ქალაქ ოზურგეთის მუნიციპალიტეტის საკრებულოს წევრმა, ნათია შარაშენიძემ ქალაქის მერს, ბეგლარ სიორიძეს სასამართლოში უჩივლა.
„მიმდინარე წელს, როგორც საკრებულოს წევრმა, მივმართე ქალაქის მერს და მოვითხოვე, გადმოეცათ ჩემთვის შემდეგი საჯარო ინფორმაცია, კერძოდ: 2015-2016 წლებში ჩატარებული აუდიტორული დასკვნის შედეგები, სამწუხაროდ, მერიამ სხვადასხვა მიზეზის გამო დოკუმენტაცია დამიმალა და არ მომაწოდა, რის გამოც ხელი შემეშალა, სრულფასოვნად გამეხორციელებინა ჩემი, როგორც საკრებულოს წევრის უფლება-მოვალეობები.
“რადგან საჯარო ინფორმაციის მიღების ყველა გზა ჩემთვის მოჭრილია, სხვა გზა, პრაქტიკულად, აღარ დამრჩა და მივმართე სასამართლოს“.
ქალაქის მერის წინააღმდეგ დეპუტატის მიერ შეტანილი სარჩელი ქალაქ ოზურგეთის სასამართლომ 21 დეკემბერს განიხილა.
29 დეკემბერს, კი ოზურგეთის რაიონულმა სასამართლომ საკრებულოს წევრის ნათია შარაშენიძის სარჩელი არ დააკმაყოფილა. მოსამართლის გადაწყვეტილებით, ის, როგორც საკრებულოს წევრი, არ თავისუფლდება მოსაკრებლის გადახდისგან და კანონი ასლის მოსაკრებლის შესახებ ყველა მოქალაქეზე, მათ შორის, საკრებულოს წევრზეც თანაბრად ვრცელდება.
“მიმდინარე წელს, ქალაქ ოზურგეთის საკრებულოს წევრმა ნათია შარაშენიძემ ქალაქ ოზურგეთის მუნიციპალიტეტის მერიისგან გამოთხოვილი საჯარო ინფორმაციის ასლის მოსაკრებლის გადახდაზე უარი განაცხადა და სარჩელით სასამართლოს მიმართა.
ქალბატონი ნათია მიზანმიმართულ პროვოკაციას ეწეოდა ქალაქის მერიის მიმართ. მას შესაძლებლობა ჰქონდა, მისთვის საჭირო ინფორმაცია ელექტრონული ფორმით გამოეთხოვა, რაც მოსაკრებლის გადახდას არ ექვემდებარება, ასევე, შარაშენიძეს შეეძლო ინფორმაციას გაცნობოდა დედანში.
საჯარო ინფორმაციის მოთხოვნის აღნიშნული ფორმებით მან არ ისარგებლა, ხოლო ქალაქის მერიის მიერ, კანონის მიხედვით, დაწესებული მოსაკრებლის გადახდაზე უარი განაცხადა“, _ ამბობს ბეგლარ სიორიძე.
ქალაქ ოზურგეთის მუნიციპალიტეტის საკრებულოს წევრმა ნათია შარაშენიძე ოზურგეთის რაიონული სასამართლოს მიერ გამოტანილ გადაწყვეტილებას სააპელაციო სასამართლოში გაასაჩივრებს:
“ოზურგეთის რაიონული სასამართლოს მიერ გამოტანილი გადაწყვეტილება არის უპრეცედენტოდ უსამართლო, ოზურგეთში, მე პირადად, სხვა შედეგს არც ველოდებოდი _ გადაწყვეტილებით ნათქვამია, რომ მე საჯარო ინფორმაციაში მოსაკრებელი უნდა გადავიხადო და მხოლოდ შემდეგ გადმომეცემა მოთხოვნილი დოკუმენტაცია, სასამართლომ არ გაითვალისწინა ის, რომ მე ვარ საკრებულოს წევრი და დოკუმენტაცია მესაჭიროება ჩემი უფლებამოსილების სრულფასოვნად გახორციელებისთვის, არ არსებობს მსგავსი პრეცედენტი, როდესაც საკრებულოს წევრს თანხას სთხოვენ დოკუმენტაციის მისაღებად, გამოდის, რომ სამუშაოდ, ხვალ უფრო სქელტანიანი დოკუმენტაცია რომ დამჭირდეს, ვერ მივიღებ, რადგან ჩემი პირადი ბიუჯეტი არ მეყოფა მოსაკრებლებში. დღევანდელ გადაწყვეტილებას აუცილებლად გავასაჩივრებ სააპელაციო სასამართლოში და ვიდავებ ბოლომდე, გადაწყვეტილება ძირს უთხრის საკრებულოს, როგორც მაკოტროლებელ ორგანოს და უკანონოდ ზღუდავს საკრებულოს წევრის უფლებამოსილებას. გარდა ამისა, საკრებულოს სხვა წევრებისთვისაც ეს იქნება მაგალითი, რომ არავინ არასოდეს მოითხოვოს სქელტანიანი დოკუმენტაცია, რადგან მათ მოუწევთ მოსაკრებლის გადახდა, შედეგად კი არავინ მოითხოვს და მივიღებთ საკრებულოს, როგორც მაკონტროლებელი ინსტიტუციის ჩამოშლას და უუნაროდ გადაქცევას, ნაადრევია ქალაქ ოზურგეთის მერის ბეგლარ სიორიძის სიხარული, რადგან მას მოუწევს სააპელაციო სასამართლოში მოპასუხედ ჯდომა“, _ ამბობს შარაშენიძე.
