“ხალხის არჩეული საკრებულო იგნორირებას გვიკეთებს!”

"ოზურგეთის მუნიციპალიტეტის საკრებულომ სრული იგნორირება გაუკეთა ხალხის მიერ არჩეული დეპუტატის _ ბონდო ღლონტის მოთხოვნას, საპრივატიზაციო ნუსხიდან ამოეღო გურიანთის ცენტრში მდებარე არასასოფლო სამეურნეო დანიშნულების მიწის ნაკვეთი, რომლის ნაწილზეც ძველი შენობა დგას. ეს იყო პავილიონი კომუნისტების ეპოქაში, ახლა კი აქ გვინდა, პატარა სკვერი გავაკეთოთ. სოფლის ცენტრია, აქვეა მინი-სტადიონი, ეკლესიის მშენებლობაც იგეგმება. ვიღაც კი, ვისაც ხელი მიუწვდება ხელისუფლების მაღალ წრეებთან, თურმე, ჩაის ფაბრიკის აშენებას გეგმავს. ხალხის მიერ არჩეული საკრებულო იგნორირებას გვიკეთებს ჩვენ _ხალხს. ესაა ხალხის საკრებულო? _ ამ კითხვით, ოზურგეთის მუნიციპალიტეტის სოფელ გურიანთის მცხოვრებლები: მანანა ჯახუტაშვილი, ვაჟა დუდუჩავა, თამრიკო არობელიძე, ნიკიფორე და ბესიკ ღლონტები, მარიკა ბრეგვაძე, მარინა კაპანაძე და სხვები, რომლებიც თავს შეურაცხყოფილად გრძნობენ 4 დეკემბერს ოზურგეთის მუნიციპალიტეტის საკრებულოს სხდომის გადაწყვეტილების გამო, "გურია ნიუსთან" მოვიდნენ.

როგორც "გურია ნიუსი" წერდა, 4 დეკემბერს, ოზურგეთის მუნიციპალიტეტის საკრებულოს მორიგი სხდომა შედგა, სადაც დღის წესრიგით გათვალისწინებული ოთხი საკითხიდან, პირველს _ "ოზურგეთის მუნიციპალიტეტის საკუთრებაში არსებული უძრავი ქონების საპრივატიზაციო ობიექტების ნუსხის დამტკიცების შესახებ", ოზურგეთის მუნიციპალიტეტის საკრებულოს განკარგულების მიღების თაობაზე, ხმაურიანი განცხადებები მოჰყვა _ სოფელ გურიანთის მაჟორიტარმა დეპუტატმა ბონდო ღლონტმა სიტყვა ითხოვა და დეპუტატებს გააცნო თავისი ამომრჩევლების მოსაზრება, სოფელ გურიანთაში საპრივატიზაციოდ განკუთვნილი, არასასოფლო დანიშნულების მიწის ნაკვეთის (436.0კვ. მ.) საპრივატიზაციო ნუსხიდან ამოღების შესახებ.

_ მოსახლეობა წინააღმდეგია, რომ ეს ფართობი გასხვისდეს და გაითვალისწინეთ, ნუ წახვალთ ხალხის წინააღმდეგ. თუ ვინმეს ფაბრიკის აშენება უნდა, ვინაა წინააღმდეგი, საამისოდ სოფელში მრავალი ადგილია, სოფლის ცენტრში კი გურიანთელებს სურთ, გაშენდეს სკვერი და იყოს მშვიდი, კულტურული გარემო, _ ითხოვდა სოფლის მაჟორიტარი დეპუტატი, თუმცა, საკრებულომ საპრივატიზაციო ნუსხიდან არ ამოიღო აღნიშნული ფართი, რომლის ნაწილზეც მოთავსებულია ძველი შენობა.

"გურია ნიუსს" გურიანთაში სოფლის მოსახლეობის ნაწილი დახვდა შეკრებილი, რომლებიც ამბობდნენ, მთელი სოფელი შეიკრიბებოდა და აქციას მოაწყობდნენ.

_ ახლა არჩეული დეპუტატი გვყავს, რომელსაც ჩვენი ხმა მიაქვს საკრებულომდე. ეს საკრებულო კი სრულ იგნორირებას გვიკეთებს და თურმე, ჩვენზე ზრუნავს, რომ ამ ადგილზე ჩაის ფაბრიკა ააშენოს ვიღაცამ და დაგვასაქმოს. უთხარით მაგათ, რომ მოქმედი ჩაის ფაბრიკა უკვე არის გურიანთაში, მაგრამ ნედლეულიც არ აქვთ, რომ დაამუშაონ. ორი კიდევ ნანგრევადქცეულია და აღადგინონ. სხვა, თავისუფალი ტერიტორიის მეტი რა არის აქ _ აიღონ და ააშენონ. ვინმემ დაუშალათ? ვიღაცას "ჩაწყობით" სურს, მიითვისოს, შეინიღბოს აუქციონის საშუალებით და ხელში ჩაიგდოს ადგილი სოფლის ცენტრში. ასეთ ადგილზე რად გვინდა ფაბრიკა და საწარმო? ხმაური, მტვერი, ნაგავი და ათასი სხვა, _ გვითხრეს გურიანთელებმა.

 მანანა ჯახუტაშვილი, ქართული ენისა და ლიტერატურის მასწავლებელი, სოფელ გურიანთის მკვიდრი:

_ გურიანთის მცხოვრებთა სრული უმრავლესობა ვემხრობით იმ აზრს, რომ ეს ფართი არ გასხვისდეს და აქ გავაკეთოთ სკვერი, საქანელები ბავშვებისთვის. როგორც ბევრ სოფელშია, მაგალითად: შემოქმედში, ჭანიეთში. აქვეა მინი-სტადიონი, რომელიც ბავშვების საყვარელი ადგილია. ჩვენი ძალებით გვსურს ეკლესიის აშენებაც, მიწა უკვე ნაკურთხია და საშენი მასალაც ნაწილობრივ მოტანილია. სოფლის დეპუტატს რომ ვთხოვთ, საკრებულოში ჩვენი აზრი გაახმოვანოს, ასე სასტიკ წინააღმდეგობას უნდა გვიწევდეს ჩვენივე არჩეული საკანონმდებლო ორგანო? სტადიონის და ეკლესიის გვერდით რად გვინდა ფაბრიკა? მივესალმები ყველა ინვესტორს. ადგილი უხვად გვაქვს და ვეტყვით, სად ააშენოს, თუ სურვილი ექნება ვინმეს.

_ როგორც გავრცელებული ინფორმაციით ვიცით, ამ ადგილის ხელში ჩაგდება უნდა ერთ პიროვნებას, რომელმაც შეძლო სახელისუფლებო წრეებში შეღწევა. ყვარყვარეები არ გვჭირდება ჩვენ! ზოგიერთებს თუ ასე სურთ ფაბრიკის აშენება, უამრავი თავისუფალი ადგილია გურიანთაში. არ გვჭირდება სოფლის ცენტრში ჩაის ფაბრიკა და არც სხვა საწარმო, სადაც იქნება ხმაური და რომელიც დააბინძურებს გარემოს, _ გვითხრა ადგილობრივმა მცხოვრებმა შორენა კვაჭაძემ.

როგორც "გურია ნიუსი" უკვე წერდა, 4 დეკემბრის საკრებულოს სხდომა, გურიანთის მაჟორიტარმა დეპუტატმა ბონდო ღლონტმა, რომელიც ამავე დროს კომისიის თავმჯდომარეც არის და ბიუროს წევრია, პროტესტის ნიშნად დატოვა:

_ ძალიან მეტკინა გული და ვინერვიულე. რა დაპირისპირებასა და კერძო დავაზეა საუბარი, როცა სოფლის მოსახლეობის სრული უმრავლესობა ითხოვს, ამ ფართის გასხვისება არ მოხდეს? ვინც არ უნდა მოვიდეს შესაძენად, ყველას დავუპირისპირდები, რადგან ხალხს არ უნდა ასე და მე მარტო დეპუტატი არ ვარ, გურიანთელი ვარ. აქ დავიბადე და გავიზარდე. სოფლის ცენტრში ფაბრიკის აშენების და ხალხის დასაქმების მომიზეზებით, არ უნდა მოხდეს ფართის გასხვისება. ვინაა ქარხნის და საწარმოს აშენების წინააღმდეგი? ნეტავ, ინვესტორი მოვიდეს და ადგილის მეტი რაა, ოღონდ ფაბრიკა ააშენონ და ხალხი დაასაქმონ. საკითხავია, ამ ადგილისთვის ვინ გადადო ასე თავი, რომ ხალხის მოთხოვნის საწინააღმდეგოდ მოახერხა საკრებულოს ამოქმედება? ძალიან შეურაცხყოფილად ვგრძნობ თავს, _ გვითხრა ბონდო ღლონტმა.

აღნიშნული საკითხის ირგვლივ  "გურია ნიუსთან" ასეთ კომენტარს აკეთებს ოზურგეთის მუნიციპალიტეტის საკრებულოს თავმჯდომარის მოადგილე დიმიტრი კვერღელიძე:

_ ჩვენთვის გურიანთის მოსახლეობის წარმომადგენლებს არ მოუმართავთ. რაც შეეხება აღნიშნულ მიწის ფართს, მე მხარი დავუჭირე ბიუჯეტის შევსებას, რადგან აღმასრულებელი ხელისუფლება ითხოვს ამას. აღნიშნული საკითხის განხილვა ექვსი თვის განმავლობაში მიმდინარეობდა. კომისია იყო ადგილზე, შეისწავლა და დადგენილია, რომ ეს არ არის ცენტრი, არ არის სტრატეგიული დანიშნულების ადგილი. გაიყიდება და შეივსება ბიუჯეტი, რომელიც, საბოლოოდ, მაინც ხალხისაა.

_ ბატონო დიმიტრი, როგორც მოსახლეობა ამბობს, მათი მოსაზრება დეპუტატმა გაახმოვანა საკრებულოს სხდომაზე, მაგრამ ხალხი ფიქრობს, რომ "ვიღაც მაინც ახერხებს, აუქციონის წესზე მორგებით, აღნიშნული ადგილის ხელში ჩაგდებას"…

_ მოსახლეობას თუ მაინც და მაინც სკვერისთვის სურს ეს ადგილი, ვინ დაუშალა? შეიკრიბონ, მოილაპარაკონ, თავად შეისყიდონ და გააკეთონ, რაც უნდათ. გიმეორებთ, მე მხარი დავუჭირე ბიუჯეტის შევსებას და საიდან უნდა ვიცოდე წინასწარ, ვინ იყიდის აუქციონზე ამ ფართს?!

_ როგორც გურიანთის მცხოვრებლები ამბობენ, უკვე იციან, ვისაც სურს სადავო ფართის შეძენა.

_ გიმეორებთ, თუ მათ სურთ, შეისყიდონ თავად. მე მხარს ვუჭერ ბიუჯეტის შევსებას.

თავის მხრივ, გურიანთელები ამბობენ, რომ ადგილზე მისული არანაირი კომისიის წევრი მათ არ უნახავთ. ამასვე ადასტურებს სოფლის მაჟორიტარი დეპუტატიც:

_ აღნიშნულ ადგილზე არანაირი კომისია არ მისულა, არ შეუსწავლია ეს საკითხი. ვინმემ ჰკითხა ერთ ოჯახს მაინც, რას ითხოვთო? მე კომისიის ყველა სხდომაზე ვახმოვანებდი გურიანთელების აზრს. აბა, რა არის საჯაროობა და ცივილიზებული ფორმა, თუ დეპუტატის ხმას არ ენდე? ე. ი. მე ვიტყუები?! სხვა სოფლებში თუ არ უყიდიათ სოფლის ცენტრში სკვერისთვის მიწა, გურიანთელებმა რატომ უნდა იყიდონ საკუთარ სოფელში 360 კვ. მ. მიწის ფართი?! რა მიდგომაა ეს?! _ ამბობს დეპუტატი.

ოზურგეთის მუნიციპალიტეტის საკრებულოს აგრარულ საკითხთა და ქონების მართვის კომისიის თავმჯდომარე დავით ჭაკნელიძე ჩვენთან საუბრისას აღნიშნულ საკითხზე ასეთ კომენტარს აკეთებს:

_ მოსახლეობასთან მე არ გავსულვარ. ადგილზე კი ვიყავი და ვნახე ეს შენობა და მიმდებარე ფართი. აქ ტარდება ღია აუქციონი და ნებისმიერ მსურველს აქვს უფლება, მიიღოს მონაწილეობა და იყიდოს. ჩვენ უკვე საპრივატიზაციო ნუსხაში შევიტანეთ.

_ ბატონო დავით, გურიანთელები ითხოვენ, საკრებულომ ეს საკითხი განიხილოს თავიდან და გადაწყვეტილებაც შეცვალოს.

_ რა შემთხვევაში შეიძლება, საკრებულომ გააუქმოს თავისი გადაწყვეტილება, მთლად კომპეტენტური არ ვარ მაგ საკითხში და ვერ გეტყვით. ფართი უკვე საპრივატიზაციო ნუსხაშია და გავა ღია აუქციონზე, _ გვითხრა ჭაკნელიძემ.