მიუხედავად იმისა, რომ ქალაქ ოზურგეთის მუნიციპალიტეტის საკრებულოს რიგგარეშე სხდომა დეპუტატებსა და ქალაქ ოზურგეთის მერს შორის ურთიერთდაპირისპირების ფონზე მიმდინარეობდა, ქალაქ ოზურგეთის მუნიციპალიტეტის საკრებულომ 2017 წლის ბიუჯეტი, დღეს 11 ხმით 4-ის წინააღმდეგ ერთხმად დაამტკიცა.
“გილოცავთ, 2017 წლის ბიუჯეტი დამტკიცებულია, 11 ხმით 4 წინააღმდეგ“, _ განაცხადა საკრებულოს თავმჯდომარემ გელა კობალაძემ.
სხვა სხდომებისგან განსხვავებით, დღევანდელი სხდომა მეტად ხმაურიანი იყო. საკრებულოს წევრები ერთმანეთის მიმართ აგრესიულობით გამოირჩეოდნენ და ერთმანეთის მიმართ სიტყვიერ შეურაცხყოფასაც არ იშურებდნენ.
საკრებულოს სხდომაზე პირველი და მეორე საკითხი 2015 წლის 30 დეკემბრის #56 დადგენილებაში ცვლილებების შეტანას და 2017 წლის ბიუჯეტის დამტკიცებას შეეხებოდა;
ქალაქ ოზურგეთის მუნიციპალიტეტის ბიუჯეტი საკრებულოს 2015 წლის 30 დეკემბრის #56 დადგენილების შესაბამისად, 9186.2 ათასი ლარის ოდენობით დამტკიცდა, გახორციელებული ცვლილებების მიხედვით, 2016 წლის ბიუჯეტი დაზუსტდა და განისაზღვრა 15032.4 ათასი ლარით.
2016 წლის ბიუჯეტში პრიორიტეტებს შორის ცვლილებები განხორციელდა:
“ქალაქ ოზურგეთის მერიას 23.0 ათასი ლარით შეუმცირდა შრომის ანაზღაურება, რაც კონკრეტულად, პრემიებისა და დანამატების თემას ეხება. კეთილმოწყობის სამუშაოები 177.4 ათასი ლარით შემცირდა, ასევე, შეუმცირდა რელიგიურ ორგანიზაციებს დაფინანსება 30.0 ათასი ლარით, გაიზრდება კომუნალური მომსახურების ცენტრის დაფინანსება 50.3 ათასი ლარით. დაფინასებები ეზრდებათ: "დასუფთავების ღონისძიებებს _ 11.7 ათასი ლარით, სკოლამდელ განათლებას _ 63.0ათასი ლარით, საფეხბურთო კლუბ “მერცხალს“ _ 30.0. ათასი ლარით, კულტურისა და დასვენების პარკს _ 3.4 ათასი ლარით, მუსიკალურ სკოლას _ 2.5 ათასი ლარით, ზოგადი განათლების ხელშეწყობას _ 16.0 ათასი ლარი, შეჭირვებულ მოქალაქეთა სამედიცინო მომსახურების პროგრამა _ 8.0 ათასი ლარით, განსაკუთრებით საჭიროების მქონე პირთა დახმარების პროგრამა _ 10.0 ათასი ლარით, “ც“ ჰეპატიტით დაავადებულ პირებში მკურნალობის ტაქტიკის განსაზღვრისათვის საჭირო კვლევების დაფინანსების პროგრამა _ 33.0 ათასი ლარით, უსახლკაროდ დარჩენილი ოჯახების დახმარება ბინის ქირით უზრუნველყოფა _ 2.5 ათასი ლარით".
საკრებულოს დეპუტატმა ლევან მგელაძემ საფეხბურთო კლუბ “მერცხალის“ დაფინანსების 30.0 ათასი ლარით გაზრდასთან დაკავშირებით დასვა ვ
“მაინტერესებს, არჩევნებამდე რატომ მოვაკელით კლუბს 100 000 ლარი? თუ საჭირო იყო დაფინანსება, რატომ მოხდა ასე მაშინ, როცა თავად განაცხადეთ, რომ არ იყო საჭირო საფეხბურთო კლუბის მეტად დაფინანსება, ეს მოკლებული 100 000 ლარი გამოიყენეთ წინასაარჩევნოდ სოციალურ საკითხებში, კონკრეტულად კი ჯორჯიაშვილის ქუჩის ასფალტის დაგებაში. ეს არის პირდაპირი თუ არა ირიბი მოსყიდვა ამომრჩეველის, ახლა აღმოჩნდა რომ თურმე საჭირო ყოფილა, კლუბის დაფინანსების გაზრდა, მაშინ არ იყო საჭირო, როცა ჩამოყვანილ ფეხბურთელებს უხდიდით ანაზღაურებას 1500 ლარს და 650 ლარს კვების ფულს? მაშინ არავინ ანგარიშობდა?
გელა კობალაძე: “განგიმარტავთ, თქვენ ამბობთ, რომ ეს მოსყიდვაა ამომრჩევლის, როცა მოსახლეობა 30 წელია, ითხოვს იქ ასფალტის საფარის დაგებას. ხალხი შველას ითხოვდა. როცა იყო შანსი იმისა, რომ კლუბი პირველ ადგილზე გადასულიყო და დაფინანსება წამოეღო 50 000 ლარი, ვერ მიიღო ფონდიდად ეს დაფინანსება, ამიტომ გახდა საჭიროება, დავუმატოთ 30 ათასი ლარი".
დეპუტატ ლევან მგელაძეს ბეგლარ სიორიძემ მიმართა და აღნიშნულთან დაკავშირებით განმარტება გააკეთა:
“რამდენჯერ გთხოვე, რაც არ იცი, იმას ნუ ლაპარაკობ,-მეთქი“, ჩვენ არ ვერევით ა(ა) იპ-ის საქმიანობაში. საუკეთესო შედეგი აჩვენა “მერცხალმა“, ადგილობრივი მწვრთნელი და ადგილობრივი ფეხფურთელები ჰყავთ. სამწუხაროდ, მოხდა ის, რაც არ უნდა ხდებოდეს ჩემპიონატში, როგორც გვეუბნებიან, გარიგებას ჰქონდა ადგილი, სარჩელს, რომელიც შეტანილი აქვთ, დარწმუნებული ვართ, მოიგებენ და მიიღებენ შესაბამის დაფინანსებასაც, მანამდე კი, რაც გვაქვს გუნდის წინაშე ვალდებულება ის უნდა გავაკეთოთ _ რა თანხაც მოვაკელით (100 000 ლარი), გადავიტანეთ ინფრასტრუქტურულ სამუშაოებში, არავითარ წინასაარჩევნო კამპანიას ეს არ უკავშირდება, ჯორჯიაშვილის ქუჩაზე დაიგებოდა თუ არა ასფალტი, არჩევნების ბედზე ეს დიდ გავლენას არ მოახდენდა. რა არის აქ გაუგებარი, ტყუილად ნუ ტეხავთ აჟიოტაჟს“.
დეპუტატი თამარ ნადირიძე დაინტერესდა, რა იგულისხმება, კომუნალური მომსახურების ცენტრის 50.0 ათასი ლარით დაფინანსებით გაზრდაში“, რაზეც საფინანსო სამსახურის უფროსმა მარიკა ნაცვალაძემ უპასუხა:
“შეგიძლიათ, დაინტერესდეთ ნებისმიერ დროს და მიიღოთ კონკრეტული ინფორმაცია, ქალაქის ტერიტორიაზე დამატებითი სამუშაოების შესრულებისთვის ეზრდებათ დაფინანსება, დევს ინფორმაცია საფინანსო სამსახურში, ეს საკითხი კომისიებში განხილულია, ბიუროზე გატანილია“.
საკრებულოს დეპუტატმა ნათია შარაშენიძემ შეჭირვებულ მოქალაქეებზე დახმარების გაცემაზე ისაუბრა. შარაშენიძის თქმით, სოციალური დახმარებები გაიცემა თანამდებობის პირებთან დაახლოებულ მოქალაქეებზე, არჩვენებში დასაქმებულ კოორდინატორის ოჯახების წევრებზე. მის მიერ დასმულ შეკითხვებს დეპუტატებს შორის დაპირისპირება მოჰყვა.
დეპუტატებმა შარაშენიძეს მიმართეს, რომ თუ მასში რაიმე საკითხი ეჭვს იწვევდა, დაინტერესდეს და შევიდეს რომელიმე კომისიაში, სადაც განიხილავენ კონკრეტულად ამა თუ იმ თემას.
საფინანსო საბიუჯეტო კომისიის თავმჯდომარემ ლავრენტი ბიგვავამ აღნიშნა, რომ 2017 წლის ბიუჯეტი სხვა წლებთან შედარებით უკეთესია და ის აუცილებლად უნდა დამტკიცდეს. ის გამოეხმაურა ნათია შარაშენიძეს და აღნიშნა, რომ ის აბსოლუტურად ჩაუხედავია ბიუჯეტში და არ იცის მისი შედგენის მეთოდოლოგია:
“3:0-ია ქალბატონი ნათიას სასარგებლოდ, მე იმ დონეზე დავეცი, რა დონისაც თვითონ არის, არანაირი პასუხი არ უნდა გამეცა მისთვის, ეს არის არაადეკვატური პიროვნება. კარგად იყავი“, _ მიმართა ბიგვავამ შარაშენიძეს, რაზეც პასუხი უმალვე მიუგო დეპუტატმა: "ხელისუფლების მსგავსი მოლაქუცე არავინ არის. თქვენ მხოლოდ ის იცით, კუდი როგორ უქნიოთ ხელისუფლებას. ქალს როგორ უნდა ესაუბროთ, არ იცით, არაეკვატური ხართ თქვენ!", _ მიმართა ბიგვავამ შარაშენიძეს.
