ფრაქცია „საქართველოს პატრიოტები“ მუდმივმოქმედ საპარლამენტო დელეგაციებში გადანაწილებული კვოტებით უკმაყოფილოა და პარლამენტის სხდომების ბოიკოტირებას გეგმავს, – ამის შესახებ ჟურნალისტებს დღეს, პარლამენტის ვიცე სპიკერმა, ფრაქცია „საქართველოს პატრიოტების“ წარმომადგენელმა ირმა ინაშვილმა განუცხადა.
მისი თქმით, პრობლემა ისაა, რომ შემოთავაზებული მუდმივმოქმედი დელეგაციებიდან მათთვის არც ერთია მისაღები. ინაშვილის განცხადებით, ისინი დელეგაციებთან დაკავშრებით პარტიაში კონსულტაციებს გადიან.
,,პრაქტიკულად არსად არ ვართ ევროპულ ნაწილში წარმოდგენლი და როდესაც ვამბობთ, რომ ჩვენ ქვეყანას ევროპისკენ აქვს კურსი, ამ დროს შენი პარლამენტის ოპოზიციის ნაწილი არ გყავს წარმოდგენილი ამ დელეგაციებში. ეს პოლიტიკური დისკრიმინაციაა. ჩვენ არ ვართ წარმოდგენილები ეუთოში, რაც ძალიან მნიშვნელოვანი დელეგაცაა და მხოლოდ „ნაცმოძრაობა“ და „ოცნებაა“ წარმოდგენილი. რჩება ორი ერთმანეთთან შეთანხებული პარტია. თუ ჩვენს ფრაქციას არ ექნება მონაწილეობის უფლება ამ დელეგაციებში, ვფიქრობ, არავითარი აზრი არ აქვს პარლამენტის სხდომებზე დასწრებას. ახლა ვყალიბდებით იმაზე, რომ გამოვაცხადოთ ბოიკოტის რეჟიმი და არ მივიღოთ მონაწილეობა პარლამენტის სხდომებში, ვიდრე ჩვენი საკითხი დადებითად არ გადაწყდება“, – განაცხადა ირმა ინაშვილმა ჟურნალისტებთან საუბრისას.
მუდმივმოქმედ საპარლამენტო დელეგაციებში 53 ძირითადი და 43 სათადარიგო შემადგენლობა განისაზღვრა, რომელშიც ადგილები შემდეგნაირად გადანაწილდა: „ქართული ოცნება“ ძირითადი – 38, სათადარიგო – 30, „ქართული ოცნება – მრეწველები“ ძირითადი -2, სათადარიგო – 2, „ერთიანი ნაციონალური მოძრაობა“ ძირითადი – 8, სათადარიგო – 7, „ნაციონალური მოძრაობა – საქართველოს წინსვლისთვის“ ძირითადი – 2, სათადარიგო – 2, „საქართველოს პატრიოტები“ ძირითადი – 2, სათადარიგო – 2, უფრაქციო პარლამენტის წევრები ძირითადი – 1.
საპროცედურო საკითხთა და წესების კომიტეტის მიერ დელეგაციებში პროპორციული წარმომადგენლობით განსაზღვრული კვოტები პარლამენტის ბიურომ დაამტკიცა. ამის შემდეგ კი, პოლიტიკური ჯგუფები მათთვის განკუთვნილ კვოტებზე კონკრეტულ დეპუტატებს წარადგენენ.
წყარო: ინტერპრესნიუსი
