედი წყდება, ჯანსაღ პოზიციებზე ხალხის გვერდით დგებიან, მათ შეცდომების აღიარების, მათი გამოსწორებისა და დაწყებულ მოძრაობაში თავისი წვლილის შეტანის უფლება აქვთ და მიეცემათ კიდეც.
იგივეს ვიტყვი გია ტაკიძის მიმართაც; როცა ადამიანი თავისი შეცდომის გამო დაკისრებულ სასჯელს კეთილსინდისიერად მოიხდის, იგი სამართლებრივი ტვირთის გარდა, მორალური ტვირთისგანაც უნდა გათავისუფლდეს. საზოგადოებამ მას უნდა მისცეს ღირსების აღდგენის, უნარ-ჩვევებისა და გამოცდილების სრულფასოვანი რეალიზაციის უფლება და პირობები. დარწმუნებული ვარ ასეც იქნება.
იმედია, ბატონ გიორგის კარგად ესმის არსებული მდგომარეობის შინაარსი და ამჯერად ღირსეულად გაართმევს თავს მოქალაქეობრივ ვალდებულებას.
ოზურგეთის მუნიციპალიტეტის საკრებულოს წევრი ლელა ნაცვალაძე: _ ერთადერთი ადამიანი ვარ ოზურგეთის მუნიციპალიტეტის საკრებულოში, ვინც მხარი არ დაუჭირა თავის დროზე მუნიციპალიტეტის გამგებლის პოსტზე გიორგი ტაკიძის დანიშვნას, რაზეც კარგად მახსოვს კომენტარიც გავაკეთე _ მხარს არ დავუჭერ წესიერი ადამიანების “გაფუჭებას”-მეთქი, რადგან ვთვლიდი და ახლაც მიმაჩნია, რომ გიორგი არის პროფესიონალი და ნორმალური სახელმწიფოს პირობებში მას ბევრი სასიკეთო საქმის კეთება შეუძლია.
იმ დროისათვის, ხელისუფლების შეფასებით, ტაკიძე გახლდათ იდეალური ვარიანტი აღნიშნულ პოსტზე. მუნიციპალიტეტის საკრებულოს მუშაობის ერთი წლის თავზე, ანგარიშის წარდგენის დროსაც გიორგი ტაკიძემ საკრებულოს თავმჯდომარისა და დეპუტატების შექებაც დაიმსახურა და მუნიციპალიტეტის მოღვაწეობაც დადებითად შეფასდა, მაგრამ რა მოხდა მოგვიანებით?! მათ მიერ ასე ნაქები და “უალტერნატივო” კადრი უცებ ისე “გადაეშვა” კორუფციის ჭაობში, ისე დააკავეს ქრთამის აღების ფაქტზე, რომ არც მხარის, არც საკრებულოს ხელმძღვანელობამ ამის შესახებ არაფერი იცოდა?! ტაკიძის ადვოკატად ნამდვილად არ გამოვდგები, მაგრამ ეს მაშინ, ჩემ მიერ ჩატარებულ პრესკონფერენციაზეც აღვნიშნე _ გიორგი ტაკიძე იყო “განტევების ვაცი”, რომელიც ხელისუფლებამ მისი ჩვეული წესებით გამოიყენა და როცა აღარ დარჩა საჭირო, “სალფეთქივით” მოისროლა, მთელი ბრალეულობა აჰკიდა; ახლაც ვიმეორებ _ თუ ტაკიძეს ბრალი წაეყენებოდა, თანამდებობებზე აღარ უნდა დარჩენილიყო არც მხარის გუბერნატორი ვალერი ჩიტაიშვილი და საკრებულოს თავმჯდომარის, ალეკო მამეშვილის გადაყენების საკითხიც უნდა დამდგარიყო დღის წესრიგში. მაგრამ როგორ ქვეყანაში ვცხოვრობთ, ყველამ კარგად ვიცით და ეს ასე არ მოხდა. თითი ყველამ ტაკიძისკენ გაიშვირა, მოწმეც უმალ გამოიძებნა და “დაასკვნეს”, რომ ტაკიძემ “მათი ნდობა ვერ გაამართლა”! ერთ დროს “ძმაკაცებსა” და “მეგობრებს” მისი ამბავიც აღარ მოუკითხავთ.
რაც შეეხება ბრალის აღიარებას, ეს ჩემთვის მოულოდნელი არ ყოფილა, თუმცა როგორც ვიცით, კარგა ხანს გასტანა მისმა დუმილმა… მაგრამ ჩვენ, მოგეხსენებათ ვცხოვრობთ პოლიციურ სახელმწიფოში, სადაც კარგად ვიცით, როგორ ექცევიან პატიმრებს, რომლებიც ბრალს არ აღიარებენ!
გადავიდეთ მთავარზე: ყოველივე ამის შემდეგ, გია ტაკიძე, რომელიც რეგიონების მინისტრის, გურიის “არქიფო სეთურის” _ რამაზ ნიკოლაიშვილის სიტყვებით რომ ვთქვათ “უმკაცრესად უნდა დასჯილიყო” (ასეთი განმარტება გააკეთა ნიკოლაიშვილმა ტაკიძის დაკავებასთან დაკავშირებით ერთ-ერთ მედიასაშუალებაში, თუმცაღა ტაკიძეს მანამდე თავის ფავორიტად მიიჩნევდა!) ვადაზე ადრე გაათავისუფლეს.
რა თქმა უნდა, საზოგადოებაში არის მითქმა-მოთქმა იმასთან დაკავშირებით, რომ ეს ვადამდელი გათავისუფლება უკავშირდება არჩევნებს და ტაკიძეს სანაცვლოდ მოთხოვეს სოფელ ნატანებიდან დიდი რაოდენობით ხმების “მიტანა”; ამაზე შემიძლია წინასაარჩევნო პერიოდში გავაკეთო კომენტარი, მანამდე კი თქვენი გაზეთის ფურცლებიდან მინდა მივმართო გია ტაკიძესა და ამ სისხლისმსმელი ხელისუფლებისგან შევიწროებულ, დამცირებულ და ღირსებააყრილ ყველა მოქალაქეს _ ადამიანური პრინციპები, ღირსება, შვილების, ოჯახის სიყვარული გვავალდებულებს არაფრის სანაცვლოდ არ დავემონოთ უკანონობას, არ გავხდეთ გაყალბებული არჩევნების თანამონაწილე.
