“იმის მტკიცება, რომ საქონელი არ გაძვირდება, ტყუილი იქნება” _ სოსო არჩვაძე

სახელმწიფო ბიუჯეტის პროექტში ჩადებული პარამეტრების მიხედვით, შემოსავლები იზრდება უფრო სწრაფად, ვიდრე ბიუჯეტის ხარჯი ან მთლიანი შიგა პროდუქტის ნომინალური განზომილება.
"ფასების მომატებასთან დაკავშირებით გარკვეული მოლოდინი და შეშფოთება არსებობს. იმის მტკიცება, რომ საქონელი არ გაძვირდება, ტყუილი იქნება და ამაზე საუბარიც უხერხულია. ერთია ფასების ზრდა და მეორე, როგორი იქნება მოსახლეობის შემოსავალი. თუკი მთლიანი მაჩვენებელი გადააჭარბებს ფასების ზრდის ტემპს, მაშინ მოსახლეობის კეთილდღეობა არათუ გაუარესდება, გაუმჯობესდება კიდევაც. სახელმწიფო ბიუჯეტის პროექტში ჩადებული პარამეტრების გათვალისწინებით, გამოდის, რომ შემოსავლები იზრდება უფრო სწრაფად, ვიდრე ბიუჯეტის ხარჯი ან მთლიანი შიგა პროდუქტის ნომინალური განზომილება”, _ აცხადებს სტატისტიკის ექსპერტი სოსო არჩვაძე გაზეთ „რეზონანსთან“  საუბრისას და აღნიშნავს, რომ  გარკვეული პროდუქციის გაძვირება მოსალოდნელია, რაც გავლენას მოახდენს ფასების საერთო დონის მაჩვენებელზე.

ექსპერტის აზრით, ოჯახს, საშუალოდ, თვეში 60-100 ლარით მეტის გადახდა მოუწევს, ვიდრე აქამდე იხდიდა.

"ფასები საქართველოში 0,6-ჯერ უფრო დაბალია, ვიდრე _ იაპონიაში, რაც სულაც არ ნიშნავს, რომ ჩვენთან ხალხი უკეთესად ცხოვრობს. ფასის მატება ერთი ასპექტია, მეორე _ საკუთარი განკარგვადი შემოსავლით რა რაოდენობის პროდუქტის ყიდვა შეუძლიათ. პირობითად, იაპონიაში თუ არის ხორცის ფასი 30 დოლარი, ხოლო საქართველოში _ 5 დოლარი, სამაგიეროდ, იქ ხალხს აქვს შემოსავალი იმდენი, რომ შეუძლია გაცილებით მეტი ხორცის ყიდვა, ვიდრე ჩვენი ქვეყნის მოქალაქეს საქართველოში. ეს ნიშნავს, რომ იაპონიის მოქალაქე უკეთესად ცხოვრობს. ვფიქრობ, საშუალოდ, ოჯახს თვეში 60-100 ლარით მეტის გადახდა მოუწევს. აქცენტი უნდა გადავიტანოთ არა იმაზე, რამდენად გაიზრდება ან შემცირდება ფასი, არამედ შესაძლებლობაზე, თუ რამდენად მოვახერხებთ ახალ ვითარებაში შემოსავლების გაზრდას“, _ აცხადებს სოსო არჩავაძე და აღნიშნავს, რომ დაბალი გადასახადი და ფასი მოკლევადიან პერსპექტივაში კარგია, მაგრამ გრძელვადიან პერსპექტივაში იაფი საქონელი არ არის დალხენილი ცხოვრების გამოხატულება.