ქალაქ ოზურგეთში, აპოლონ წულაძის ქუჩაზე პარკში გზის გაჭრას საზოგადობის ნაწილი, საკრებულოს დეპუტატები და რამდენიმე არასამთავრობო ორგანიზაცია, უკვე კარგა ხანია, აპროტესტებენ. აღნიშნული საკითხი სასამართლო განხილვაშია. დღეს კი ქალაქ ოზურგეთის მუნიციპალიტეტის საკრებულომ მხარი აღნიშნულ ტერიტორიაზე მდებარე სკვერში ჩაის სახლის აშენებას დაუჭირა მხარი.
ქალაქ ოზურგეთის მუნიციპალიტეტის საკრებულოს რიგგარეშე სხდომაზე გამოტანილ საკითხებს შორის ყველაზე დიდი ხმაური და აჟიოტაჟი მეოთხე საკითხმა _ “სსიპ თვითმმართველი ქალაქი – ქალაქ ოზურგეთის მუნიციპალიტეტის საკუთრებაში არსებული ქონების, არასასოფლო სამეურნეო დანიშნულების 6887 კვ.მ მიწის ფართიდან ( ქ.ოზურგეთი, აპოლონ წულაძის ქუჩა), 310 კვ.მ. ფართის მიწის ნაკვეთის პირდაპირი განკარგვის წესით (აღნაგობის უფლებით) 45 წლის ვადით გაცემის შესახებ, ქალაქ ოზურგეთის მუნიციპალიტეტის მერისთვის თანხმობის მიცემის თაობაზე) გამოიწვია.
აღნიშნულ საკითხთან დაკავშირებით, ეკონომიკური განვითარების, ქონების მართვის, ინფრასტრუქტურის, ტრანსპორტისა და კეთილმოწყობის სამსახურის უფროსმა მერაბ წივწივაძემ ისაუბრა:
მისი განცხადებით, ქალაქ ოზურგეთს მერიას განცხადებით მიმართა მოქალაქე ნუგზარ გიორგაძემ, რომელმაც წარმოადგინა პროექტი, აღნიშნულ ტერიტორიაზე შენობის აგების მიზნით.
“ეს შენობა გახლავთ, ე.წ. ჩაის სახლი, პროექტი წარმოდგენილია, გავიარეთ ბიუროზე, აღნიშნულთან დაკავშირებით, ვითხოვთ თანხმობას, რომ 310 კვ.მ მიწის ნაკვეთი გავცეთ პირდაპირი წესით აღნაგობის უფლებით“.
აღნიშშნულ საკითხს საკრებულოს წევრებს, მერსა და მოქლაქეებს შორის დაპირისპირება მოჰყვა.
დეპუტატმა ლევან მგელაძემ კითხვით მიმართა მერს: „ეს არის სკვერის ტერიტორია, მაინტერესებს, ქალაქის მერიამ მიზანშეწოლილად ჩათვალა აქ ჩაის სახლის აშენება? ფაქტობრივად, სკვერში ვაშენებთ შენობას“_ რაზეც ბეგლარ სიორიძემ განმარტება გააკეთა:
“მოგცემთ სრულფასოვან განმარტებას, ვიცი, რასაც ემსახურება თქვენი შეკითხვა, იქ არის მიტოვებული შადრევნის ადგილი, რომელიც გამოყენებულია სანაგვე ურნად, შეგიძლაით ნებისმიერ დღეს მიბრძანდეთ და ნახავთ, რომ სავსეა ნაგვით. ურნის მოვალეობას ასრულებს მეტს არაფერს, რომელსაც უკვე 25 წელია ვუყურებთ. შემოვიდა პიროვნება, რომელსაც წარმოდგენილი აქვს ძალიან კარგი პროექტი და სურს ამ სანაგვე ურნის ადგილას ააშენოს ჩაის სახლი, რომელიც დააამშვენებს აღნიშნულ სკვერს. ბულვარში არის ჩაის სახლი, ნაყინის და ათასი რაღაცის სახლი თუ თქვენ გსურთ, რომ უყუროთ იმ ნაგვის ორმოს, რომელიც ამახინჯებს ჩვენს ქალაქს, მიიღეთ გადაწყვეტილება და არ დაუჭიროთ მხარი. ნუ შექმნით აჟიოტაჟს, გაგეცით ამომწურავი პასუხი".
ლევან მგელაძემ მერს და საკრებულოს თავმჯდომარეს მიმართა, რომ აღნიშნულ საკითხთან დაკავშირებით იყო მათთან მისული ერთ-ერთი მოქალაქე, რომელსაც უარი უთხარეს. მერმა განუცხადა, რომ არ იცნობდა ასეთ მოქალაქეს.
“ყველამ იცის, რომ თავისუფალ ადამიანს არ აქვს აქ არაფრის უფლება. ნუ იყენებთ მუხლს, სადაც აღნიშნულია, გამოიყენოთ პირდაპირი განკარგვის წესი, ეს არის არამიზნობრივი ხარჯვა. მივმართავ სკარებულოს წევრებს, აღნიშნული საკითხი განიხილეთ საზგადოებასთან ერთად“, _ განაცხადა მგელაძემ.
ბეგი სიორიძე: “კიდევ ერთხელ ხაზგასმით აღვნიშნავ, თუკი რომელიმე მოქალაქე, შემოვა რაიმე პროექტით, რომ ოზურგეთში სურს რაიმეს გაკეთება, ჩვენ ყველანი ვალდებულები ვართ, მხარი დავუჭიროთ ასეთ ინიციატივას. ჩვენ არ ვართ განებივრებულები ინვესტორებით. რა დაგემართათ, ბოლოს და ბოლოს, ნუთუ, ამ საბნელეთიდან ვეღარ უნდა გამოვიდეთ? რა არის ეს, რა უბედურებაა?! ადამიანს უნდა ჩაის სახლის გაკეთება, თუნდაც ამ სკვერში, სადაც შეიძლება ადამიანები დავსხდეთ და საჭირბოროტო საკითხები განვიხილოთ ჩვენი ქალაქისთვის, რანაირი მიდგომაა ეს, გამაგებინეთ!“
საკრებულოს სხდომაზე თავისი აზრი დააფიქსირა ოზურგეთელმა გრიგოლ მახარაძემ და საკრებულოს წევრებს, თავმჯდომარეს და ქალაქ ოზურგეთის მერს რამდენიმე კითხვით მიმართა:
“ მე გამიჩნდა ასეთი შთაბეჭდილება, რომ ნებისმიერი ადამიანი, რომელიც მერიას მიმართავს, წარადგენს განცხადებით პროექტს, მიიღებს თანხმობას, ნებისმიერ სკვერში ნებისმიერი ტიპის მშენებლობაზე, როგორც ვხედავ, ყველაფერი მისაღებია“, _რასაც მერის რეპლიკა მოჰყვა.
“ერთი წესიერად ისაუბრე, რა, შენი ჭირიმე, რას ჰქვია ყველაფერი მისაღებია?!“
გიგი მახარაძე: “როცა თქვენ ამბობთ, რომ ეს არ არის სკვერი, ეს არის ჩემთვის ძალიან წარმოუდგენელი, არცერთ ქალაქში არ სჭირდება საკრებულოს დადგენილება, რომ ასეთ ტერიტორიას ერქვას სკვერი, თუკი იქ რეალურად არსებობს მწვანე საფარი. როცა იყო საუბარი კულტურისა და დასვენების პარკში შენობის აგებაზე, მაშინ თქვენ წინააღმდეგი იყავით. ჩვენ გვქონდა დისკუსია ამასთან დაკავშირებით. მაშინ იყო საჯარო პირობა გაცემული, რომ ასეთი საკითხები აღარ დაისმებოდა, ბატონი ნუგზარი იყო ერთ-ერთი აქტიური მხარდამჭერი, აღნიშნულ პარკში გზის გაჭრისა, არის თუ არა ეს კავშირში მის მიერ შემოტანილ პროექტთან, ხვალ განიხილავს სასამართლო პარკში გზის გაჭრის კანონიერების საკითხს, მაინტერესებს, რა ეშველება თუ თქვენ გასცემთ მშენებლობის ნებართვას ბატონ ნუგზარზე, ხვალ რომ სასამართლომ თქვას, რომ ეს გადაწყვეტილება იყო არაკანონიერი და გააუქმოს ეს საკითხი".
ბეგი სიორიძე: "დარწმუნებული ვარ, რომ სასამართლო მიიღებს კანონიერ გადაწყვეტილებას, რადგან აბსოლუტურად ყველაფერი ზედმიწევნით კანონის სრული დაცვით არის გაკეთებული. თუნდაც ჰქონდეს სკვერის სტატუსი, სადაც არის ის სანაგვე ყუთი, თუ არ გაქვთ ნანახი, რომ გაბრძანდებით, ნახეთ. მაინც დავეთანხმები მე, ქალაქის მერი, იქ ისეთი კარგი არქიტექტურული შენობის ჩადგმას. მისაღებია პასუხი თქვენთვის? გასაგებია, ბატონო გრიგოლ? თუ არ არის გასაგები, არც ეს წარმოადგენს ბევრს არაფერს, დანარჩენს საკრებულო გადაწყვეტს, აღარ არის რა ეს პოლემიკა საჭირო, რაღაცა ჭირი გვჭირს და როგორმე უნდა მოვიჭოროთ ეს ჭირი“.
აღნიშნულ საკითხს მხარი საკრებულომ დაუჭირა.
